Алтны үнэ сүүлийн өдрүүдэд огцом хэлбэлзэж, зах зээлд тодорхойгүй байдал нэмэгдэж байна. Дөрөвдүгээр сарын 13-наас хойш анх удаа алтны фьючерсийн үнэ унц нь 4,700 ам.доллараас доошилсон нь хөрөнгө оруулагчдын анхаарлыг татав.
2026 оны зургадугаар сард нийлүүлэх алтны фьючерс COMEX бирж дээр буурч, нэг трой унц нь 4,700 ам.долларын босгоос доош орсон байна.
Москвагийн цагаар 22:42 цагийн байдлаар үнэ 2.77 хувиар унаж, 4,695.1 ам.долларт хүрсэн бол 22:49 цагт 4,699.7 ам.долларын түвшинд (-2.26%) хэлбэлзэж байжээ.
Үүнтэй зэрэгцэн тавдугаар сард нийлүүлэх мөнгөний фьючерс мөн сулрал үзүүлж, нэг трой унц нь 75.895 ам.доллар болж 4.44 хувиар буурсан байна.
Сүүлийн үед дэлхийн зах зээл дээр алтны үнэ өндөр түвшинд хүрч, зарим үед түүхэн дээд үзүүлэлтэд ойртсон ч ийнхүү богино хугацаанд огцом “засвар” (correction) хийж эхэлсэн нь анхаарал татаж байна.
Шинжээчдийн үзэж буйгаар, үүнд хэд хэдэн хүчин зүйл нөлөөлж байгаа аж.
Нэгдүгээрт, АНУ-ын мөнгөний бодлого болон ам.долларын ханшийн хэлбэлзэл алтны үнэд шууд нөлөөлж буй юм байна. Ам.доллар чангарсан үед алтны үнэ буурах хандлагатай байдаг.
Хоёрдугаарт, геополитикийн нөхцөл байдал, ялангуяа АНУ, Ираны хоорондын хурцадмал байдал тодорхой хэмжээнд намжиж буй нь “аюулгүй хөрөнгө” болох алтны эрэлтийг сулруулж байгаа аж.
Мөн зарим олон улсын хэвлэлүүдэд мэдээлснээр, томоохон хөрөнгө оруулагчид ашигтай үедээ ашиг (profit-taking) хийж эхэлсэн нь үнийн бууралтыг түргэсгэсэн байна.
Түүнчлэн төв банкуудын алт худалдан авалт өмнөх саруудтай харьцуулахад бага зэрэг саарсан нь зах зээлд нөлөөлж буй нэг хүчин зүйл болжээ.
Гэсэн хэдий ч урт хугацаанд алтны үнэ өндөр түвшинд хадгалагдах магадлал хэвээр байгааг шинжээчид онцолж байна.
Дэлхийн эдийн засгийн тодорхойгүй байдал, инфляцын дарамт, геополитикийн эрсдэлүүд бүрэн арилаагүй нөхцөлд алт нь “аюулгүй хөрөнгө” хэвээр байх төлөвтэй.
Иймд богино хугацаанд хэлбэлзэл үргэлжлэх ч алтны зах зээл дунд болон урт хугацаанд тогтвортой, сонирхол татсан хөрөнгө хэвээр үлдэнэ гэж шинжээчид үзэж байна.
Эх сурвалж: TASS, COMEX, TRADING DATA
