Завхан аймгийн Дөрвөлжин сумын нутаг дахь Хомын талын байгалийн цогцолборт газарт өсгөн үржүүлж буй тахийн сүрэгт энэ жилийн анхны унага мэндэлсэн талаар орон нутгийн эх сурвалж мэдээлэв.
Энэхүү унага нь дөрөвдүгээр сарын 20-ны өдөр “Сарны гэрэл” нэртэй азарганы сүрэг дэх “Сайга” гүүнээс төрсөн эр унага аж.
Өнгөрсөн 2025 онд мөн адил “Сарны гэрэл” сүргээс тухайн жилийн анхны унага төрж, “Moonrider” нэртэй бүртгэгдэж байжээ.
Хомын тал нь Монгол Улсад тахийг зэрлэг байгальд сэргээн нутагшуулж буй гурван гол бүс нутгийн нэг бөгөөд 2004 оноос Франц улстай хамтран уг ажлыг хэрэгжүүлж буй юм.
Одоогийн байдлаар тус цогцолбор газарт 150 гаруй тахь нутагшиж байгаа аж. Тэдгээр нь бүгд нэртэй, мөн байршил болон сүргийн хөдөлгөөнийг байгаль хамгаалагчид, судлаачид тогтмол бүртгэн хянаж буй юм байна.
Тахийг сэргээн нутагшуулах, хамгаалах ажил ихээхэн хэмжээний хөрөнгө шаарддаг тул жил бүрийн хавар төрсөн унагануудаас сонгон нэр өгүүлэх замаар олон нийтийн оролцоог нэмэгдүүлэх “унага үрчлүүлэх” хөтөлбөр хэрэгжүүлж байгаа аж.
Хомын талын байгалийн цогцолборт газрын захиргааны дарга Ц.Мөнхбатын мэдээлснээр, уг хөтөлбөрт оролцогчид тодорхой хэмжээний мөнгөн хандив өргөж, унаганд нэр өгөх боломжтой бөгөөд тухайн унага нь дэлхийн тахийн удам зүйн мэдээллийн санд бүртгэгдэж, хувийн дугаартай болдог байна.
Мөн хандивлагчдад сертификат олгож, жилд хоёр удаа унаганы талаарх мэдээллийг хүргэдэг ажээ.
