МУГЖ, Зууны манлай дуучин Б.Сарантуяагийн “Урлагт 40 жил – Хайрын бурхан” ойн тоглолтын хэвлэлийн бага хурал боллоо.
Хэвлэлийн хурлын эхэнд МУГЖ, Зууны манлай дуучин Б.Сарантуяа өөрийн урлагийн замнал, дурсамж, сэтгэлийн үгээсээ хуваалцсан юм.
Тэрбээр “Өнөөдөр миний хувьд маш онцгой өдөр тохиож байна. 1970 оны дөрөвдүгээр сарын 20-нд Батмөнх, Паня хэмээх залуу хосын хоёр дахь охин болон мэндэлж байсан тэр мөчөөс хойш миний амьдрал урлагтай салшгүй холбогдсон.
Өдгөө урлагийн замнал маань 40 жилийн босгон дээр ирээд байна. Энэ өдөр хэвлэлийн бага хурлаа хийж байгаадаа туйлын их баяртай байна” гэв.
Тэрбээр мөн уран бүтээлийн хамтрагчдадаа талархал илэрхийлж, найруулагч МУГЖ С.Ононбатад онцгойлон талархаж буйгаа дурдав.
С.Ононбат найруулагч өмнө нь “Хайрын бурхан” тоглолтын 10 жилийн болон урлагт 30 жилийн ойн тоглолтуудыг амжилттай найруулж байжээ.
Энэ удаад ч 40 жилийн ойн тоглолтыг гардан найруулж буй нь уран бүтээлчдийн хамтын ажиллагааны үргэлжлэл болж буйг онцоллоо.
Мөн Tribes Entertainment-ийн ерөнхий найруулагч Даваасүрэн (Халзаа)-д талархал илэрхийлэв. Түүний хэлснээр, 1990 онд Төв цэнгэлдэх хүрээлэнд “Хөх тэнгэр” хамтлагтайгаа анхны амьд тоглолтоо хийснээс хойш бие даасан томоохон тоглолт хийгээгүй аж.
Энэ удаагийн 40 жилийн ойн тоглолтыг цэнгэлдэх хүрээлэнд хийх санаачилгыг гурван жилийн өмнөөс эхлэн ярилцаж, бэлтгэжээ.
Тэрбээр “The Hu” хамтлаг, “Зуны зугаа” зэрэг томоохон тоглолтуудыг амжилттай зохион байгуулж байсан туршлагатай багтай хамтран ажиллаж буй нь өөрт нь ихээхэн урам өгч байгааг онцолж, саналыг баяртайгаар хүлээн авснаа хэлэв.
Мөн тайзны алтан партнёр, ая зохиогч Б.Ангирмаа хүрэлцэн ирсэнд талархал илэрхийлээд, “Гэрийн даалгавраа маш сайн хийсэн сурагч шиг догдолж сууна” хэмээн сэтгэл хөдлөлөө илэрхийлсэн нь хурлын уур амьсгалыг илүү халуун дулаан болгосон юм.
Тэрбээр 40 жилийн турш эгшиглүүлсэн шилдэг дуунуудаа үзэгчдэдээ дахин хүргэх гэж буйдаа сэтгэл хангалуун байгаагаа онцолж, тоглолтод зориулсан бэлтгэл ажил эрчимтэй үргэлжилж байгаа талаар дурдав.
Харин тоглолтын найруулагч, МУГЗ С.Ононбат хэлэхдээ “Мөнгөн харандаа”-наас эхлээд олон уран бүтээл дээр хамтран ажилласан дурсамж арвин байна. Ойн тоглолтууд, анхны клипүүд гээд дурсах зүйл их.
Харин супер хит дуунууд олонтой уран бүтээлчтэй ажиллахад хамгийн том сорилт нь дууг сонголтоор хасах асуудал байдаг.
Гэсэн ч үзэгчдийн хайртай дуунууд, амьдралд нь тод мөр үлдээсэн бүтээлүүд нэг дор цуглаж, үнэхээр сэтгэл хөдөлгөм тоглолт болно гэдэгт итгэлтэй байна” гэв.
Тэрбээр мөн үзэгчдийг зургадугаар сарын 6-нд болох тоглолтод хүрэлцэн ирэхийг урилаа.
