Усны газрын дарга З.Батбаяр Туул голын усны чанарын өнөөгийн байдлын талаар мэдээлэв. Тэрбээр “Бид усны чанарын шинжилгээг улирал тутамд авч байсан бол цаашид сар бүр тогтмол авч байхаар төлөвлөж байна.
Энэ удаагийн шинжилгээг өнгөрсөн гуравдугаар сарын 10-нд авсан. Тухайн үе нь мөс дөнгөж ханзарч эхэлсэн, одоогийнх шиг асуудлууд үүсээгүй байлаа. Шинжилгээг эхлээд Баянзүрхийн гүүр орчимд хийсэн. Усны чанарын индекс 44.97 гарсан нь “бага зэрэг бохирдолтой” ангилалд хамаарч байна. Харин гурван жилийн өмнө энэ бүсэд ус “цэвэр” ангилалд багтаж байсан.
Сайн мэдээ нь гэдэсний бүлгийн эмгэг төрөгч нян болон гэдэсний савханцар нян илрээгүй. Гэвч нийт нянгийн тоо стандарт хэмжээнээс давжээ. Тодруулбал, стандартын дагуу 10 мянгаас доош байх ёстой байтал шинжилгээгээр 20 мянга гарч, зөвшөөрөгдөх хэмжээнээс хоёр дахин их үзүүлэлттэй гарсан. Мөн бусад хэд хэдэн үзүүлэлт стандарт хэмжээнээс давсан байна.
Харин Маршлын гүүр орчимд хийсэн шинжилгээгээр усны бохирдлын индекс 138.64 болж, “маш бохирдолтой” ангилалд орсон. Өмнө нь энэ бүс нутаг харьцангуй цэвэрт тооцогддог байсан. Судалгааны явцад өмнөх жил дээж авахдаа байршлын хувьд алдаа гаргасныг тогтоосон. Тухайлбал,
Маршлын гүүрний дороос бус, Их Тэнгэрийн амнаас ирэх булгийн уснаас дээж авч байсан тул маш цэвэр гэсэн дүн гарч байжээ. Харин энэ удаад гүүрний яг доороос авсан дээж маш бохирдолтой гарсан. Түүнчлэн эндээс гэдэсний бүлгийн савханцар нян илэрсэн. Энэ нь нүхэн жорлонгийн асуудал гэсэн үг. Харин гэдэсний бүлгийн эмгэг төрөгч нян илрээгүй” хэмээн ярилаа.
Сонсголонгийн гүүр орчим маш бохирдолтой гарсан бол Биокомбинатад усны чанарын индекс 459.64 хүрч, “маш их бохирдолтой” түвшинд хүрчээ. Гэдэсний бүлгийн эмгэг төрөгч нян илэрсэн байна. Ийм усыг шууд хэрэглэх нь хүний эрүүл мэндэд ноцтой эрсдэл учруулж, ялангуяа гэдэс, ходоодны өвчлөл үүсэх нөхцөлийг бүрдүүлнэ.
Мөн гэдэсний савханцар нян стандарт хэмжээнээс 10 дахин ихэсжээ. Эдгээр үзүүлэлт нь Төв цэвэрлэх байгууламжийн үйл ажиллагаатай шууд холбоотой гэж үзэж байна. Бид Төв цэвэрлэх байгууламжаараа дамжуулаад Туул голын бохирдлын үндсэн шалтгаан болж байна гэсэн үг. Үүнээс цааш Шувуун фабрик орчимд нөхцөл байдал бүр дордсон, Туул гол бүрэн бохирдсон байна гэдгийг дурдав.
Харин Яармагийн гүүр орчимд усны чанар харьцангуй сайн үзүүлэлттэй гарчээ.
