Чингэлтэй дүүргийн 1 дүгээр хороо, 23 дугаар сургуулийн орчимд 2026 оны дөрөвдүгээр сарын 18-наас 19-нд шилжих шөнийн 01:56 цагийн орчимд “Согтууруулах ундаа хэрэглэсэн иргэд амгалан тайван байдал алдагдуулж байна” гэх дуудлага цагдаагийн байгууллагад бүртгэгдсэн байна.
Чингэлтэй дүүргийн Цагдаагийн газрын дарга Т.Баатарын мэдээлснээр, дуудлагын дагуу алба хаагчдыг очиход дөрвөн иргэн хоорондоо маргалдаж, нэг иргэн нь газарт унасан байдалтай байсан тул нөхцөл байдлыг намжаах зорилгоор хууль ёсны шаардлага тавьжээ.
Гэвч тухайн иргэд цагдаагийн алба хаагч болон дуудлага өгсөн иргэний шаардлагыг үл биелүүлж, удаа дараа эсэргүүцсэн байна.
Цагдаагийн алба хаагч зөрчил гаргаж буй үйлдлийг таслан зогсоох шаардлагыг нийт таван удаа тавьсан боловч биелүүлээгүй бөгөөд нэмэлт эргүүл ирэх үед алба хаагчийн биед халдсан байна.
Иймд Цагдаагийн албаны тухай хуулийн 51.4 дүгээр зүйлд заасны дагуу алба хаагч өөрийгөө хамгаалах зорилгоор нэг удаа резинэн сумтай буу хэрэглэсэн байна.
Улмаар тухайн иргэнд яаралтай түргэн тусламжийн 103 үйлчилгээ үзүүлж, холбогдох арга хэмжээг авчээ. Одоогийн байдлаар уг асуудлыг Зөрчлийн тухай хуульд заасны дагуу шалгаж байгаа аж.
Мөн цагдаагийн алба хаагчийн хувцас хэрэгслийг гэмтээж, нүүрэн хэсэгт нь шарх учруулсан иргэдэд “Төрийн албан хаагчийн биед халдсан, хүч хэрэглэсэн” гэх үндэслэлээр эрүүгийн хэрэг үүсгэн шалгах ажиллагааг эхлүүлжээ.
Харин холбогдох иргэн одоогийн байдлаар гомдол гаргаагүй бөгөөд цагдаагийн байгууллага мэдүүлэг авах, нөхцөл байдлыг тодруулах чиглэлээр үргэлжлүүлэн ажиллаж буй юм байна.
