Сүүлийн нэг хоногийн дотор Ормузын хоолойтой холбоотой нөхцөл байдал эрс савлаж, богино хугацаанд эсрэг тэсрэг чиглэлд эргэв. Өчигдөрхөн гал зогсоох хэлэлцээр дуусах дөхөж буйтай холбоотойгоор тээвэр сэргэж, усан зам дахин нээгдэх найдвар төрж байсан.
АНУ-ын Ерөнхийлөгч Дональд Трамп баасан гарагт Тегеранаас ирсэн “хоолой бүрэн нээлттэй” гэх дохиог эерэгээр хүлээн авч, тээврийн урсгал хэвийн болно гэсэн хүлээлт бий болгосон.
Мөн Ираны Гадаад хэргийн сайд Аббас Арагчи уг усан замыг нээх боломжтойг дурдсан нь зах зээлд шууд нөлөөлж, газрын тосны үнэ богино хугацаанд огцом буурахад хүрсэн аж.
Гэвч энэ өөдрөг уур амьсгал удаан үргэлжилсэнгүй. АНУ Ираны боомтуудын бүслэлтийг хэвээр хадгална гэж мэдэгдсэн нь байдлыг дахин хурцатгав.
Үүний хариуд Ираны Исламын хувьсгалт гвард Ормузын хоолойг дахин хааж, “Ойртсон аливаа хөлөг онгоцыг дайсны талд орсон гэж үзнэ” хэмээн анхааруулжээ.
Удалгүй бодит хурцадмал байдал илэрч, Оманы ойролцоо хөлөг онгоцууд руу гал нээсэн тухай мэдээлэл гарсан нь бүс нутгийн эрсдэлийг улам нэмэгдүүлэв.
Ираны тал худалдааны тээвэрлэлтийг хязгаарлахаа дахин нотолсон бол АНУ буулт хийхгүй гэсэн байр сууриа хэвээр хадгалж байгаа аж.
Үүний зэрэгцээ хоёр талын хэлэлцээ тодорхой ахицгүй болж, цөмийн хөтөлбөр, ураны асуудал, усан замын аюулгүй байдал зэрэг гол сэдвүүд дээр санал зөрсөн хэвээр байна.
Гал зогсоох тохиролцоо дуусах дөхөж буй энэ үед түүнийг сунгах эсэх нь тодорхойгүй хэвээр байгаа нь нөхцөл байдлыг бүр ч эмзэг болгожээ.
Ингэснээр ердөө 24 цагийн дотор найдвар төрүүлсэн эерэг дохио бодит эрсдэл, хурцадмал байдал руу шилжиж, АНУ ба Ираны харилцаа дахин тодорхойгүй байдалд орсон байна.
Эх сурвалж: DW
