АНУ-ын Холбооны нөөцийн сангийн даргаар томилогдох эсэхийг шийдэх халуухан сонсголын үеэр Кевин Уорш Ардчилсан намын сенаторуудтай ширүүнхэн мэтгэлцжээ.
Түүнийг Холбооны нөөцийн сангийн даргаар томилох эсэхийг шийдэх Сенатын мягмар гаргийн сонсголын үеэр Ерөнхийлөгч Дональд Трампын “утсан хүүхэлдэй” болох эсэх талаарх таамаг, мөн насанд хүрээгүйчүүдтэй холбоотой хэрэгт холбогдож байсан санхүүч Жеффри Эпштейнтэй холбоотой асуултууд хөндөгдсөн байна.
Энэ сонсголын гол анхаарал татсан асуудлуудыг доор хүргэж байна.
Уорш Трампын “утсан хүүхэлдэй” болохгүй гэв
Түүнийг томилох үйл явцыг хянаж буй банкны хорооны Ардчилсан намын ахлах гишүүн сенатор Элизабет Уоррен Уоршийг Төв банкны дарга болвол Трампын “утсан хүүхэлдэй” болохоос хэтрэхгүй гэж мэдэгджээ.
Трамп өмнө нь, хэрэв Уорш Холбооны нөөцийн сангийн даргаар томилогдвол өөрийнх нь бодлогыг дагаж, зээлийн хүүг бууруулна гэж үзэж байгаагаа илэрхийлж байсан аж. Түүний үзэж буйгаар, энэ нь АНУ-ын эдийн засгийг дэмжихэд зайлшгүй шаардлагатай алхам болох юм байна.
Уоррен “Хэрэв Холбооны нөөцийн санг утсан хүүхэлдэй удирдвал Ерөнхийлөгч тус байгууллагын хүчтэй эрх мэдлийг ашиглан өөрийгөө, гэр бүлээ болон Уолл-стрит дэх ойрын хүрээллээ баяжуулах боломжтой болно” гэж хэлжээ.
Түүнийг үнэхээр Ерөнхийлөгчийн “утсан хүүхэлдэй” болох уу гэж асуухад Уорш “Огт үгүй” хэмээн хариулжээ.
Тэрбээр өмнө нь Холбооны нөөцийн сангийн удирдлагад ажиллаж байсан, АНУ-ын Төв банкны хараат бус байдал “маш чухал” гэдгийг онцлон, уг бие даасан байдлыг хадгалахад тууштай ажиллахаа амалсан байна.
Эпштейнтэй холбоотой эсэх талаар асуув
Уоршийг томилохыг эсэргүүцэж буй Уоррен сенатор мөн түүний Жеффри Эпштейнтэй холбоотой байж болзошгүй асуудлыг хөнджээ.
Уорш хэдэн зуун сая ам.долларын хөрөнгөтэй. Дор хаяж 100 сая ам.долларын үнэлгээтэй хөрөнгө оруулалтын сантайгаа мэдүүлсэн ч уг сангийн доторх бодит хөрөнгийн бүтэц тодорхойгүй байгаа аж.
Уоррен “Эдгээр сангууд Ерөнхийлөгч Трамп болон түүний гэр бүлийн компаниудтай холбоотой юу, мөнгө угаалттай холбоотой компаниудад хөрөнгө оруулдаг уу, Хятадын хяналтад байдаг компаниудтай холбоотой юу, эсвэл Жеффри Эпштейн байгуулсан санхүүгийн бүтэцтэй холбоотой юу?” гэж асуужээ.
Уорш энэ асуултад шууд хариулахаас татгалзсан ч Холбооны нөөцийн сангийн даргаар томилогдвол өөрийн бүх хөрөнгийг зарахаа мэдэгдсэн байна.
Түүний нэр АНУ-ын Хууль зүйн яамны Эпштейнтэй холбоотой баримтуудад хэд хэдэн удаа дурдагдсан ч зөвхөн нэр нь бичигдсэн нь ямар нэг буруутай гэсэн үг биш аж.
Уорш Трамптай тохиролцоо хийсэн гэх мэдээллийг няцаав
Уорш мягмар гаргийн сонсголын үеэр Трамптай хүү бууруулах талаар тохиролцоо хийсэн гэх мэдээллийг мөн үгүйсгэжээ.
