ХБНГУ-ын канцлер Фридрих Мерц Орос улс Украинд халдан довтолсны дөрөв дэх жилийн ойгоор европчуудыг дахин эв нэгдэлтэй байхыг уриаллаа.
Мерц хоёрдугаар сарын 24-ний мягмар гарагт X платформ дээрээ “Дөрвөн жилийн турш өдөр бүр, шөнө бүр украинчуудын хувьд хар дарсан зүүд байсаар ирлээ. Энэ нь зөвхөн тэдний асуудал биш, харин бид бүгдийнх.
Учир нь, дайн Европт эргэн ирлээ. Зөвхөн хамтын хүчээр л бид үүнийг зогсоож чадна. Украины хувь заяа бол бидний хувь заяа юм” хэмээн бичжээ.
Украины Ерөнхийлөгч Владимир Зеленский улс орон нь тусгаар тогтнолоо хамгаалж чадсан бөгөөд газрын зураг дээрх нэр төдий зүйл биш гэдгийг онцолсон байна.
Тэрбээр дайн эхэлсний дөрөв дэх жилийн ойгоор ард түмэндээ хандан хийсэн телевизийн мэдэгдэлдээ “Оросын ерөнхийлөгч Владимир Путин зорилгодоо хүрээгүй” гэж мэдэгджээ.
Зеленский “Тэр украинчуудыг сөхрүүлж чадсангүй. Энэ дайнд ялалт байгуулж чадаагүй. Бид Украиныг авч үлдсэн. Бид энх тайванд хүрэхийн төлөө, шударга ёс тогтохын төлөө бүхнийг хийнэ” гэж хэлсэн байна.
Владимир Зеленскийн ард түмэндээ хандсан үг
Тэр “Өнөөдөр Путин Киевийг гуравхан хоногт эзэлнэ гэж хэлснээс хойш яг дөрвөн жил өнгөрлөө. Энэ үг өөрөө бидний эсэргүүцэл, Украин улс энэ бүх хугацаанд хэрхэн тэмцэж ирснийг маш сайн илэрхийлж байна.
Эдгээр үгийн цаана манай ард түмний сая сая хүний амьдрал, асар их эр зориг, туйлын хүнд хөдөлмөр, тэсвэр хатуужил, хоёрдугаар сарын 24-нөөс хойш туулсан урт зам бий” гэж хэлжээ.
Украины удирдагч өөрийн болон бусад олон зуун хүний хамт байрлаж байсан бункерийн урт хонгил, өрөөнүүдийг үзүүлж, тэнд “цэргийнхэнтэй өдөр тутмын зөвлөгөөн, утасны дуудлагууд, шийдэл хайх үйл явц тасралтгүй өрнөж байсан” хэмээн дурдсан байна.
Зеленский “Эдгээр бүх жилийн турш биднийг тогтоон барьж ирсэн хүч бол та нар – манай ард түмэн. Бидний эсэргүүцэл бол та нар юм. Украинчууд, украин бүсгүйчүүд, хэзээ ч бууж өгдөггүй хүн бүр.
Тусгаар тогтнолыг өөрийн мөрөн дээрээ үүрч яваа хүн бүрт би чин сэтгэлээсээ талархал илэрхийлье” гэж хэлжээ.
Тэрбээр мөн Оросын цэргүүд энгийн иргэд, иргэний байгууламжууд руу цохилт өгч байгааг хатуу шүүмжилж, “Жинхэнэ эрчүүд ингэж байлддаггүй” хэмээн онцолсон байна.
Эх сурвалж: DW
