Японы Ерөнхий сайд Санаэ Такаичи Японы уламжлалт “омотэнаши” буюу зочломтгой байдлын үзэл баримтлалыг өөрийн арга барилаар сонгож, гадаадын удирдагчидтай илүү ойр, хувийн харилцаа тогтоохыг зорьж буй бөгөөд албан тушаалдаа орсноос хойш зургаан сарын хугацаанд түүний дипломат чадварыг бодитоор сорьж байгаа аж.
Японы анхны эмэгтэй Ерөнхий сайд болох Такаичи албан тушаалд очихоосоо өмнө дипломат туршлагаар төдийлөн танигдаагүй байсан ч дээд хэмжээний уулзалтуудын үеэр зугаа, соёлын элементүүд оруулж, мөн хувийн бэлэг сэлт ашиглан, гадаад түншүүдийнхээ итгэлийг олж авахыг хичээх болжээ.
Хамгийн сүүлд тэрбээр Францын Ерөнхийлөгч Эммануэль Макронтой хамтарсан хэвлэлийн хурал хийх үеэрээ Японы алдарт “Dragon Ball” мангагаас гаралтай “Камеһамеһа” хөдөлгөөнийг үзүүлсэн байна. Макрон уг цувралын шүтэн бишрэгч гэдгээрээ алдартай аж.
Макрон инээмсэглэн хариу өгсөн нь Ойрхи Дорнодын нөхцөл байдал зэрэг ноцтой асуудлуудыг хэлэлцсэний дараах уулзалтын үеэр илүү тайван уур амьсгал бүрдүүлжээ.
Түүнийг дипломат хэв маяг бүхий илэрхий хөдөлгөөнтэй, хөгжим ашиглан гадаадын удирдагчидтай харилцаа тогтоох онцлогтой гэж тодорхойлж буй юм байна.
Тэрбээр аравдугаар сард Ерөнхий сайд болсныхоо дараахан Токио хотын ойролцоох Ёкосука дахь АНУ-ын Тэнгисийн цэргийн баазад АНУ-ын Ерөнхийлөгч Дональд Трамптай хамт цөмийн хөдөлгүүрт нисэх онгоцны тээвэрлэгч хөлөг онгоцонд гарч, цэргийн алба хаагчдын өмнө гар өргөн мэндчилж, хоёр улсын холбоотны хүчийг харуулжээ.
Мөн нэгдүгээр сард Такаичи Итали Улсын Ерөнхий сайд Жоржиа Мелонид итали хэлээр “Happy Birthday” дууг дуулж өгч, охинд нь зориулан Sanrio-ийн дүрс бүхий бэлгийн багц гардуулсан байна.
Хөгжим тоглох нь Япон болон Өмнөд Солонгосын хоорондын харилцааг зөөлрүүлэх дохио болсон бөгөөд хоёр улсын харилцаа дайны үеийн түүхээс шалтгаалан удаан хугацаанд хурцадмал байсан билээ.
Бөмбөр тоглох чадвартай Такаичи Өмнөд Солонгосын Ерөнхийлөгч Ли Жэ Мёнтой хамт гэнэт хөгжмийн хамтлагтай тоглолт хийж, BTS хамтлагийн “Dynamite” болон “Golden” зэрэг дууг хамтран тогложээ.
Гуравдугаар сард тэрбээр Сингапурын Ерөнхий сайд Лоуренс Вонгт бэлэг гардуулахдаа Эрик Клэптоны “Layla” дууг дуулжээ. Энэ нь гитар тоглодог Вонгтой уран сайхны холбоо үүсгэсэн үйл явдал болсон байна.
Канадын Ерөнхий сайд Марк Карнид хоккейн цохиур бэлэглэсэн бол Их Британийн Ерөнхий сайд Кир Стармерт мууртай бэлэг гардуулжээ.
Такаичитай ойр эх сурвалж “Тэр гадаадын удирдагчидтай харилцаа тогтоохдоо сайн бөгөөд тэдэнтэй ойр холбоо үүсгэж чаддаг. Энэ нь дипломат ажиллагаанд эерэг үр дүн авчирна гэж бид найдаж байна” гэж хэлсэн байна.
Гэсэн хэдий ч түүний бүх улс төрийн харилцаа амжилттай явагдаагүй бөгөөд Хятадын Ерөнхийлөгч Ши Жиньпинтэй харилцах харилцааг зохицуулахад хүндрэлтэй байгаа аж.
Тэрбээр арваннэгдүгээр сард Тайванийн асуудлаар хийсэн мэдэгдлийн улмаас Хятад улс Японтой харилцах байр сууриа чангатгаж, хоёр хөршийн харилцаа хөрсөн талаар мэдээлжээ.
Эх сурвалж: JAPAN TIMES
