Венесуэлийн Ерөнхийлөгч Николас Мадурог баривчилсан ажиллагаанд оролцсон АНУ-ын тусгай хүчний цэрэг уг ажиллагаанд бооцоо тавьж, 400 мянган ам.долларын ашиг олсон байж болзошгүй хэргээр баривчлагдаж, яллагдагчаар татагджээ.
Пүрэв гарагт нийтэд ил болгосон яллах дүгнэлтэд дурдсанаар, ахлах түрүүч Гэннон Кен Ван Дайк арванхоёрдугаар сарын сүүлээр Polymarket хэмээх хамгийн нэр хүндтэй таамаглалын зах зээлийн нэг дээр данс нээсэн байна.
Тэрбээр Мадуро нэгдүгээр сар гэхэд “эрх мэдлээс зайлуулагдана” гэж ойролцоогоор 32,000 долларын бооцоо тавьжээ. Энэ нь маш бага магадлалтай бооцоо байсан аж.
Гэвч прокуроруудын үзэж байгаагаар, Ван Дайк “Operation Absolute Resolve” нэртэй ажиллагааны төлөвлөлт, хэрэгжилтэд оролцож байсан бөгөөд бооцоо тавихаасаа өмнө нууц мэдээлэлд нэвтрэх боломжтой байжээ.
Түүний нэр ил болоогүй байсан ч их хэмжээний хожил нь хууль сахиулагчдын анхаарлыг даруй татсан байна.
Форт Брэггт байрласан идэвхтэй албаны цэрэг Ван Дайк нь төрийн нууц мэдээллийг хулгайлах, буруугаар ашиглах, мөн луйвар зэрэг нийт таван зүйл ангиар яллагдаж буй аж.
Анхны шүүх хурал нь Хойд Каролина мужид болох бөгөөд одоогийн байдлаар түүний өмгөөлөгч бүртгүүлээгүй байгаа юм байна.
Тэрбээр арванхоёрдугаар сарын 27-ноос нэгдүгээр сарын 2-ны хооронд нийт 13 удаа бооцоо тавьжээ. Сүүлийн бооцоогоо баривчлах ажиллагаа эхлэхээс хэдхэн цагийн өмнө тавьсан байна.
Прокуроруудын мэдээлснээр, Ван Дайк олсон 400 мянга гаруй ам.доллараа эхлээд гадаад дахь криптовалютын “хадгаламж” руу шилжүүлж, дараа нь онлайн брокерын дансанд байршуулсан байна.
АНУ-ын армийн ахлах түрүүч нь ахлах ахлагчдын бүрэлдэхүүнд багтдаг, тактикийн чухал удирдагч, техникийн мэргэжилтэн бөгөөд ихэвчлэн батальоны түвшинд гол үүрэг гүйцэтгэдэг. Тэд бага цолтой цэргүүдэд үлгэр жишээ болох ёстой хүмүүс аж.
Нью-Йоркийн өмнөд тойргийн прокурор Жэй Клэйтон “Манай улсын нууцыг хамгаалах үүрэг хүлээсэн хүмүүс түүнийг хамгаалах ёстойгоос бус хувийн ашиг хонжоо олох хэрэгсэл болгох ёсгүй” гэж мэдэгдсэн байна.
Шүүхийн баримтад дурдсанаар, Ван Дайк ажиллагааны дараа болон сүүлчийн бооцоогоо тавьсан үеэр далайд байгаа хөлөг онгоцны тавцан дээр, АНУ-ын цэргийн хувцастай, буу барьсан, өөр гурван цэрэгтэй хамт зогсож буй байдалтай зурагт буусан байна.
Прокуроруудын мэдээлснээр, тэрбээр 400 мянга гаруй ам.долларын ашиг олжээ. Уг мөнгийг эхлээд гадаад дахь криптовалютын данс руу шилжүүлж, дараа нь гарал үүслийг нь нуух зорилгоор онлайн брокерын дансанд байршуулсан аж.
Мөн Commodity Futures Trading Commission тус хэрэгтэй холбоотой иргэний нэхэмжлэл гаргаж, хохирол барагдуулах, хууль бус орлогыг буцаан авах, мөнгөн торгууль ногдуулахыг шаардсан байна.
