АНУ Ирантай холбоотой мөргөлдөөний улмаас эрчим хүчний үнэ өссөнтэй холбогдуулан түр сулруулаад байсан Оросын нефть, нефтийн бүтээгдэхүүнд тавьсан хориг арга хэмжээг дахин чангатгав.
Үүний улмаас Москва нэг сарын хугацаанд хэр хэмжээний орлого олж амжсан, мөн шинэ хориг нь Украин дахь дайнд ямар нөлөө үзүүлэх вэ гэсэн асуулт анхаарал татаж эхэлжээ.
Мөн Персийн булангийн бүс дэх дайн нь ОХУ-ын Ерөнхийлөгч Владимир Путин, АНУ-ын Ерөнхийлөгч Дональд Трамп, Украины Ерөнхийлөгч Владимир Зеленский нарын харилцаанд ямар өөрчлөлт авчирсан талаар ч хөндсөн байна.
DW-ийн “Geofactor” подкастад эдийн засагч Владислав Иноземцев болон Вашингтон дахь Кеннаны хүрээлэнгийн шинжээч Майкл Киммаж нар энэ талаар тайлбарлажээ.
АНУ-ын Ерөнхийлөгч Дональд Трамп Оросын нефтьд тавьсан Вашингтоны хориг арга хэмжээг дахин сэргээхээ гуравдугаар сарын 15-нд NBC News-т ярилцлага өгөхдөө мэдэгдсэн байна. Тэр Ирантай холбоотой дайны улмаас шатахууны үнэ өссөнтэй холбогдуулан хоригийг түр хугацаанд сулруулаад байснаа дурджээ.
Трамп “Хямрал дуусмагц хязгаарлалтын арга хэмжээг дахин хэрэгжүүлнэ” гэж онцлоод, “Дэлхийд нефть хэрэгтэй. Би нефть байгаасай гэж хүсэж байна” хэмээн шийдвэрээ тайлбарласан байна.
АНУ өмнө нь Оросын нефть, нефтийн бүтээгдэхүүний зарим нийлүүлэлтийг дөрөвдүгээр сарын 11 хүртэл хоригийн хүрээнээс түр чөлөөлсөн.
Тухайлбал, танкерт хэдийнэ ачигдсан нефтийг худалдахыг зөвшөөрсөн тусгай зөвшөөрлийг гуравдугаар сарын 12-нд тус улсын Сангийн яамны цахим хуудсанд нийтэлжээ.
АНУ-ын Сангийн сайд Скотт Бессент энэ шийдвэрийг дэлхийн эрчим хүчний зах зээлийг тогтворжуулах, үнийг тогтвортой барих зорилготой гэж тайлбарласан байна.
Түүний хэлснээр, энэ нь богино хугацааны арга хэмжээ бөгөөд Оросын засгийн газарт томоохон санхүүгийн ашиг авчрахгүй, учир нь тус улс орлогынхоо ихэнхийг олборлолтын татвараас бүрдүүлдэг аж. Мөн нефтийн үнийн өсөлтийг “түр зуурын саатал” гэж тодорхойлжээ.
Fox News-ийн мэдээлснээр, гуравдугаар сарын 12-ны байдлаар дэлхийн 30 орчим цэгт байрлах танкеруудад Оросын гаралтай 124 сая баррель нефть байсан бөгөөд Ормузын хоолойд үүссэн “гацаа”-ны улмаас энэ нь ердөө 5-6 хоногийн нийлүүлэлтийг хангах хэмжээ юм байна.
Үүнээс гадна Трамп Ираны шинэ дээд удирдагч Можтаба Хаменейн талаар “Амьд байгаа эсэх нь тодорхойгүй” хэмээн эргэлзэж буйгаа мэдэгдсэн байна. Тэрбээр “Хэрэв амьд бол улс орныхоо төлөө ухаалаг шийдвэр гаргаж, бууж өгөх хэрэгтэй” гэж хэлсэн ч үхсэн гэх мэдээллийг “цуурхал” гэж нэрлэжээ.
Харин Можтаба Хаменеи анхны мэдэгдэлдээ АНУ болон Израилийн эсрэг тэмцлээ үргэлжлүүлж, Иран “Гаднын түрэмгийлэлд бууж өгөхгүй” гэж мэдэгдсэн байна. Мөн тэрбээр дэлхийн нефтийн худалдааны 20 орчим хувь дамждаг Ормузын хоолойг хаасан нь Ираны хувьд “чухал дарамтын хэрэгсэл” хэвээр байх болно гэж онцолжээ.
Эх сурвалж: DW
