ОХУ-ын Ерөнхийлөгч Владимир Путиныг шүүмжилж байсан, ОХУ-ын эрх баригчдыг дэмжигч блогер Илья Ремесло Санкт-Петербург хотын Скворцов-Степановын нэрэмжит сэтгэцийн №3 эмнэлгээс гарсан байна. Энэ талаар тэрбээр дөрөвдүгээр сарын 17-ны баасан гарагт өөрийн Telegram сувагтаа нийтэлж, эмнэлэгт нийт 30 хоног хэвтсэнээ мэдэгджээ.
Блогер “Төрийн өндөр албан тушаалтнуудыг хатуу шүүмжлэх нь өөрийн үнэтэй байдаг. Үүнийг санаж яваарай” гэж бичсэн байна.
Ремеслогийн хэлснээр, эмнэлгийн нөхцөл байдал “нэлээд хүнд, тэр байтугай хорих ангиас ч хэцүү”, гадаа гарах боломжгүй байсныг онцолжээ.
Мөн эмнэлэгт дагалдан ирсэн эмнэлгийн ажилтнууд түүнийг “Хэмжээ хязгаартай шүүмжлэх хэрэгтэй” гэж зөвлөж, түүний постууд олон нийтийн дунд “маш их бухимдал” үүсгэсэн талаар дурдсан байна. Энэ үеэр тэрбээр сэтгүүлч Ксения Собчакийг мөн дурджээ.
Илья Ремесло өөрийн хийсэн зүйлдээ харамсахгүй байгаа ч цаашид “Илүү тэнцвэртэй, хувь хүнийг шууд онилсон бус илэрхийлэл” ашиглана гэж мэдэгдсэн байна.
Мөн ойрын 2-3 хоногийн дотор болсон үйл явдлын шалтгаан болон цаашдын төлөвлөгөөгөө тайлбарлана гэж амалжээ.
Кремлийг шүүмжилсэн Z-блогерийн үйл явдал
Хуульч мэргэжилтэй Илья Ремесло өмнө нь ОХУ-ын Иргэдийн танхимын гишүүн байсан бөгөөд блогтоо Кремлийн удирдлагыг дэмжиж, сөрөг хүчнийг шүүмжилдэг байж. Тэрбээр мөн сөрөг хүчний удирдагч Алексей Навальный болон түүний багийн эсрэг хэд хэдэн гомдол гаргахад оролцжээ.
Гэвч гуравдугаар сарын дунд үед Ремесло гэнэт Кремлийн бодлогыг хатуу шүүмжилж, Украины дайныг “гацаанд орсон” гэж нэрлэн, Владимир Путиныг “хууль бус ерөнхийлөгч” гээд, шүүхийг уриалсан байна. Энэ нь Z (Оросын Украин дахь дайныг дэмждэг хүмүүсийн орчин, үзэл бодол, нийгмийн бүлэг) соёлын хүрээнд ихээхэн шуугиан тарьжээ.
Түүний дараа Чечений тусгай ангийн командлагч Апти Алаудинов түүнийг “Алдар нэр, дагагчийн төлөө ингэж ярьж байна” гэж шүүмжилжээ. Зарим нь түүний аккаунтыг хакердсан байж магадгүй гэж таамагласан ч Ремесло өөрөө үүнийг няцаасан байна.
Ремесло гуравдугаар сарын 19-нд сэтгэцийн эмнэлэгт хэвтсэн тухай мэдээлэл гарч, зарим эх сурвалжууд үүнийг гуравдагч этгээдийн хүсэлтийн дагуу хэвтүүлсэн гэж дурдсан байна. Мөн түүний эгч Санкт-Петербургийн нэртэй сэтгэцийн эмч болохыг олон нийт анхааралдаа авчээ.
Эх сурвалж: DW
