ChatGPT-гийн “Хиймэл оюун ухаан (AI)-тай холбоотой хамгийн аймшигтай зүйл юу вэ?” гэсэн асуултад өгсөн хариулт олон хүний анхаарлыг татаж, багагүй түгшүүр төрүүлжээ.
Дэлхий даяар AI-ийн хэрэглээ эрчимтэй нэмэгдэж буй. Энэхүү технологийг олон салбарт хүний ажлыг хөнгөвчлөх, дэмжих зорилгоор өргөн ашиглаж байгаа билээ.
Гэсэн хэдий ч хиймэл оюун ухаан уламжлалт ажлын байруудыг орлох вий гэсэн болгоомжлол үргэлжилж, зарим мэргэжилтнүүд AI-д амархан орлуулах боломжгүй ажлын төрлүүдийг хүртэл онцолсон байна.
AI-ийн “хамгийн аймшигтай зүйл” юу вэ гэсэн асуултад ChatGPT хариулахдаа “AI-ийн хамгийн аймшигтай зүйл нь ганц том, тодорхой сүйрэл биш, харин нэгэн зэрэг үүсдэг олон жижиг, далд эрсдэлүүд юм” хэмээн онцолжээ.
Тэрбээр мөн “AI системүүд маш нарийн төвөгтэй тул тэдгээрийг бүтээсэн хүмүүс хүртэл шийдвэр гаргалтынх нь логикийг бүрэн ойлгохгүй байх тохиолдол бий. Энэ нь эрүүл мэнд, санхүү, батлан хамгаалах зэрэг өндөр эрсдэлтэй салбаруудад ноцтой алдаа гарсан ч хожуу илрэх аюултай” гэж анхааруулжээ.
Мэдээллийн буруу хэрэглээ ба аюул
AI нь текст, зураг, дуу хоолой зэрэг контентыг маш бодит мэт “итгэл төрүүлэхүйц” байдлаар үүсгэх чадвартай тул худал мэдээлэл тархах эрсдэлийг нэмэгдүүлдэг гэж онцолсон байна.
Мөн хиймэл оюун ухаанд хүний адил ёс суртахууны ухамсар байхгүй, зөвхөн өгсөн зааврыг биелүүлдэг тул
- илүү нарийн зохион байгуулалттай залилан
- кибер халдлагыг автоматжуулах
- хор хөнөөлтэй контентыг их хэмжээгээр үйлдвэрлэх зэрэг эрсдэлийг нэмэгдүүлж болзошгүй гэж тайлбарлажээ.
Эдийн засаг, нийгмийн эрсдэл
ChatGPT мөн дараах эрсдэлийг дурдсан байна. Үүнд: AI нь нийгэм, ажиллах хүчийг дасан зохицохоос илүү хурдан өөрчилж, эсвэл орлох боломжтой. Үүний хамгийн том асуудал нь зөвхөн ажлын байр алдагдах биш, харин ашиг орлого цөөн хүмүүсийн гарт төвлөрч, тэгш бус байдал нэмэгдэх аж.
Мөн AI нь хүний бүтээсэн өгөгдлөөс суралцдаг тул тухайн өгөгдөлд агуулагдах хүний өрөөсгөл хандлагыг (bias) давтах эрсдэлтэйг онцолжээ.
Түүнчлэн AI нь ажилд авах, зээл олгох, хууль сахиулах зэрэг шийдвэрүүдэд шударга бус үр дүн үүсгэж болох бөгөөд үүнийг илрүүлэхэд маш хэцүү байдаг аж.
Ирээдүйн эрсдэл: хэт найдах байдал
ChatGPT мөн хүмүүс ирээдүйд AI-д хэт их итгэж, шүүмжлэлгүй дагах эрсдэлтэйг анхааруулжээ. Тодруулбал, “Хэрэв бид AI-г асуултгүйгээр дагавал түүний гаргасан алдаа аажмаар шийдвэр, систем, итгэл үнэмшилд шингэж, тархах аюултай” юм байна.
Мэргэжилтний байр суурь
Trevor Houston хэлэхдээ “AI ирэх гэж байгаа зүйл биш, хэдийнэ ирчихсэн. Энэ онд AI давтагддаг, процесс дээр суурилсан олон ажлыг хэдийнэ орлож эхэлсэн” хэмээн онцолсон байна. Үүнд:
- харилцагчийн үйлчилгээ
- захиргааны туслах ажил
- маркетингийн зарим чиглэл
- санхүүгийн зарим ажил зэрэг багтаж буй бөгөөд “урьдчилан тодорхой процесс бүхий салбаруудад” AI маш хурдан нэвтэрч байгаа ажээ.
Эх сурвалж: UNILAD
