ОХУ-ын Ерөнхийлөгчийн хэвлэлийн төлөөлөгч Дмитрий Песковын хэлснээр, Орос ба Украины хоорондох газар нутгийн зөрчил Донецк мужийн Москвагийн хяналтад хараахан ороогүй ойролцоогоор 17-18 хувийн нутаг дэвсгэрт төвлөрч байгаа аж.
Тэрбээр энэ талаар дөрөвдүгээр сарын 12-ны ням гарагт АНУ-ын дэд ерөнхийлөгч Жей Ди Вэнсийн “хэдхэн квадрат километр” гэсэн мэдэгдэлд тайлбар хийхдээ хэлжээ. Мөн Оросын цэргүүд урагшилсаар байгаа гэж нэмж дурдсан байна.
ОХУ-ын Ерөнхийлөгч Владимир Путины гуравдугаар сард өгсөн мэдээллээр, Киевийн хяналтад Донецкийн өөрийгөө тунхагласан “ард түмний бүгд найрамдах улс”-ын нутаг дэвсгэрийн 15-17 хувь үлдсэн байсан бол хагас жилийн өмнө энэ нь ойролцоогоор 25 хувь байсан аж.
Оросын Зэвсэгт хүчний жанжин штабын дарга Валерий Герасимов 2025 оны наймдугаар сард тус бүсийн 79 хувийг Оросын тал хяналтдаа авсан гэж мэдэгдэж байжээ. Харин Путины гуравдугаар сарын мэдэгдлээр энэ үзүүлэлт 70 хувь байсан аж.
Оросын тавьж буй нөхцөл
ОХУ энхийн хэлэлцээр байгуулахад бэлэн гэдгээ удаа дараа илэрхийлж ирсэн бөгөөд үүнийг Донецк, Луганск, Херсон, Запорожье мужуудаас Украины цэргүүдийг бүрэн гаргахтай холбон тавьж буй аж. Москва эдгээр бүс нутгийг 2022 оны “референдум”-ын үр дүнд өөрийн нутагт тооцдог болсон.
Песковын хэлснээр, Украинд тогтвортой энх тайван тогтоохын тулд Оросын ашиг сонирхлыг хангаж, тавьсан зорилгуудыг биелүүлэх шаардлагатай аж.
Тэрбээр мөн “Украины Ерөнхийлөгч Владимир Зеленский зориг гарган хариуцлага хүлээж чадахгүй байгаа цагт” Оросын Украин дахь дайн үргэлжилнэ гэж онцолжээ.
Харин Зеленский газар нутгийн буулт хийх асуудлыг хэлэлцэх боломжгүй гэж өмнө нь мэдэгдэж байв. Түүний хэлснээр, Донбассыг Орост шилжүүлэх тухай “ямар ч яриа байж болохгүй”, учир нь энэ нь Украинд стратегийн эрсдэл дагуулах аж.
Буданов: Дайн удахгүй дуусна
Украины Ерөнхийлөгчийн тамгын газрын дарга Кирилл Буданов дөрөвдүгээр сарын 10-нд Bloomberg агентлагт ярилцлага өгөхдөө хоёр тал хоёулаа дайныг дуусгах хүсэлтэй байгааг хэлжээ.
Тэр “Бүгд энэ дайн дуусах ёстойг ойлгож байгаа учраас хэлэлцээ хийж байна. Энэ удаан үргэлжлэхгүй гэж бодож байна” гэж хэлсэн байна.
Будановын үзэж буйгаар талууд аажмаар “хэт туйлширсан” байр сууриасаа ухарч, харилцан тохиролцоонд ойртож байгаа ажээ. Гэхдээ тэр Донбассын асуудлыг хэрхэн шийдэх талаар тодорхой тайлбар өгөхөөс татгалзсан байна.
Түүнчлэн тэрбээр дайныг дуусгахад нөлөөлж буй нэг хүчин зүйл нь санхүүгийн дарамт болохыг дурдаад, Орос улс дайны зардлыг өөрийн хөрөнгөөр санхүүжүүлж буй бөгөөд энэ нь хэдийнэ “их наяд”-аар хэмжигдэх болсон талаар хэлжээ.
Эх сурвалж: DW
