Ардчилсан намын гишүүд өнөөдөр /2026.04.30/ тус намын Ерөнхий нарийн бичгийн даргаар С.Баярцогтыг томилохыг эсэргүүцэж, Ардчилсан намын дарга О.Цогтгэрэлд гишүүд нь шаардлага хүргүүлэв.
Тус шаардлагад “Ардчилсан намын дарга О.Цогтгэрэл танаа. Өнөөдөр Монгол Улсын ард иргэд, Ардчилсан намын мянга мянган гишүүд танаас ёс зүйн хариуцлага, алсын хараатай шийдвэрийг нэхэж байна.
Судалгаагаар 2027 оны Ерөнхийлөгчийн сонгууль, 2028 оны УИХ болон орон нутгийн сонгуульд сүүлийн 10 гаруй жилийн хугацаанд төрийн эрхийг барьж, улс орон, нутгийг туйлдуулсан МАН-ын засаглал нуран унах нь тодорхой болсон.
Гэвч энэ түүхэн боломжийг Ардчилсан нам ашиглах уу эсвэл МАН-ын гар хөл болж задрах уу гэдэг таны гаргах шийдвэрээс хамаарна.
Учир нь 2026 оны тавдугаар сарын 6-ны Ардчилсан намын Үндэсний бодлогын хорооны хуралдаанаар С.Баярцогтыг Ерөнхий нарийн бичгийн даргаар томилуулах санал оруулж ирэх гэж буй нь МАН-ын захиалгат улс төрийн амиа хорлолт хийж байгаагаас өөрцгүй үйлдэл юм.
С.Баярцогт Оюутолгойн гэрээгээр Монгол Улсын байгалийн баялгийг 3.5 сая иргэний ирээдүйтэй хамт худалдсан. Түүний алдааны золиосонд монголчууд бид өдөр бүр 14.6 тэрбум төгрөгийн зээлийн хүүг төлж, эх орноо өрийн ангал руу түлхсэн.
Мөн С.Баярцогт нь албан тушаалаа урвуулан ашигласан, мөнгө угаасан гэмт хэрэгт холбогдож, гурван шатны шүүхээр тогтоогдсон. Түүнийг намын гал тогоонд суулгах нь Ардчилсан намын нүүрэн дээр авлигын тамга дарахтай ижил утгатай.
Иймд дараах шаардлагыг гаргаж байна. С.Баярцогтыг нэн даруй татан авах. Хоёрт, намын шинэ залуу үе болсон нэр цэвэр, чадварлаг залуу улстөрчийг Ерөнхий нарийн бичгийн даргад нэр дэвшүүлж, намын шинэчлэлийг бодитоор эхлүүлэх.
Энэ бол зөвхөн нэг албан тушаалын асуудал биш. Авлигачдын орогнох байр болж мөхөх үү гэсэн Ардчилсан намын түүхэн зааг юм.
Хэрэв та гишүүдийнхээ энэхүү санаачилгыг үл тоомсорлож, МАН-ын зохиолтой тоглоомыг үргэлжлүүлвэл бид таныг С.Баярцогтын хамтаар огцруулах, намаас цэвэрлэх хатуу тэмцлийг цаг алдалгүй эхлүүлж, улс төрийн бүх үйл ажиллагааг эхлүүлнэ гэдгийг хатуу мэдэгдье” гэжээ.
