Цагаан ордон НАТО-гийн холбоотнуудыг “сайн” ба “муу” гэж ангилсан жагсаалт гаргасан нь АНУ-ын Ерөнхийлөгч Дональд Трампын засаг захиргаа Ираны эсрэг явуулж буй цэргийн кампанит ажлыг дэмжихээс татгалзсан орнуудыг хэрхэн шийтгэх арга зам хайж байгаатай холбоотой аж.
Энэ талаар дөрөвдүгээр сарын 22-ны лхагва гарагт “Politico” Европын гурван дипломатч болон Пентагоны төлөөлөгчийн мэдээлэлд тулгуурлан мэдээлжээ.
Сэтгүүлчид сануулахдаа, ийм санааг 2025 оны арванхоёрдугаар сард АНУ-ын Батлан хамгаалахын сайд Пит Хегсет дэвшүүлж байсан гэжээ.
Тэрбээр Рональд Рейганы сангаас зохион байгуулсан Үндэсний батлан хамгаалахын форум дээр хэлэхдээ “Идэвхтэй оролцож буй үлгэр жишээ холбоотнууд болох Израиль, Өмнөд Солонгос, Польш, улам бүр Германи, Балтын орнууд болон бусад нь биднээс онцгой дэмжлэг хүртэнэ.
Харин хамтын батлан хамгаалах үүргээ биелүүлэхгүй байгаа холбоотнууд үр дагавартай тулгарна” гэж мэдэгдсэн байна.
Politico-д ярилцлага өгсөн нэг дипломатчийн хэлснээр, гаргасан жагсаалтууд нь “хэн сайн холбоотон, хэн муу холбоотон бэ” гэдгийг ялгаж, түүнд нь тохируулж хандах бодлогын илэрхийлэл байж магадгүй аж.
“Сайн” ба “муу” холбоотнуудад үзүүлэх урамшуулал, шийтгэл
АНУ-ын “муу” болон “сайн” холбоотнуудад ямар тодорхой ашиг, алдагдал оногдох нь одоогоор тодорхойгүй байгаа юм байна.
Politico “Муу холбоотнуудыг шийтгэх талаар тэдэнд яг тодорхой төлөвлөгөө бараг байхгүй бололтой” хэмээн өөр нэг Европын албан тушаалтны үгийг иш татжээ.
Тэр “Америкийн цэргийг Европоос шилжүүлэх нь нэг хувилбар байж болох ч үүнээс хамгийн их хохирох нь АНУ өөрсдөө биш гэж үү?” гэж хэлсэн байна.
Politico-гийн онцолсноор, цэргийн хүчийг шилжүүлэх нь өөрөө өндөр зардалтай, цаг хугацаа шаардсан ажиллагаа аж. Дарамт шахалтын бусад хэрэгсэлд хамтарсан сургуулилалт, эсвэл зэвсгийн худалдааг ашиглаж магадгүй юм байна.
Ийм бодлогын гол ашиг хүртэгчид нь Польш, Румын байж болзошгүй гэж үзжээ. Польш нь НАТО-д батлан хамгаалахын зардлаараа дээгүүрт ордог төдийгүй нутагтаа байрласан 10 мянга орчим америк цэргийн зардлын ихэнхийг хариуцдаг.
Харин Румын улс саяхан агаарын баазаа өргөтгөж, АНУ-д Иранд цэргийн ажиллагаа явуулахад ашиглуулах зөвшөөрөл өгсөн байна. Мөн Болгар улс Ойрхи Дорнод дахь Америкийн логистикийг чимээгүй дэмжиж ирсэн гэж нийтлэлд дурджээ.
The Telegraph: Трамп НАТО-гийн зарим орны санал өгөх эрхийг хязгаарлахыг хүсэж магадгүй
Британийн The Telegraph сонин гуравдугаар сарын 27-нд мэдээлэхдээ, Дональд Трамп НАТО-гийн батлан хамгаалахын зардлыг ДНБ-ий 5 хувьд хүргээгүй гишүүн орнуудын санал өгөх эрхийг хасах боломжийг судалж байгаа гэжээ.
Сэтгүүлчдийн мэдээлснээр, Европ дахь холбоотнууд нь Ормузын хоолойг нээхэд туслахаар усан онгоц илгээхээс татгалзсаны дараа тэр ийм хувилбарыг судалж эхэлсэн байна.
АНУ-ын засаг захиргааны нэг эх сурвалжийн хэлснээр, Европын орнуудын үйлдэл (ялангуяа хүссэн дэмжлэгийг үзүүлээгүй нь) АНУ-д үнэхээр сэтгэл дундуур, урам хугарах мэдрэмж төрүүлсэн байна.
Тэр “5 хувийг зарцуулдаггүй улс орнууд НАТО-гийн ирээдүйн зардлын талаар шийдвэр гаргахад санал өгөх эрхгүй байх ёстой” гэж нэмж хэлжээ.
Трамп дөрөвдүгээр сарын 8-нд НАТО-гийн ерөнхий нарийн бичгийн дарга Марк Рюттетэй уулзсаны дараа дахин холбоотнуудаа Ираны эсрэг дайнд хангалттай дэмжлэг үзүүлэхгүй байна гэж буруутгаж, мөн Гренландын асуудлыг дахин хөндсөн байна.
Тэр өөрийн Truth Social сүлжээнд том үсгээр “Бидэнд хэрэгтэй үед НАТО байгаагүй, дахин хэрэгтэй үед ч байхгүй” гэж бичиж, холбоотнуудаа “муу удирдлагатай том мөсөн хэсэг” хэмээн нэрлэсэн Гренландыг санахыг зөвлөжээ.
Эх сурвалж: DW
