Кремль ОХУ-ын Ерөнхийлөгч Владимир Путины Хятад улсад хийх айлчлалын бэлтгэл ажлыг хангаж байгаа талаар Оросын төрийн тэргүүний хэвлэлийн төлөөлөгч Дмитрий Песков сэтгүүлчдэд мэдээлжээ.
Түүнээс Оросын удирдагчийг тавдугаар сард БНХАУ-д айлчлах боломжтой тухай мэдээллийг тодруулахад Кремлийн төлөөлөгч “Хятад Улсад хийх айлчлалд бэлтгэж байна. Хугацааг нь цаг тухайд нь зарлана” гэж хэлснийг “Ведомости” иш татсан байна.
Сануулахад, хоёрдугаар сарын 4-нд ОХУ-ын Ерөнхийлөгчийн туслах Юрий Пронин мэдээлэхдээ, БНХАУ-ын дарга Ши Жиньпин 2026 онд Хятад улсад албан ёсны айлчлал хийхийг Владимир Путинд санал болгосон гэж мэдэгджээ. Төрийн тэргүүнүүд видео хурал хийж ярилцсан бөгөөд Путин Ши Жиньпиний урилгыг талархан хүлээн авсан аж.
Лавров: Путин 2026 оны эхний хагаст багтан БНХАУ-д айлчилна
ОХУ-ын Гадаад хэргийн сайд Сергей Лавров дөрөвдүгээр сарын 14-нд Бээжин хотод хоёр өдрийн айлчлалаар хүрэлцэн ирж, БНХАУ-ын Гадаад хэргийн сайд Ван И-тай хэлэлцээ хийжээ. Хятадын Гадаад хэргийн яамнаас мэдээлснээр, талууд Путины болон Ши Жиньпиний уулзалтад бэлтгэх асуудлын талаар мөн хэлэлцсэн байна.
ОХУ-ын Гадаад хэргийн сайд Сергей Лавров “ОХУ-ын Ерөнхийлөгч Владимир Путин 2026 оны эхний хагаст багтан БНХАУ-д айлчилна” гэж мэдэгджээ. Одоогийн байдлаар уг айлчлалын хөтөлбөрийг тохиролцож буй талаар тэр лхагва гарагт буюу дөрөвдүгээр сарын 15-нд Бээжин хотод болсон хэвлэлийн бага хурлын үеэр онцолсон байна.
Харин Кремлийн хэвлэлийн төлөөлөгч Дмитрий Песков ОХУ-ын Ерөнхийлөгч Владимир Путин БНХАУ-д хийх айлчлалын үеэр АНУ-ын Ерөнхийлөгч Дональд Трамптай уулзах талаар Москва одоогийн байдлаар ямар нэг төлөвлөгөө гаргаагүй байгааг мэдэгджээ.
ОХУ Хятад дахь эрчим хүчний хомсдолыг нөхөхөд бэлэн
Мөн Лавров Бээжин хотод “Ираны дайны нөхцөл байдал болон Ормузын хоолойн тээвэрлэлтийн хүндрэлээс шалтгаалан Хятадад үүссэн эрчим хүчний хомсдолыг Орос улс нөхөхөд бэлэн” гэж мэдэгдсэн байна.
Тэр “Орос улс Хятад болон бусад хамтран ажиллах сонирхолтой улс орнуудад үүссэн нөөцийн дутагдлыг тэгш эрх, харилцан ашигтай нөхцөлөөр нөхөх бүрэн боломжтой” гэж хэлжээ.
Түүний хэлснээр, Москва болон Бээжин энэ чиглэлд шаардлагатай бүх боломж, нөөц хүчин чадлыг бүрдүүлсэн байна.
Мөн сайдын хэлснээр, Орос, Хятад хоёр улс Ираны асуудлаарх хэлэлцээг үргэлжлүүлэхийг дэмжиж буй бөгөөд энх тайвныг бий болгох үйл явцад хувь нэмэр оруулахад бэлэн байгаа аж.
Лавров “Бид БНХАУ-тай хамтран, эдгээр хэлэлцээг үргэлжлүүлэх ёстой гэж үзэж байна. Талууд бодитой, шударга зорилтуудыг урагшлуулах ёстой” гэж онцолсон байна.
Орос, Хятадын “бат бөх” харилцаа
Лавров хоёр өдрийн айлчлалын хүрээнд БНХАУ-ын дарга Ши Жиньпинтэй уулзсан байна. Тэрбээр “Хоёр улсын харилцаа “ямар ч шуургыг сөрөн тэсвэрлэх бат бөх” шинжтэй” гэж тодорхойлжээ.
Мөн Москва, Бээжингийн харилцаа олон улсын харилцаанд тогтворжуулах үүрэг гүйцэтгэж буй бөгөөд “дэлхийн олонх” гэгдэх, тогтворгүй байдал хүсдэггүй улс орнуудад улам чухал болж буйг онцолсон байна.
Дональд Трамп өмнө нь Иран дахь дайны улмаас 3-4 дүгээр сард хийхээр төлөвлөж байсан Хятадын айлчлалаа хойшлуулж, сар хагас сунгасан талаар мэдээлжээ.
Эх сурвалж: AIF
