Германы Батлан хамгаалахын сайд Борис Писториус дөрөвдүгээр сарын 22-ны лхагва гарагт Берлин хотод аюулгүй байдлын нөхцөл байдал өөрчлөгдсөнтэй холбоотойгоор улсынхаа цэргийн хамгаалалтын иж бүрэн шинэ концепцийг танилцуулжээ.
Энэхүү баримт бичигт ХБНГУ-ын түүхэнд анх удаа боловсруулсан цэргийн стратеги болон зэвсэгт хүчний бүтэц, бүрэлдэхүүнийг тодорхойлсон хөгжлийн төлөвлөгөө багтсан байна. Гэвч эдгээр баримтын дэлгэрэнгүй мэдээллийг нууцалжээ.
Писториус Владимир Путины удирдлага доорх Оросоос үүдэх аюулын талаар анхааруулжээ. Тэрбээр “Орос улс дахин зэвсэглэж, НАТО-тай цэргийн сөргөлдөөнд бэлтгэж байна. Мөн өөрийн ашиг сонирхлыг урагшлуулахын тулд цэргийн хүч хэрэглэхийг хууль ёсны хэрэгсэл гэж үзэж байна” хэмээн мэдэгдсэн байна.
Танилцуулсан концепцийн дагуу Германы дор хаяж 460 мянган цэрэг холбоотнуудын хамт Оросын боломжит түрэмгийллийг эсэргүүцэн зогсох чадвартай байх ёстой гэж үзжээ.
“Орос халдлагад бэлтгэж байна”
Цэргийн стратегийн гол сэдэв нь Оросоос ирэх аюулыг сөрөх явдал аж. Баримт бичигт “Москва НАТО-гийн орнууд руу цэргийн довтолгоо хийх нөхцөлийг бүрдүүлж буй бөгөөд хэдийнэ гибрид ажиллагаа явуулж байна” гэж дурджээ.
Писториус “Орос улс Барууныг үндсэн дайсан гэж үзэж, НАТО-гийн эв нэгдлийг задлах, АНУ-ыг Европоос холдуулах, улмаар НАТО-г сулруулах, өөрийн нөлөөллийн хүрээг тэлэхийг зорьж байна” гэж онцолсон байна.
Түүний хэлснээр тагнуул, хорлон сүйтгэх ажиллагаа, кибер халдлага, худал мэдээлэл тараах зэрэг нь хааяа тохиолддог зүйл биш, байнга тулгардаг аюул болсон. Тиймээс үүнтэй тэмцэх нь тасралтгүй хийх ёстой ажил болжээ.
Ирээдүйн арми
Писториус “Бид бундесверийг Европ дахь хамгийн хүчирхэг уламжлалт армийн нэг болгоно. Богино хугацаанд хамгаалах чадвараа нэмэгдүүлж, дунд хугацаанд чадавхаа эрс өсгөж, урт хугацаанд технологийн давуу байдлыг хангана” гэж мэдэгджээ.
Стратегийн зохиогчдын үзэж байгаагаар, мэдээллийн давуу байдал, системийн тогтвортой байдал, сүлжээний уялдаа нь ирээдүйн дайны үр дүнг тодорхойлох аж. Өгөгдөл өөрөө зэвсэг болж, хиймэл оюун ухаан хүний боломжийг өргөжүүлнэ.
Бундесвер мэдээллийн давуу байдлыг гартаа авч, дайснаа энэ давуу байдлаас салгах ёстой бөгөөд үүнд сансар болон кибер орчин дахь довтлох, хамгаалах чадавхаа нэмэгдүүлэх багтах аж.
Ирээдүйн дайн нь өнгөрсөн ба ирээдүйн хэрэгслүүдийг хослуулан явагдана гэж үзжээ. Өндөр технологи (квант тооцоолол, робот техник) болон хямд өртөгтэй дронууд зэрэгцэн ашиглах аж.
Тиймээс өндөр технологийн зэвсгийг олноор хэрэглэх хямд системийн эсрэг дэмий зарцуулахгүйн тулд стратегид хоёр төрлийн технологийг хослуулахыг тусгасан байна.
Дайны хил хязгаар бүдгэрч байна
Стратегийн зохиогчдын үзэж байгаагаар улс, эдийн засаг, иргэд бүгд дайсны бай болж, Германы нийгэм бүхэлдээ эрсдэлд орох аж.
Тэд “Дайсан фронт ба ар тал, иргэн ба цэргийн, дотоод ба гадаад аюулгүй байдлын ялгааг зориудаар бүдгэрүүлнэ” гэж үзэж буй юм байна. Үүний хариуд бундесвер төрийн бүх хэрэгсэлтэй уялдан ажиллах боловч зөвхөн цэргийн гүйцэтгэж чадах үүрэгт төвлөрөх нь.
Мөн холын зайн нарийвчлалтай зэвсэг ихсэх нь аюулыг нэмэгдүүлж, “аюулгүй ар тал” гэх ойлголт бараг үгүй болно гэж дурджээ. Иймээс бундесвер холын тусгалтай өндөр нарийвчлалтай зэвсгийг нэмэгдүүлж, олон давхаргат агаарын довтолгооноос хамгаалах системийг хөгжүүлэх шаардлагатай гэж үзсэн байна.
АНУ ба цөмийн тогтоон барих бодлого
АНУ улс төрийн болон цэргийн чадавхаараа НАТО-д зайлшгүй чухал хэвээр буй. Гэсэн ч бундесвер холбоотны хүрээнд илүү их үүрэг хариуцлага хүлээх ёстой гэж стратегид онцолжээ.
Герман улс НАТО-гийн цөмийн тогтоон барих бодлогод “цөмийн оролцоо”-ны хүрээнд үргэлжлүүлэн хувь нэмэр оруулна.
Нөөц хүчийг зэвсэгт хүчний салшгүй хэсэг гэж үзэж, идэвхгүй нэгжүүдийг ч бүрэн тоноглохоор төлөвлөжээ. Талбарын нөөцийн цэргүүд (байлдааны нэгжийг орлох зориулалттай) хамгийн багадаа хувийн хувцас, албаны зэвсгээр хангагдах аж.
Эх сурвалж: DW
