Швейцарийн Давос хотноо болж буй Дэлхийн эдийн засгийн 56 дахь удаагийн чуулга уулзалтад Монгол Улсын Ерөнхий сайд, Шадар сайд, Сангийн сайд, Монголбанкны Ерөнхийлөгч нар оролцож, олон улсын томоохон хөрөнгө оруулагчид, санхүүгийн зах зээлийн тоглогчидтой уулзалт хийж байна.
Сангийн сайд Б.Жавхлангийн онцолсноор, Давосын форум дэлхийн улс төр, эдийн засаг, хөрөнгө оруулалтын шийдвэр гаргагчид нэг дор цуглардгаараа онцлог.
Монгол Улсын оролцоо сүүлийн жилүүдэд мэдэгдэхүйц идэвхжиж, одоо бид өөрсдөө уулзалт эрэлхийлэх бус, захиалгатай уулзалтуудад оролцох түвшинд хүрсэн байна.
Тэрбээр Ковидын дараах дэлхийн геополитик, эдийн засгийн нөхцөл байдал тодорхойгүй болсон энэ үед технологи, ялангуяа хиймэл оюун ухаанд суурилсан хөрөнгө оруулалтын урсгал эрчимтэй өсөж, дэлхийн хөрөнгө оруулалтын төв Ази руу шилжиж байгааг онцоллоо. Мөн Монгол Улс энэ өөрчлөлтөөс хоцрох бус, зэрэгцэн алхах шаардлагатайг тэмдэглэв.
Б.Жавхлан сайд “Форумын үеэр Монголын тал гадаадын банк, санхүүгийн байгууллагуудыг зах зээлдээ оруулж ирэх, өрсөлдөөнийг нэмэгдүүлэх бодлого баримталж буйгаа танилцууллаа.
Ялангуяа Зүүн Европ болон хөгжиж буй зах зээлд амжилттай ажиллаж буй банкуудтай идэвхтэй хэлэлцээ хийж байна. Өрсөлдөөн нэмэгдсэнээр хэрэглэгчдэд хямд, таатай нөхцөлтэй санхүүгийн бүтээгдэхүүн бий болно” гэж онцолсон юм.
Тэрбээр эдийн засгийн өсөлтийн талаар Монгол Улс газрын ховор элемент, уран зэрэг стратегийн нөөцтэй, шинэ технологид суурилсан хөрөнгө оруулалтын урсгалд чухал тоглогч болох бүрэн боломжтойг дурдав. Мөн нүүрсний салбарт гүн боловсруулалт хийх санал сонирхол олон улсын түвшинд нэмэгдэж буйг онцоллоо.
Сангийн сайд аялал жуулчлалын салбар Монгол Улсын хувьд асар их боломжтой бөгөөд байгалийн нөөцөөс гадна үйлчилгээ, дэд бүтцээ сайжруулж чадвал эдийн засгийн чухал тулгуур салбар болох бүрэн нөөцтэй гэж дүгнэв.
