АНУ-ын Ерөнхийлөгч Дональд Трамп Цагаан ордны сэтгүүлчдийн холбооны жил бүрийн ёслолын оройн зоог дээр буугаар буудсан этгээдийн бичсэн “манифест” (үзэл бодол, зорилго, итгэл үнэмшил, эсвэл хийх гэж буй үйлдлээ ил тод тайлбарласан бичиг)-д Христийн шашны эсрэг агуулга байсан талаар мэдэгджээ.
Тэрбээр энэ тухай ням гарагт буюу дөрөвдүгээр сарын 26-нд Fox News сувгийн Fox News Sunday нэвтрүүлэгт оролцохдоо хэлсэн байна.
Трамп “Түүний манифестийг уншвал энэ хүн сэтгэцийн хувьд эрүүл бус байсан нь тодорхой харагдана” гэж онцолжээ.
Түүний хэлснээр, уг баримт бичиг нь шашинтай холбоотой бөгөөд “илт Христийн шашны эсрэг” шинжтэй байсан аж.
Цагаан ордны тэргүүн “Сэжигтэн ‘удаан хугацааны турш зүрх сэтгэлдээ хүчтэй үзэн ядалт’ тээж явсан” гэж нэмж хэлжээ.
АНУ-ын Ерөнхийлөгчийн үзэж буйгаар, сэжигтний гэр бүлийнхэн түүний асуудлыг мэдэж байсан аж. Тэд бүр хууль сахиулах байгууллагад хандсан байж магадгүй гэж мэдэгджээ.
Трамп “Магадгүй тэд илүү шийдэмгий байдлаар мэдээлэх хэрэгтэй байсан байх” гэж онцолсон байна.
Fox News-ийн мэдээлэл
Fox News-ийн “The Sunday Briefing” нэвтрүүлгийн хөтлөгч Жаклин Хайнрих X (хуучнаар Twitter)-д бичихдээ, сэжигтний манифестэд АНУ-ын засгийн газрын төлөөлөгчид рүү довтлох зорилго байсан тухай дурджээ.
Мөн түүний сошиал сүлжээн дэх хаягуудад Трампыг эсэргүүцсэн болон Христийн шашны эсрэг олон мэдэгдэл байсан гэж сэтгүүлч нэмж мэдээлсэн байна.
Хайнрихийн мэдээлснээр, сэжигтэн Коул Аллены ах Нью-Лондон (Коннектикут муж)-ы цагдаад, хэрэг гарахаас өмнө гэр бүлийн гишүүд рүү илгээсэн байж болзошгүй манифестийн талаар мэдэгджээ.
Secret Service болон Монтгомери тойргийн цагдаа нар түүний эгч Авриана Алленыг Мэрилэнд мужийн Роквилл дахь гэрт нь байцаасан байна.
Сэжигтэн Cap Tactical Firearms дэлгүүрээс хоёр гар буу болон нэг буу (дробовик) худалдан авч, эцэг эхийнхээ гэрт хадгалж байсан аж.
Мөн тэрбээр буу ашиглах дадлага хийх зорилгоор тогтмол буудлагын сургуулилалт хийдэг байжээ.
“The Wide Awakes” нэртэй залуучуудын бүлгийн гишүүн байсан бөгөөд Калифорнид Трампын засаг захиргааны эсрэг “No Kings” эсэргүүцлийн жагсаалд оролцсон” гэж сэтгүүлч мэдээлсэн байна.
Вашингтонд болсон буудалцаан
Вашингтон хотын Washington Hilton зочид буудалд дөрөвдүгээр сарын 25-ны орой Цагаан ордны сэтгүүлчдийн холбооны жил бүрийн ёслолын оройн зоог болж байх үеэр буудалцаан болсон. Уг арга хэмжээнд АНУ-ын Ерөнхийлөгч Дональд Трамп болон бусад өндөр албан тушаалтнууд оролцож байжээ.
Трамп болон засаг захиргааны гишүүдийг нүүлгэн шилжүүлсэн бөгөөд азаар хэн ч шархадсангүй. Сэжигтнийг баривчилсан бөгөөд арга хэмжээг хойшлуулсан байна.
Ёслолд Ерөнхийлөгчөөс гадна тэргүүн хатагтай Мелания Трамп, дэд ерөнхийлөгч Жеймс Дэвид Вэнс, Батлан хамгаалахын сайд Пит Хегсет, Төрийн нарийн бичгийн дарга Марко Рубио нар оролцжээ.
Эх сурвалж: DW
