Засгийн газрын өнөөдөр (2026.04.22)-ийн ээлжит хуралдаанаар шинжлэх ухаан, боловсролын салбарын багш, ажилчдын албан тушаалын цалингийн доод хэмжээг шинэчлэн тогтоолоо. Ингэснээр боловсролын салбарын багш, ажилчид цалингийн нэгдсэн, нэг сүлжээтэй болж байна.
Багш, ажилчдын цалингийн “нэмэгдэл”-ийг албан тушаалын цалингаас тооцож олгохоор тогтжээ. Өөрөөр хэлбэл, багш, ажилчид 50% нэмэгдсэн цалингаасаа нэмэгдлээ тооцуулж авах нөхцөлийг бүрдүүлж, Засгийн газрын 2025 оны 224 дүгээр тогтоол, 382 дугаар тогтоолуудад холбогдох өөрчлөлтийг оруулсан байна.
Тогтоолын хэрэгжиж эхлэх хугацааг 2026 оны тавдугаар сарын 1-нээс байхаар шийдвэрлэжээ.
Мөн цалингаас бусад хувьсах зардлын нөлөөллийг инфляцын түвшинтэй уялдуулан 30 хувиар нэмэгдүүлж тооцсон байна. Энэхүү зохицуулалтыг 2027 оноос хэрэгжүүлэх бөгөөд 2026 онд 2025 оны гүйцэтгэлээс бууруулахгүйгээр бусад хувьсах зардлын санхүүжилтийг олгох нь.
Нийгмийн даатгалын шимтгэлийн өртэй 1510 байгууллагад ажиллаж буй 44.6 мянган багш, ажилтанд учирсан санхүүгийн болон нийгмийн эрсдэл арилж байгаа аж.
Салбарын сайд Л.Энх-Амгалан цалингийн нэмэгдлийн талаарх асуултад хариулахдаа “Мэдээж төсвийн тодотгол хийх шаардлагатай. Төсвийн тодотголгүйгээр эх үүсвэрийг шийдэх нь хүндрэлтэй.
Гэхдээ төсвийн тодотголыг өнөө, маргааш хийх үндэслэл үүсээгүй гэж бид үзэж байна. Иймд төсвийн ерөнхийлөн гүйцэтгэгчдийн төсөв дотроо зохицуулах шаардлагууд гарч ирж байна.
“Авдрын ёроолыг ухвал атга гурил гарна, савны ёроолыг ухвал шанага гурил гарна” гээд үзье гэж бодож байна. Хамгийн эхэнд энэ жил эхэлж буй цэцэрлэг, сургууль гээд газаргүй байгаа хөрөнгө оруулалтуудаа бид зогсоож байна. Эндээс 100 орчим тэрбум төгрөгийн эх үүсвэр гарч ирж байна.
Мөн зарим шаардлагагүй, үр дүн муутай байгаа хөрнгө оруулалтуудыг царцаая гэж бодож байна. Ямар ч байсан аргална гэж хэлсэн шиг төсөв дотроо зохицуулалт хийж болно гэж үзэж байна” гэв.
Мөн тэрбээр өнөөдрийн байдлаар нэмэгдэлийн дагуу багш нар гар дээрээ хэдэн төгрөгийн алин авах вэ гэсэн асуултад “Хуучин багш нарын үндсэн цалин 1,480,000 төгрөг байсан. Одоо шинэ нэмэгдлээр багш нарын үндсэн цалин ойролцоогоор 2,450.000 төгрөг болно. Түүн дээр бүх нэмэгдлүүд нэмэгдэнэ гэсэн үг” гэж хариуллаа.
