АНУ-ын Ерөнхийлөгч Дональд Трампын засаг захиргаа Украинд үзүүлэх аюулгүй байдлын баталгаа нь Киев энхийн хэлэлцээрийг зөвшөөрөхөөс, тэр дундаа Донбассыг ОХУ-д шилжүүлэх заалт багтах магадлалтай хэлэлцээрийг хүлээн зөвшөөрөхөөс хамаарна гэдгийг ил тод бус байдлаар ойлгуулсан талаар “Financial Times” сонин нэгдүгээр сарын 27-нд найман эх сурвалжаас иш татан мэдээлэв.
Тэдгээр эх сурвалжийн хоёроос авсан мэдээллээр, хэрэв Украин дээрх нөхцөлийг хүлээн зөвшөөрвөл АНУ энхийн цаг үед дэмжлэг болгон нэмэлт зэвсэг нийлүүлэх амлалт өгсөн байна.
Украины Ерөнхийлөгч Владимир Зеленский энэ сард АНУ-тай аюулгүй байдлын баталгаа болон дайны дараах “хөгжлийн төлөвлөгөө”-ний баримт бичигт гарын үсэг зурна гэж найдаж байжээ. Учир нь, энэ нь Киевт Москватай хийх цаашдын хэлэлцээнд тодорхой хөшүүрэг болох байсан аж.
Тэрбээр Давост болсон уулзалтын үеэр Трамптай хэлэлцсэн аюулгүй байдлын баталгааны баримт бичиг “100 хувь бэлэн болсон” хэмээн мэдэгдэж байсан ч Вашингтон АНУ-ын аюулгүй байдлын үүрэг амлалт нь Орос, Украин хоёр энхийн тохиролцоонд хүрэх эсэхээс шууд хамаарна гэдгийг ойлгуулсан гэж FT дурджээ.
Украины нэгэн өндөр албан тушаалтан “АНУ бодит, тодорхой үүрэг хүлээх эсэх нь тодорхойгүй хэвээр байна. Аюулгүй байдлын баталгаанд гарын үсэг зурах шатанд хүрэх бүрд тэд ухардаг” хэмээн ярьсан байна. Түүний хэлснээр, Украин нутаг дэвсгэрийн тодорхой хэсгээс татгалзахаасаа өмнө баталгаатай амлалт авахыг хүсэж буй аж.
Цагаан ордон: Энэ мэдээлэл бодит байдалтай нийцэхгүй
Цагаан ордны орлогч хэвлэлийн төлөөлөгч Анна Келли FT-ийн нийтлэлд дурдсан мэдээллийг эрс няцаав.
Тэрбээр “Энэ бол огтхон ч бодит байдалд нийцэхгүй. АНУ-ын энхийн үйл явц дахь цорын ганц үүрэг бол талуудыг хэлэлцээний ширээний ард суулгаж, тохиролцоонд хүргэхэд оршиж байна” хэмээн мэдэгдсэн байна.
Мөн тэрбээр “Financial Times энхийн үйл явцыг тасалдуулах зорилготой, нэрээ нууцалсан эх сурвалжаар худал мэдээлэл тараах боломж олгож буй нь харамсалтай. Энхийн үйл явц өнгөрсөн амралтын өдрүүдэд Абу-Дабид болсон түүхэн гурван талт уулзалтын дараа маш сайн шатандаа явж байна” гэж нэмж хэлжээ.
АНУ-ын байр суурийг мэдэх өөр нэг эх сурвалж мөн “Вашингтон Украинд ямар нэгэн нутаг дэвсгэрийн буулт тулгахыг оролдож байгаагүй” хэмээн онцолсон байна. Түүний хэлснээр, АНУ зөвхөн аюулгүй байдлын баталгаа нь энхийн тохиролцоонд хүрэхтэй холбоотойг мэдэгдсэн бөгөөд энхийн хэлэлцээрийн агуулгыг Орос, Украин хоёр өөрсдөө тодорхойлох ёстой аж.
Украин: Донбасс Оросын довтолгооны тулгуур цэг болно
Украины Ерөнхийлөгчийн Тамгын газар энэ асуудлаар албан ёсны тайлбар өгөхөөс татгалзжээ. Харин Киевийн нэгэн өндөр албан тушаалтан АНУ аюулгүй байдлын баталгааг ашиглан Украинд тодорхой буулт хийх шахалт үзүүлж, ингэснээр Оросыг хэлэлцээний ширээнд суулгахыг зорьж байж болзошгүй гэж үзэж буйгаа илэрхийлсэн байна.
Үүний зэрэгцээ Украины зарим албан тушаалтан, цэргийн шинжээчид хэрэв Донбасс Оросын мэдэлд шилжвэл, энэ нь Украин руу цааш давших стратегийн плацдарм буюу түшиц газар болно хэмээн анхааруулжээ.
Абу-Дабид болсон гурван талт хэлэлцээ
АНУ, Украин, Оросын төлөөлөгчид нэгдүгээр сарын 23, 24-нд Абу-Дабид хоёр өдрийн турш хаалттай хэлэлцээ хийжээ. Украины төлөөлөгчдийг Үндэсний аюулгүй байдал, батлан хамгаалах зөвлөлийн нарийн бичгийн дарга Рустем Умеров ахалсан бол Ерөнхийлөгчийн Тамгын газрын дарга Кирилл Буданов мөн оролцсон байна.
ОХУ-ыг Батлан хамгаалах яамны төлөөлөгчид, тэр дундаа Зэвсэгт хүчний Ерөнхий штабын Ерөнхий тагнуулын газрын дарга Игорь Костюков тэргүүлэн төлөөлжээ.
Энэхүү уулзалт нь дайны эхлэлээс хойш АНУ-ын санал болгож буй энхийн төлөвлөгөөний хүрээнд гурван тал анх удаа шууд хэлэлцээ хийсэн тохиолдол болсон байна. Хэлэлцээ эхлэхийн өмнө Москва Донецк мужийг бүхэлд нь, одоогоор Оросын хяналтад ороогүй бүс нутгийг ч оролцуулан, Украины армиас бүрэн чөлөөлөх шаардлагаа дахин нотолсон бол Украин үүнийг эрс эсэргүүцсээр байна.
Украины Ерөнхийлөгч Зеленскийн мэдэгдсэнээр, гурван талт хэлэлцээний дараагийн шат хоёрдугаар сарын 1-нд Абу-Дабид болох аж. Харин ОХУ-ын Ерөнхийлөгчийн хэвлэлийн төлөөлөгч Дмитрий Песков шинэ уулзалт энэ долоо хоногт болохыг баталсан ч тодорхой огноо зарлаагүй байна.
Эх сурвалж: DW
