ОХУ Украин руу энэ оны хамгийн өргөн цар хүрээтэй довтолгоонуудын нэгийг хийж, олон зуун дрон болон пуужингаар цохилт өгсний улмаас 10 гаруй хүн амиа алдаж, 100 гаруй хүн шархадсан талаар Украины албаныхан пүрэв гарагт мэдээлжээ.
Орон нутгийн захиргаа болон Онцгой байдлын албанаас мэдээлснээр, орон даяар нийтдээ 18 хүн, түүний дотор нэг хүүхэд амь үрэгдэж, 118 хүн шархадсан байна. Оросын довтолгооны улмаас барилга байгууламжууд эвдэрч, гал түймэр гарчээ.
Украины Агаарын цэргийн хүчний мэдээлснээр, пүрэв гаргийн өглөө хүртэлх 24 цагийн хугацаанд ОХУ 659 дрон, 44 пуужингаар нийслэл Киев зэрэг томоохон хотууд болох Харьков, Одесса, Днипро, Запорожье руу чиглүүлэн харважээ.
Украины Гадаад хэргийн сайд Андрий Сыбиха X (хуучнаар Twitter)-д “Өнгөрсөн өдөр, шөнө Орос улс бараг 700 дрон, олон арван баллистик болон далавчит пуужин ашиглан Украинд томоохон террорист халдлага хийлээ. Энэ довтолгоо голчлон энгийн иргэдийг онилсон” гэж бичсэн байна.
Нийслэл Киев хотод дөрвөн хүн амь үрэгдсэний дотор 12 настай хүү байсан аж. Түүний цогцсыг нурсан барилгын нуранги дороос олсон байна. Мөн дор хаяж 48 хүн шархаджээ.
Киев дэх нэгэн барилгын компанийн гүйцэтгэх захирал хэлэхдээ барилгын талбайн яг хажууд дэлбэрэлт болж, зургаан ажилтан шархадсанаас хоёр нь хүнд байдалтай, мэс засалд орсон байна.
Одесса хотод дор хаяж 8 хүн амь үрэгджээ. Украины Онцгой байдлын албаны нийтэлсэн бичлэгт барилга галд автсан байдал, аврагчид нэг хүнийг дамнуургаар авч явж буйг харуулсан байна. Орон сууцны байранд эхлээд дроноор цохилт өгч нэг хүнийг хөнөөсний дараа баллистик пуужингаар дахин цохисноор бусад хохирол учирчээ.
Одесса дахь Хөгжмийн үндэсний академийн нэгэн удирдах ажилтан “Оюутны дотуур байрны нэг танхим бүхэлдээ эвдэрсэн” гэж мэдээлжээ.
Тэр Facebook-т “Шөнө дунд бүх оюутныг академийн байранд нүүлгэн шилжүүлсэн. Харамсалтай нь таван оюутан шархдаж, хотын эмнэлгүүдэд эмчилгээ хийлгэж байна” хэмээн бичиж, эвдэрч сүйдсэн өрөө тасалгааны зургуудыг нийтэлсэн байна.
Төвийн бүсийн Днипро хотод гурван хүн амь үрэгдэж, 34 хүн шархадсан бол зүүн өмнөдийн Запорожье хотод дор хаяж нэг хүн нас баржээ.
Сыбиха “Ийм халдлагыг хэвийн зүйл мэт хүлээн зөвшөөрч болохгүй. Эдгээр нь дайны гэмт хэрэг бөгөөд зогсоож, буруутай этгээдүүдэд хариуцлага тооцох ёстой” гэж онцолжээ.
Украины Ерөнхийлөгч Владимир Зеленский энэ довтолгооны улмаас Одесса, Киев, Днипро хотуудад хүний амь нас эрсэдсэнийг дурдаад, Орос улс “дайнд найдсаар байна” хэмээн буруутгасан байна.
Тэр “Өнгөрсөн шөнө дахин нэг зүйл батлагдлаа: Орос улсын эсрэг авсан дэлхийн хориг арга хэмжээ сулрах ёсгүй, хориг арга хэмжээг цуцлах боломжгүй” гэж хэлжээ.
Зеленский энэ долоо хоногт Ром хотод айлчилж, Италийн удирдагчидтай уулзсан. Тэрбээр Серджо Маттареллад Украин бүс нутгийн орнуудтай байгуулсан аюулгүй байдлын хамтын ажиллагааны талаар танилцуулж, мөн Батлан хамгаалахын сайд Гуидо Крозеттотой батлан хамгаалах салбарын хамтын ажиллагааны талаар хэлэлцжээ.
Энэхүү довтолгоо нь өнгөрсөн долоо хоногт болсон богино хугацааны гал зогсоох тохиролцооны дараа болсон байна. ОХУ-ын Ерөнхийлөгч Владимир Путин Православын Улаан өндөгний баярыг тохиолдуулан 32 цагийн гал зогсоох горим зарласан байсан бөгөөд үүнээс өмнө Зеленский мөн түр хугацаанд байлдааны ажиллагааг зогсоох санал гаргаж байжээ.
Эх сурвалж: CNN, BBC