Өнгөрсөн сард CNN энэ бооцоотой холбоотой хэргийг холбооны прокурорууд шалгаж байгаа талаар мэдээлж байв. Манхэттэн дэх прокурорын газрын Үнэт цаас, түүхий эдийн луйврын хэлтсийн дарга нар мөн Polymarket-ийн төлөөлөгчидтэй уулзжээ.
Бооцоонууд тавигдсаны дараа АНУ-ын цэргийнхэн нууц ажиллагаа явуулж, Каракасын ерөнхийлөгчийн ордноос Мадурог шөнийн ажиллагаагаар, ширүүн буудалцааны дунд баривчилсан байна.
Түүнийг Нью-Йорк руу шилжүүлэн авчирч, хар тамхины наймаатай холбоотой холбооны хэргээр яллагдагчаар татсан ч тэрбээр буруугүйгээ илэрхийлжээ.
Polymarket X платформ дээр “Төрийн нууц мэдээлэл ашиглан арилжаа хийж буй хэрэглэгчийг илрүүлмэгц бид Хууль зүйн яаманд мэдэгдэж, мөрдөн шалгалтад хамтран ажилласан. Инсайдер (нууц мэдээлэлд нэвтрэх эрхтэй хүн)-д манай платформд зай байхгүй” гэж мэдэгдсэн байна.
Таамаглалын зах зээлд шүүмжлэл нэмэгдэж байна
Сүүлийн жилд таамаглалын зах зээл эрс өсөж, хэрэглэгчид долоо хоног бүр хэдэн тэрбум доллар зарцуулдаг болжээ.
АНУ-ын Конгресст энэ төрлийн зах зээлийг илүү хатуу зохицуулах 10 гаруй хуулийн төсөл өргөн баригдсан бөгөөд зарим нь төрийн албан тушаалтнуудын инсайдер (дотоод мэдээлэл ашигласан) арилжаанд оногдуулах шийтгэлийг чангатгах зорилготой аж.
Ерөнхийлөгч Дональд Трамп пүрэв гарагт геополитикийн үйл явдалд бооцоо тавих хандлага нэмэгдэж байгаад санаа зовж буйгаа илэрхийлжээ. Тэрбээр энэ хэргийг бейсболын домогт тоглогч Пит Роуз өөрийн баг дээр бооцоо тавьсантай зүйрлэжээ.
Тэр “Энэ бол Пит Роуз өөрийн баг дээр бооцоо тавьж байсантай адил” гэж хэлсэн байна.
Мөн Трамп ийм төрлийн бооцоо дэлхий даяар өргөн тархаж байгааг онцлоод, “Дэлхий бүхэлдээ нэг төрлийн казино шиг болж байна” гэжээ.
Өнгөрсөн жил Трампын засаг захиргаа Polymarket (таамаглалын зах зээл)-ийг АНУ-ын хэрэглэгчдэд үйлчилгээ үзүүлэхийг зөвшөөрсөн ч одоогийн байдлаар бүрэн ажиллаж эхлээгүй байгаа аж.
Харин Мадуротой холбоотой бооцоонууд олон улсын сайтад явагдсан нь АНУ-ын хууль, зохицуулалтын хүрээнээс гадуур болсон байна..
Мэргэжилтнүүдийн хэлснээр, америкчууд VPN ашиглан ийм сайтуудад хялбархан нэвтрэх боломжтой аж.
Таамаглалын зах зээлд “инсайдерууд”-ын үүргийн талаар маргаан өрнөж буй бөгөөд зарим нь ийм зах зээлийг дотоод мэдээллийг олон нийтэд илүү хурдан хүргэх хэрэгсэл гэж үздэг байна.
Гэвч Polymarket гуравдугаар сард шинэ журам гаргаж, нууцлах үүрэгтэй мэдээлэл дээр үндэслэсэн арилжаа, мөн ийм мэдээлэл дамжуулсан этгээдээс авсан зөвлөгөөн дээр үндэслэсэн арилжааг хоригложээ.
Мөн үйл явдлын үр дүнд нөлөөлөх боломжтой албан тушаалтан, эрх мэдэл бүхий хүмүүс тухайн зах зээлд оролцохыг хориглосон байна.
Эх сурвалж: CNN
