Монголын Ардчилсан Холбооны анхны Ерөнхий зохицуулагч, төр нийгмийн нэрт зүтгэлтэн С.Зориг агсны хөшөөнд Ардчилсан намын төлөөлөл цэцэг өргөж, хүндэтгэл үзүүллээ.
Ёслолын дараа Ардчилсан намын Ерөнхий нарийн бичгийн дарга С.Баярцогт сэтгүүлчдийн асуултад хариулахдаа С.Зориг агсны хувь хүний зан чанар, үзэл санаа, залууст үлдээсэн нөлөөний талаар дурсамж хуваалцав.
Тэрбээр “С.Зориг бол тухайн үеийн залуучуудын жинхэнэ үлгэр дуурайл байсан хүн. Бидний харилцаа их дотно, онцгой байлаа. Тэр намайг нэрээр дуудахгүй, ‘кохай’ гэж дууддаг байсан. Энэ нь япон хэлээр ‘доод ангийн дүү’ гэсэн утгатай. Харин өөрийгөө ‘сэнсэй, сэнпай’ гэж дуудаж байгаарай гэдэг байсан” хэмээн дурсан ярьсан юм.
Мөн С.Баярцогт “Төрийн ордны коридорт тааралдах бүрдээ ‘Юу байна, кохай’ гэж энгийн, дотно мэндэлдэг байсан. Маш их авьяастай, өргөн мэдлэгтэй, байнга уншиж судалдаг, үзэл бодлоо тодорхой илэрхийлж чаддаг хүн байсан” хэмээн онцоллоо.
Тэр оюутан ахуйн дурсамжаасаа хуваалцахдаа “Бид хамтдаа сагсан бөмбөг их тоглодог байлаа. Тэр үед заалны нэг талаас нөгөө тал хүртэл гар дээрээ алхдаг байсныг нь одоо ч тод санадаг. Мөн хамт байхдаа хүмүүсийн нэрийг орос хэл рүү орчуулж дууддаг, их хөгжилтэй, бүтээлч нэгэн байсан. Түүнд тухайн үед зургийн аппарат байсан бөгөөд бидний залуу үеийн олон дурсамжийг тэр л хадгалж үлдээсэн байдаг” гэв.
С.Зориг агсны амь насыг хөнөөсөн хэргийн талаар тэрбээр байр сууриа илэрхийлэхдээ “Энэ хүний үхлээр улс төр хийдэг явдал Монголын улс төрийн хамгийн эмгэнэлтэй үзэгдлийн нэг болсон. 2000 оноос хойш 2024 он хүртэл энэ хэргээс улбаалж сонгуулийн улс төр хийж ирсэн нь эцсийн дүндээ нийт монголчуудын хувьд хожигдол болсон гэж харж байна” хэмээн онцоллоо.
Мөн тэрээр “Хэрэг гарснаас хойш олон жил өнгөрч, ажлын хэсгүүд удаа дараа солигдсон нь хэргийн ул мөр бүдгэрэхэд нөлөөлсөн байхыг үгүйсгэхгүй. Гэсэн хэдий ч орчин үеийн техник, технологи хөгжсөн энэ цаг үед олон жилийн өмнөх хэргүүдийг ч илрүүлэх боломж нэмэгдэж байна. Тиймээс уг хэрэг удахгүй үнэн зөвөөр шийдэгдэнэ гэдэгт итгэлтэй байна” гэсэн юм.
