АНУ-ын Ерөнхийлөгч Дональд Трамп Исламабад хотод явагдаж буй Вашингтон болон Тегераны хоорондын хэлэлцээний үр дүн өөрт нь тийм ч чухал биш гэж дөрөвдүгээр сарын 11-ний бямба гарагт сэтгүүлчидтэй ярилцах үеэрээ хэлсэн байна.
Тэрбээр “Бид тохиролцоонд хүрэх эсэх нь надад хамаагүй. Яагаад гэвэл бид хэдийнэ ялсан” гэж хэлснийг AFP агентлаг иш татжээ. Трамп “Бид Ирантай маш гүнзгий хэлэлцээ хийж байна. Ямар ч байсан бид ялна. Бид тэднийг цэргийн хувьд ялсан” хэмээн мэдэгдсэн байна.
“Бид тэнд тральщик (мина цэвэрлэгч хөлөг) байрлуулсан”
Мөн Трамп АНУ-ын Зэвсэгт хүчний Төв командлал (CENTCOM)-ын мэдээллийг давтаж, дөрөвдүгээр сарын 11-нд АНУ-ын хоёр эсминец Ормузын хоолойгоор нэвтэрсэн гэж хэлжээ. Тэр “Бид тэнд мина цэвэрлэгч хөлгүүд байрлуулж, хоолойг цэвэрлэж байна” гэж онцолсон байна.
Трамп “Бид өөрсдөө ашиглахгүй байсан ч энэ хоолойг нээлттэй байлгана. Учир нь, дэлхий дээр олон улс орон үүнийг ашигладаг. Гэхдээ тэд айдаг, эсвэл сул дорой, эсвэл харамч байдаг” хэмээн хэлсэн байна.
Мөн тэрбээр НАТО-гийн холбоотнууд идэвхгүй байгаад дахин сэтгэл дундуур буйгаа илэрхийлээд, “НАТО бидэнд туслаагүй, үүнийг би баттай хэлж чадна” гэжээ.
Ираны Tasnim, Fars, IRNA агентлагуудын мэдээлснээр, Исламабад дахь хэлэлцээ дөрөвдүгээр сарын 12-нд үргэлжлэх аж. Хэлэлцээг үргэлжлүүлэхээс өмнө талууд шаардлагатай материалуудаа солилцох ёстой юм байна.
Financial Times: Ормузын хоолойн асуудлаас болж хэлэлцээ гацаанд орсон
Их Британийн Financial Times сонин дөрөвдүгээр сарын 11-нд мэдээлэхдээ, АНУ ба Ираны төлөөлөгчдийн Исламабад дахь хэлэлцээ Ормузын хоолойн хяналтын асуудлаар санал зөрөлдсөний улмаас “гацаанд орсон” гэжээ.
Тус сонины эх сурвалжийн хэлснээр, Иран улс уг хоолойг хянах эрхтэй байх, мөн түүгээр дамжин өнгөрөх усан онгоцноос татвар авах эрхтэй байхыг шаардаж байгаа аж.
Мөн АНУ-аас санал болгож буй “хамтарсан хяналт”-ын хувилбарыг хүлээн зөвшөөрөхөөс татгалзжээ.
Тегеран Вашингтоны тавьж буй шаардлагуудыг “хэтэрхий их” бөгөөд “хүлээн зөвшөөрөх боломжгүй” гэж үзэж байгаа талаар Fars агентлаг мэдээлжээ.
Tasnim агентлагийн мэдээлснээр, Ираны тал “цэргийн ололт амжилтаа хадгалах”-ыг шаардаж байгаа нь тус улсын пуужингийн хөтөлбөрийг хэлж байж магадгүй аж.
АНУ, Ираны төлөөлөгчид Пакистаны Ерөнхий сайдтай уулзжээ
Исламабад дахь хэлэлцээнд АНУ-ын төлөөлөгчдийг тус улсын дэд ерөнхийлөгч Жеймс Дэвид Вэнс ахалж буй аж. Түүнээс гадна тус багт Ерөнхийлөгчийн тусгай элч Стивен Уиткофф болон Трампын хүргэн Жаред Кушнер нар багтжээ.
Хэлэлцээ эхлэхийн өмнө Вэнс Пакистаны Ерөнхий сайд Шахбаз Шарифтай уулзсан байна. Вэнсийн хэлснээр, одоогоор хэлэлцээгээр ямар нэгэн тохиролцоонд хүрээгүй байгаа аж.
Тэрбээр дөрөвдүгээр сарын 12-нд Исламабад хотод “Иран улс цөмийн хөтөлбөрөөсөө татгалзах талаар ямар ч амлалт өгөөгүй” гэж мэдэгджээ.
Ираны төлөөлөгчдийг парламентын дарга Мохаммад Багер Галибаф болон Гадаад хэргийн сайд Аббас Арагчи нар ахалж буй бөгөөд тэд мөн дөрөвдүгээр сарын 11-нд Шарифтай уулзсан байна.
Эх сурвалж: DW
