ОХУ-ын Гадаад хэргийн сайд Сергей Лавров “Москва Украины асуудлыг зохицуулах хүрээнд Америкийн талтай харилцахад үргэлж нээлттэй байдаг” гэж мэдэгдэв.
Тэрбээр “Бид харилцахад үргэлж нээлттэй. Тэд манай байр суурийг мэдэж байгаа. Ялангуяа энэ байр суурийг Аляскад сонссон. Энэ нь тэдний саналд өгсөн бидний хариу байсан.
Хэлэлцээний багийнхан болох ноёд Стивен Уиткофф, Жаред Кушнер нар үүнийг лав мараагүй гэдэгт итгэлтэй байна” хэмээн “Вести” сувгийн сэтгүүлч Павел Зарубинд өгсөн ярилцлагадаа онцолжээ.
Тэрбээр өмнө нь Оросын олон нийтийн телевизэд өгсөн ярилцлагадаа “Европын холбоонд Украины асуудлыг зохицуулах хүрээнд Оросын “улаан шугам”-ыг тайлбарлах тухай ярих нь инээдтэй хэрэг. Учир нь, тэдгээрийг аль хэдийнэ тодорхой болгосон” гэж дурдсан байна.
Лавров Европын холбооны зарим төлөөлөгчид “ямар нэг шатанд, яг одоо биш ч хожим Оростой ярилцаж, түүний ‘улаан шугам’-ыг тодруулж, мөн өөрсдийнхийг харуулах хэрэгтэй болно” хэмээн мэдэгдэж байгаад анхаарал хандуулжээ.
Тэр “Энэ бол зүгээр л ноцтой зүйл бус” гэж онцлоод, “Тэд манай ‘улаан шугам’-ыг тодруулах хэрэгтэй гэж ярих нь инээдтэй. Эдгээр нь аль хэдийнэ тодорхой болсон” гэж хэлсэн байна.
“Дипломат шинжгүй, ил тод расизм”
ОХУ-ын Гадаад хэргийн сайдын хэлснээр, Европын холбооны ийм мэдэгдлүүд нь дипломат харилцаатай огт нийцэхгүй аж. Учир нь, дипломат харилцаа нь “зарчимч, зорилгын хувьд ойлгомжтой байх ёстой” аж.
Тэрбээр “Энэ бол ямар ч дипломат харилцаа биш, харин тодорхой хэмжээний расизм бөгөөд энэ нь түнш талд (энэ тохиолдолд ОХУ-д) үл хүндэтгэлтэй хандаж байгааг илэрхийлж байна” гэж онцолжээ.
Мөн Лавров Оросын хувьд Европын холбооны “улаан шугам”-ын талаар ярилцах нь “ер нь сонирхолгүй” гэж мэдэгдсэн байна.
Учир нь, Европын холбоо 2014 оны хоёрдугаар сард Украинд болсон “Майданы хямрал”-ыг зохицуулах хэлэлцээрт идэвхтэй оролцож, Герман, Франц, Польш улс уг тохиролцоонд баталгаа гаргаж байсан аж.
Сергей Лавров “Гэвч төрийн эргэлт хийсэн хүмүүс тэр тохиролцоог үл тоомсорлосон. Харин тэд (ЕХ) зүгээр өнгөрөөсөн” гэж хэлжээ.
Минскийн хэлэлцээрийн талаар
Түүнчлэн Европын холбоо 2015 оны хоёрдугаар сард байгуулсан, НҮБ-ын Аюулгүйн Зөвлөлөөр баталгаажсан Минскийн хэлэлцээрт өөрсдийн “улаан шугам”-тайгаар идэвхтэй оролцсон байна.
Лавров “Гэвч хожим нь Германы канцлер асан Ангела Меркель, Францын Ерөнхийлөгч асан Франсуа Олланд нар, мөн Украины Ерөнхийлөгч асан Петро Порошенко нар эдгээр хэлэлцээрийг хэрэгжүүлэх зорилгогүй байсан” гэж мэдэгджээ.
ОХУ-ын Гадаад хэргийн сайд “Тэд бидэнд худал хэлсэн, Оросыг хуурах хэрэгтэй байсан гэж ил тод хэлсэн. Үнэндээ энэ нь Украиныг зэвсгээр хангах хугацаа хожих зорилготой байсан” гэж дүгнэжээ.
Эх сурвалж: TASS