Тэрбээр “Ерөнхийлөгч надаас ямар нэг тодорхой хүүгийн шийдвэр гаргахыг нэг ч удаа шаардаагүй. Хэрэв тийм зүйл шаардсан бол би хэзээ ч зөвшөөрөхгүй байсан, гэхдээ тэр ийм хүсэлт огт гаргаагүй” гэж хэлсэн байна.
Аризона мужаас сонгогдсон Ардчилсан намын сенатор Рубен Галлегогийн хэлснээр, “Wall Street Journal” сонин өнгөрсөн жил Трамп Уорштой уулзахдаа зээлийн хүү бууруулах шахалт үзүүлсэн талаар мэдээлж байсан аж.
Мягмар гаргийн сонсголын эхэнд Трамп CNBC-д ярилцлага өгөх үеэрээ “Хэрэв Уорш томилогдвол шууд хүү бууруулахгүй бол та сэтгэл дундуур байх уу?” гэж асуухад “Тийм ээ” гэж хариулсан байна.
Холбооны нөөцийн сангийн бодлогын хүү нь ипотекийн зээл, автомашины зээл, бизнесийн зээл зэрэг олон салбарт шууд нөлөөлдөг.
Бүгд Найрамдах намын сенатор дэмжих байр сууриа түр хойшлуулав
Уоршийг дэмжих болон эсэргүүцэх байр суурь ихэвчлэн намын шугамаар хуваагдсан ч Бүгд Найрамдах намын сенатор Том Тиллис ганцаараа дэмжих байр сууриа түр хойшлуулсан байна.
Тэрбээр дахин сонгуульд нэр дэвшихгүй бөгөөд Уоршийг энэ албан тушаалд тохирох “онцгой чадвартай” хүн гэж үнэлжээ.
Гэсэн ч тэрбээр одоогийн Холбооны нөөцийн сангийн дарга Жером Пауэллийн эсрэг явж буй шалгалтыг зогсоохгүй бол Уоршийг батлах санал өгөхгүй гэж мэдэгдсэн байна.
Трамп мөнгөний бодлогын асуудлаар Пауэллтай байнга зөрчилдсөөр иржээ. Энэхүү шалгалт нь Холбооны нөөцийн сангийн барилгын засварын зардал хэтэрсэнтэй холбоотой аж.
Тиллис уг зардлын өсөлтийг “харамсалтай ч хууль ёсны” гэж үзэж байгаагаа илэрхийлжээ.
Хэрэв Уорш томилогдохгүй бол Пауэлл бүрэн эрхийн хугацаа нь тавдугаар сарын 15-нд дууссан ч албан тушаалдаа үргэлжлүүлэн ажиллах боломжтой, Тиллисын байр суурь энэ нөхцөлийг бодит болгох магадлалтай байгаа аж.
Уорш Төв банканд “системийн өөрчлөлт” хийхийг зорьж байна
Уорш томилогдвол Холбооны нөөцийн сангийн бодлогын хүрээнд “системийн өөрчлөлт” хийхээ мэдэгджээ
Тэрбээр инфляцыг хэмжих аргачлал болон бодлогын мэдээллийг олон нийтэд хүргэх хэлбэрийг шинэчлэх шаардлагатай гэж үзэж байгаа аж.
Өөрийн нээлтийн үгэнд тэр Холбооны нөөцийн сангийн “урьдчилсан чиглэл” (forward guidance) буюу ирээдүйн хүүгийн бодлогыг урьдчилан зарлах практикийг шүүмжилжээ.
Тэрбээр энэ бодлогыг “үр дүн багатай” гэж үзэж, илүү тодорхойгүй, “урьдчилан бэлтгэсэн сценаригүй” уулзалтуудыг илүүд үздэгээ илэрхийлсэн байна.
Мөн тэрбээр инфляцын хэмжих шинэ аргачлал нэвтрүүлэхээ амалж, одоогоор хэрэглэгдэж буй Хувийн хэрэглээний зардлын индекс (PCE)-ээс өөр аргачлал ашиглах боломжийн талаар дурдсан байна.
Гэвч тэр энэ өөрчлөлтийг яг хэрхэн хэрэгжүүлэх талаар тодорхой тайлбар өгөөгүй ажээ.
Эх сурвалж: BBC
