БОУАӨЯ-наас өнгөрсөн даваа гарагт түр зогсоогоод байсан Туулын хурдны замын бүтээн байгуулалтыг эхлүүлэх зөвшөөрөл өгсөн.
Үүний дараа Ардчилсан намаас “Туулын хурдны зам”-ын ажлыг бүрмөсөн зогсоож, хууль зөрчсөн албан тушаалтнуудад хариуцлага тооцохыг Ерөнхий сайдаас шаардсан. Үүнтэй холбоотойгоор хотын дарга Х.Нямбаатар дараах байр суурийг илэрхийлэв.
Тэрбээр “Нам дамнасан, асар их санхүүжилт, эрх мэдэлтэй, сошиалыг бүхэлд нь худалдаж авсан бүлэглэлтэй тэмцэж, их бүтээн байгуулалтуудыг урагшлуулах гэж зүтгэж байгаагаа эрхэм Улаанбаатар хотын иргэддээ сонордуулж байна.
Туулын замын Байгаль орчны нарийвчилсан үнэлгээ өнгөрсөн жил бүх мэргэжлийн байгууллагуудаар батлагдсан. Гүйцэтгэгчийг сонгон шалгаруулах нээлттэй тендер гурван удаа зарлагдаж, хамгийн их санал авсан, туршлагатай гүйцэтгэгчийг хуульд нийцүүлж сонгон шалгаруулсан болно.
Гүйцэтгэгчид хуульд нийцүүлж банк, даатгалын баталгааг үндэслэж урьдчилгаа төлбөр өгсөн. Цаашид гүйцэтгэлээр санхүүжилтийг шуурхай олгож байж төсөл хугацаандаа орно.
Ардчилсан нам зогсооё гэдэг сөрөг хүчний увайгүй шаардлага тавьж, ард иргэдээ боддоггүй хийрхсэн улс төр хийж байна. Ямар ч ШУ-ы үндэслэлгүй муйхар шаардлага.
АН-ын 2024 оны УИХ-ын сонгуулийн мөрийн хөтөлбөрт Туулын зам гэж дурьдсан атлаа увайгүй улс төр хийж байна. Манай намын зарим бүлэглэл “Туул тавигдвал Нямбаатарын улс төрийн карьер дийлдэхгүй” гэсэн айдсууд нийлээд асар их хөрөнгө хүч хаяж, хөлсний жагсагчид, сошиал багуудыг ажиллуулж байна.
Надад та бүгдийн бодож байгаа шиг элдэв амбиц алга гэдгээ атаархагчид, сөрөг хүчиндээ илэрхийлье. Надад ганцхан амбиц байна. Тэр нь Улаанбаатарыг түгжрэлгүй, утаагүй болгох юм.
Яг нэг жилийн өмнөх технологиор үр хүүхэд рүү минь хүртэл дайрч давшилж эхэлж байна. Эрх мэдэл, хөрөнгөө хамгаалахаар яасан их улайрч байна аа, та нар. Улсын хөгжил, ард түмний эрх ашгаа бага атугай бодооч ээ, бүлэглэлүүд, МАНАН-ууд аа.
Миний бие улаанбаатарчуудад амалсан түгжрэл бууруулах зорилгоосоо нэг ч алхам ухрахгүй ээ” гэв.
