Дональд Трампын засаг захиргаа өрсөлдөгч орнуудтай бодит дайн, харин холбоотнуудтайгаа худалдааны дайн өрнүүлж буй энэ үед америкчууд АНУ-ын хамгийн том өрсөлдөгч болох Хятад улсын талаарх байр сууриа илүү эерэг болгон өөрчилж байгааг шинэ судалгаа харуулжээ.
Энэ нь хэдхэн жилийн өмнөх нөхцөл байдлаас эрс ялгаатай аж. COVID-19 цар тахлын үеэр АНУ-д Хятадыг үзэн ядах хандлага болон ази гаралтай хүмүүсийн эсрэг гэмт хэрэг огцом өссөн.
Pew Research Center-ийн мэдээлэлд “Трампын анхны бүрэн эрхийн хугацаанд эхэлсэн худалдааны зөрчил хоёр улсын харилцааг улам хурцатгаж, 2023 он гэхэд америкчуудын ердөө 14 хувь нь Хятадын талаар эерэг үзэл бодолтой байсан” гэж дурджээ.
Өдгөө энэ үзүүлэлт бараг хоёр дахин өсөж, 27 хувьд хүрсэн байна. Энэ нь ялангуяа Ардчилсан намын дэмжигчид болон залуучуудын дунд илүү тод ажиглагдаж буй аж.
Мөн энэ нь Барууны сошиал орчинд Хятадын соёл, энтертайнмент сонирхох хандлага нэмэгдэж байгаатай холбоотой гэж үзэж буй юм байна. Сүүлийн үед гарч буй “Chinamaxxing” (Хятадын амьдралын хэв маяг, соёл, дадлыг идэвхтэй дагаж, туршиж үзэх) зэрэг тренд үүний нэг жишээ ажээ.
Судалгаанд оролцогчдын дунд Хятадыг “дайсан” гэж үзэх хүмүүсийн тоо өмнөх оноос буурсан ч ихэнх америкчууд Хятадыг АНУ-ын гол өрсөлдөгч хэвээр гэж үзсээр буй юм байна.
Энэхүү судалгааг нэг болон гуравдугаар сард улс даяар 8500 гаруй насанд хүрэгчдийн дунд явуулжээ.
Үр дүнгээс харахад, Хятадын удирдагч Ши Жиньпинд хандах хандлага ч бага зэрэг зөөлөрсөн бол Трампын удирдлагад итгэх итгэл буурчээ.
Дэлхийн асуудлаар зөв шийдвэр гаргана гэдэгт Ши-д итгэх америкчуудын хувь 2023 онтой харьцуулахад хоёр дахин нэмэгдэж, 17 хувьд хүрсэн байна.
Харин Трамп Хятадтай холбоотой зөв бодлого явуулна гэдэгт итгэх хүмүүсийн тоо 39 хувь болж, өмнөх оноос 6 нэгж хувиар буурчээ.
Энэ бүхэн Трамп, Ши нар тавдугаар сард Бээжинд уулзахаар бэлтгэж буй цаг үетэй давхцаж буй. Мөн Хятад улс өөрийгөө дэлхийн тогтвортой, хариуцлагатай хүч гэж харуулахыг зорьж байгаа аж.
Энэ нь Трампын заримдаа таамаглахад бэрх гадаад бодлоготой (дэлхийн хэмжээнд өндөр татвар тогтоохоос эхлээд Ирантай холбоотой мөргөлдөөн хүртэл) зөрчилдөж байна.
Ши Жиньпин Испанийн Ерөнхий сайд Педро Санчестай уулзахдаа “Өнөөгийн дэлхийд эмх замбараагүй байдал гаарч, шударга ёс ба хүчний хоорондын сөргөлдөөнтэй тулгарч байна” гэж мэдэгджээ.
Мөн “Улс орнуудыг олон улсын хууль, дэг журмыг хэрхэн хүндэтгэж байгаагаар нь үнэт зүйл, хариуцлагын мэдрэмжийг нь харж болно” гэж онцолсон байна.
Зарим америкчууд ч иймэрхүү байр суурьтай байгаа нь судалгаанаас харагджээ. Судалгаанд оролцогчид Трампын Хятадын талаарх бодлого боловсруулах чадварыг Хойд Солонгос, Куба, Венесуэл зэрэг орнуудтай харилцах чадвартай нь ойролцоо үнэлсэн аж.
Зөвхөн АНУ-д биш, бусад орнуудад ч Хятадын талаарх хандлага өөрчлөгдөж буй юм байна. Жишээлбэл, Канадын иргэдийн Хятадын талаарх эерэг үзэл 2021 онтой харьцуулахад бараг гурав дахин өсчээ.
Мөн Зүүн Өмнөд Азид явуулсан судалгаагаар, хэрэв аль нэг талыг сонгох шаардлагатай бол судалгаанд оролцогчдын цөөнгүй нь Хятадыг АНУ-аас илүүд үзэх хандлагатай байсан аж.
Судалгаанаас харахад, улс төрийн болон насны ялгаа тодорхой ажиглагджээ. Хоёр намыг дэмжигчдийн хандлага Хятадын талаар илүү эерэг болж буй ч энэ өөрчлөлт Ардчилсан намынхны дунд илүү хүчтэй байгаа аж.
Харин Бүгд найрамдах намынхан Трампыг Хятадын асуудлаар зөв шийдвэр гаргана гэж илүү их итгэсээр байсан ч энэ итгэл нь мөн буурчээ.
Мөн үе хоорондын ялгаа их байгаа аж. 50-иас дээш насныхан Хятадыг дайсан гэж үзэх магадлал өндөр бол залуучууд илүү эерэг хандлагатай болжээ. Залуучууд Трампад ч бараг итгэхгүй байгаа аж.
Энэ өөрчлөлт сошиал орчинд тод харагдаж буй. “Chinamaxxing” гэх трендийн хүрээнд хүмүүс халуун ус, жимсний цай уух, уламжлалт дасгал хийх зэрэг Хятадын өдөр тутмын дадлыг туршиж, “хятад болох”-ыг оролдож байгаа аж.
Мөн Шанхайн загварын долоо хоногт танилцуулагдсан Adidas-ийн “Tang” хүрэм дэлхий даяар эрэлттэй болж, Хятадад үйлдвэрлэсэн Labubu нэртэй тоглоомон баримлууд олон улсад хит болж, тэрбум долларын зах зээл бий болгожээ.
Түүнчлэн Xiaohongshu (RedNote) гэх Хятадын сошиал платформд олон зуун мянган америк хэрэглэгч TikTok-ийг хориглож магадгүй гэсэн айдсаас болж нэгдсэн байна. Энэ нь хоёр орны хэрэглэгчид нэг платформ дээр үй олноороо анх удаа уулзаж, харилцах боломжийг бүрдүүлсэн явдал.
Гаднаас нь харахад, эдгээр нь түр зуурын интернэт тренд мэт санагдаж болох ч Хятадын соёл, бүтээгдэхүүнийг ийнхүү өргөнөөр хүлээн авч буй явдал нь хэдхэн жилийн өмнө төсөөлөхөд ч бэрх зүйл байв.
Эдгээр тренд, миймсийн цаана бодитой, нөлөө бүхий олон нийтийн санаа бодлын өөрчлөлт явагдаж буй бөгөөд энэ нь дэлхийн тавцанд өөрийн байр суурийг бэхжүүлэхийг зорьж буй Ши Жиньпинд давуу тал болох боломжтой ажээ.
Эх сурвалж: CNN
