Украины Ерөнхийлөгч Владимир Зеленский дөрөвдүгээр сарын 24-ний баасан гарагт Саудын Арабт угсаа залгамжлах хунтайж Мухаммед бен Сальман Аль Саудтай хэлэлцээ хийхээр хүрэлцэн очжээ.
Тэрбээр энэ айлчлалын зорилгоо өөрийн Telegram хуудсаар тайлбарлахдаа “Аюулгүй байдал, эрчим хүч, дэд бүтцийн салбарт Саудын Арабтай байгуулсан тохиролцоог хөгжүүлж байна” гэсэн байна.
Энэ нь Украины Ерөнхийлөгчийн сүүлийн хэдэн долоо хоногийн дотор Саудын Арабт хийж буй хоёр дахь айлчлал бөгөөд өмнөх уулзалт нь гуравдугаар сарын 26-нд болж байв. Тухайн уулзалтаар Киев болон Эр-Рияд хамгаалалтын салбарт хамтран ажиллахаар тохиролцжээ.
Зеленский “Хамтын ажиллагаа харилцан бэхжих нь чухал. Манай хоёр улсын хамтын ажиллагаа агуулгатай байгаад талархаж байна” гэж онцолсон байна.
Персийн булангийн орнуудтай дрон үйлдвэрлэлийн гэрээнүүд байгуулжээ
Тэрбээр өмнөх өдөр нь Украин улс Катар, Арабын Нэгдсэн Эмират болон Саудын Арабтай нисгэгчгүй нисэх төхөөрөмж (дрон) үйлдвэрлэх, дронын эсрэг систем хөгжүүлэх гэрээнүүд байгуулсан гэж мэдэгдсэн.
Эдгээр гэрээнүүд нь Украинд дотоодын болон төрийн хэвшлийн олон талт гэрээ хэлцлүүдээр хэрэгжих бөгөөд хамгаалалтын технологийн хамтын ажиллагааг өргөжүүлэх зорилготой гэж мэдээлжээ.
Украин улс ОХУ-ын бүрэн хэмжээний довтолгооны үеэр хуримтлуулсан дрон устгах туршлагаа ашиглан Персийн булангийн орнуудтай харилцаагаа бэхжүүлж байгаа аж.
Тухайлбал, Ираны дронуудын довтолгоог саармагжуулах туршлагаа хуваалцаж, бүс нутагт мэргэжилтнүүдээ илгээж туслалцаа үзүүлж буй юм байна.
Эх сурвалж: DW
