Давос хотноо болсон Дэлхийн эдийн засгийн чуулганы үеэр АНУ Украин улсыг дайны дараа сэргээн босгох төлөвлөгөөнд гарын үсэг зурахаас татгалзсан шалтгааны нэг нь Москвагийн байр суурийг сонсох хүсэлтэй байсантай холбоотой гэж “Financial Times” сонин эх сурвалжаас иш татан мэдээлжээ.
Сонины сануулснаар, ОХУ-ын Ерөнхийлөгч Владимир Путин АНУ-ын Ерөнхийлөгч Дональд Трампаас илгээсэн тусгай элч Стивен Уиткофф, бизнесмен Жаред Кушнер нарыг хүлээн авч уулзах юм.
Эх сурвалжийн мэдээлснээр, Орос улс Европын удирдагчдын дэмжлэгтэйгээр АНУ, Украинтай хамтран боловсруулсан Украиныг зохицуулах төлөвлөгөөг хүлээн зөвшөөрөхөөс татгалзсан байна.
Мөн “Financial Times”-т онцолсноор, АНУ болон Европын орнуудын Гренланд болон Газын зурвасыг удирдах “Энх тайвны зөвлөл”-ийн асуудлаар гүнзгий зөрчилтэй байгаа нь Владимир Зеленскийн найдаж байсан 800 тэрбум доллароор сэргээн босгох төлөвлөгөөнд гарын үсэг зурахад саад болжээ.
Зеленский одоогийн байдлаар Давос руу явж байгаа бөгөөд чуулганы үеэр АНУ-ын Ерөнхийлөгч Дональд Трамптай уулзах юм гэж түүний зөвлөх мэдээлсэн байна. Энэ мэдээллийг Financial Times-ын эх сурвалжууд мөн баталжээ.
Давосын чуулганы үеэр Трамп мэдээлэл хийхдээ Зеленскийтэй уулзахаар хүлээж байгаагаа хэлсэн бөгөөд тухайн мөчид Зеленский Киев хотод байсан аж.
Эх сурвалж: RIA NOVOSTI
