Монгол Улсын Их Хурал Монгол Улсын Их Хурлын тухай хууль-д нэмэлт, өөрчлөлт оруулах тухай, мөн хамт өргөн мэдүүлсэн хууль, тогтоолын төслүүдийг (Монгол Улсын Ерөнхийлөгч 2026 оны гуравдугаар сарын 9-ний өдөр өргөн мэдүүлсэн) хэлэлцэх эсэх асуудлыг чуулганы нэгдсэн хуралдаанаар хэлэлцэв.
Хэлэлцүүлгийн үеэр УИХ-ын гишүүн, Ардчилсан нам-ын бүлгийн дарга О.Цогтгэрэл байр сууриа илэрхийлж, уг хуулийн төслийн зарим заалт нь Монгол Улсын Үндсэн хууль-тай зөрчилдөх магадлалтайг онцлов.
Тэрбээр УИХ-ын гишүүнийг ёс зүй зэрэг хэмжихэд төвөгтэй шалгуураар дүгнэж, улмаар Үндсэн хуулийн цэц болон шүүхийн байгууллагын дүгнэлтэд үндэслэн мандатыг нь хөндөх боломж бүрдэж байгаа нь парламентын бие даасан байдалд сөргөөр нөлөөлж болзошгүй хэмээн үзэж байгаагаа илэрхийлсэн юм.
Мөн уг зохицуулалт нь ард түмний төлөөллийн эрх мэдлийг “улс төрийн шинжтэй шүүхийн процесс”-оор шийдэх эрсдэл бий болгож, хэлэлцүүлгийн явцад засахад хүндрэлтэй заалт гэж зарим гишүүд дүгнэж байгааг дурдав. Гэсэн ч намын гишүүд өөрсдийн үзэл баримтлал, итгэл үнэмшилдээ тулгуурлан бие даан шийдвэр гаргах ёстойг онцолсон.
Хуралдааныг даргалсан УИХ-ын дарга С.Бямбацогт гишүүдийг санал хураалтад идэвхтэй, бүрэн оролцохыг уриалж, ирцийн асуудалд онцгой анхаарахыг санууллаа. Тэрбээр парламентын засаглалыг бэхжүүлэх, хууль тогтоох үйл ажиллагааг шуурхай, хариуцлагатай явуулах нь олон нийтийн хүлээлт болохыг тэмдэглэсэн юм.
Ингээд Монгол Улсын Ерөнхийлөгчийн санаачилсан дээрх хуулийн төслийг хэлэлцэх эсэх асуудлаар санал хураалт явуулахад 101 гишүүн оролцсоноос 57 гишүүн буюу 56.4 хувь нь дэмжив. Ийнхүү уг төслийг “үзэл баримтлалын хувьд хэлэлцэх нь зүйтэй” хэмээн гишүүдийн олонх үзэж, хэлэлцүүлэг үргэлжилж байна.
Чуулганы хуралдаанаар Шинжлэх ухаан, технологийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэж, гишүүд асуулт асууж, байр сууриа илэрхийлэв.
УИХ-ын гишүүн Б.Ганхөлөг “Хэлэлцэж байгаа асуудалтай холбогдуулан асуулт асуухаасаа өмнө Ерөнхийлөгчийн санаачилсан хуультай холбоотой байр сууриа илэрхийлэхгүй бол болохгүй нь. Ганц хүний засаглал, дарангуйлал руу орж байгаад харамсаж байна, УИХ-ын дарга аа.
Парламентынхаа эсрэг УИХ-ын даргатай байгаад харамсаж байна. Ардчиллынхаа эсрэг Ардчилсан намтай байгаад харамсаж байна. Дээрээс нь өөрсдийнхөөрөө саналаа өгч чаддаггүй байгаа ах нараасаа эмээж байна. Ерөнхийдөө Монгол Улсад бүх зүйл зарчмынхаа дагуу явж чадахгүй байгаагийн илрэл боллоо” гэв.
