НҮБ-ын Цөлжилттэй тэмцэх конвенцын талуудын 17 дугаар бага хурлыг зохион байгуулах ажлын албаны Бодлого, төлөвлөлт, хөрөнгө оруулалтын багийн ахлагч Ж.Санчир мэдээлэл хийв.
Тэрбээр Бага хурлын сэдэв, уриа, нөхөн сэргээлтийн ач холбогдол, хүлээж буй үр дүн, нэгдсэн төлөвлөгөө, санаачилгуудын талаар болон үндсэн санаачилгуудаа Тогтвортой хөгжлийн зорилтуудтай хэрхэн уялдуулсныг хөндөн, дэлгэрэнгүй мэдээллээ.
Улаанбаатар хотод “Эх байгалиа сэргээе, итгэл найдвараа бадраая” гэсэн нэгдсэн уриан дор цөлжилт, газрын доройтол гэсэн сэдвийн хүрээнд болох уг хуралд 10 мянга орчим хүнийг оролцуулахаар төлөвлөжээ.
Мөн дэлхийн нийт газар нутгийн 40 орчим хувь доройтож, биологийн олон янз байдал алдагдаж, амьжиргаа, уур амьсгалын өөрчлөлтөд нэн сөргөөр нөлөөлж буй тул байгаль орчны нөхөн сэргээлтийн ач холбогдлын талаар илүүтэй хөндөж ярив.
Тодруулбал, 2030 он гэхэд доройтсон 1.5 тэрбум га газрыг нөхөн сэргээх зорилттой байгаа бөгөөд одоогийн байдлаар доройтсон 150 сая газрыг нөхөн сэргээснээр 200 сая хүний хүнсний аюулгүй байдлыг сайжруулах боломжтой аж.
Нөхөн сэргээлтэд оруулсан нэг ам.долларын хөрөнгө оруулалт 7-30 ам.долларын үр өгөөжи бий болгодог байна.
Бага хурлын хүрээнд Монгол Улсаас “Тал хээрийн төлөвлөгөө” гэсэн нэгдсэн санаачилга дэвшүүлэхээр зэхэж байгаа бөгөөд одоогийн байдлаар мөнгөн болон мөнгөн бус амлалт бусад санхүүжилтийн боломжийг 1.0 тэрбум ам доллар байх зорилт тавьсан аж.
Мөн “Тал хээрийн төлөвлөгөө”-ний хүрээнд бэлчээр, ус ба газрын нэгдсэн менежмент, байгальд суурилсан шийдэл бүхий дэд бүтэц гэсэн тэргүүлэх гурван санаачилгыг дэвшүүлэхээр төлөвлөжээ.
Тус бага хурлыг Тогтвортой хөгжлийн зорилтуудтай уялдуулан зохион байгуулах бөгөөд хуванцаргүй, хог хаягдлын тогтвортой менежментийг хэрэгжүүлэх замаар “хариуцлагатай хэрэглээ ба үйлдвэрлэл” (SDG 12) болон “усан доорх амьдрал” (SDG 14),
шийдвэр гаргалт болон арга хэмжээнд олон талт оролцогчдыг хамруулан тэгш, хүртээмжтэй оролцоог хангах замаар “жендэрийн тэгш байдал” (SDG 5) болон “тэгш бус байдлыг бууруулах” (SDG 10),
үндэсний үйлдвэрлэл, ханган нийлүүлэлтийг дэмжих замаар “зохистой хөдөлмөр ба эдийн засгийн өсөлт” (SDG 8)-ийг дэмжин ажиллах зорилготой байгаа аж.
Дараа нь НҮБ-ын Цөлжилттэй тэмцэх конвенцын талуудын 17 дугаар бага хулыг зохион байгуулах ажлын албаны Үйлчилгээ, логистик, аюулгүй байдлын газрын дарга Н.Өнөр хүлээгдэж буй үр дүн, Үндэсний хорооны 16 дугаар хурал, бэлтгэл ажлын хүрээнд гүйцэтгэж буй ажлын талаар товч мэдээлэв.
Бага хурлыг зохион байгуулах Үндэсний хороо 12 дэд хороотой. Тэдгээрийг холбогдох салбарын сайд, Засгийн газрын гишүүд, Төрийн нарийн бичгийн дарга нар ахалж, нийт 786 ажил бүхий нарийвчилсан төлөвлөгөөний дагуу ажиллаж байгаа аж.
Мөн тус бага хурлыг зохион байгуулахад зориулан 44м2 түр барилга байгууламжийг Үндэсний цэцэрлэгт хүрээлэнгийн зүүн талд барьж буй юм байна. Хуралд оролцогчдыг 85 зочид буудалд хүлээн авахаар төлөвлөж, эхний ээлжийн 30 гаруй зочид буудалтай гэрээ байгуулжээ.
Тогтвортой хөгжлийн зорилтуудтай тус бага хурлын гурван үндсэн санаачилгыг нягт уялдуулан, эдийн засгийн өсөлт, зохистой хөдөлмөр эрхлэлт нь аялал жуулчлалын үйлчилгээний салбарын өсөлт болон эдийн засгийн идэвхжлийг нэмэгдүүлэх төлөвтэй байгаа аж.
Энэ хүрээнд олон улсын стандартыг хангасан арга хэмжээний орчныг бүрдүүлэхэд чиглүүлж ажиллана гэлээ. Харин олон улсын түншлэл, хамтын ажиллагаа, дипломат харилцааг өргөжүүлэхэд Улсын Их Хурал, гишүүд дэмжлэг үзүүлэн хамтран ажиллахыг хүсэв.
