Вашингтон хотод бямба гарагт болсон Цагаан ордны сэтгүүлчдийн холбооны оройн зоогийн үеэр гэнэт буун дуу гарч, АНУ-ын Ерөнхийлөгч Дональд Трампыг Нууц албаны ажилтнууд тайзнаас яаралтай буулган, аюулгүй байршилд шилжүүлсэн байна.
Тухайн үед Дэд ерөнхийлөгч Жэй Ди Вэнс болон Засгийн газрын гишүүд мөн танхимд байсан бөгөөд бүгд эсэн мэнд, аюулгүй гарсан гэж эх сурвалжууд мэдээлжээ.
Буу дуугарсны дараа Нууц албаны ажилтнууд “Буун дуу гарлаа” хэмээн анхааруулж, зэвсгээ сугалан нөхцөл байдлыг хяналтдаа авч, улмаар сэжигтэй этгээдийг баривчилсан байна.
Одоогийн байдлаар өөр халдагч байсан шинж тэмдэг илрээгүй гэж мэдээлжээ.
Үйл явдлын үеэр CNN сувгийн хөтлөгч Волф Блитцер танхимын гадна байсан бөгөөд буун дууг маш ойроос сонссон тухайгаа ярьсан байна.
Тэрбээр хэлэхдээ, буун дуу гармагц цагдаа нар түүнийг газар хэвтүүлж хамгаалж, бусад хүмүүсийн хамт аюулгүй газар руу шилжүүлсэн байна. Мөн зэвсэгтэй этгээд түүний ойролцоо зайнаас гал нээж байсныг нүдээрээ харсан гэж мэдүүлжээ.
Ерөнхийлөгч Трампыг аюулгүй байршилд хүргэсэн бөгөөд тэрбээр арга хэмжээнд буцаж оролцох хүсэлтэй байгаагаа илэрхийлсэн ч Нууц албанаас эрсдэлийг харгалзан үзэж, түүнийг буцаахыг зөвшөөрөхгүй байгаа аж.
Трамп өөрийн мэдэгдэлдээ хууль сахиулах байгууллагуудыг хурдан шуурхай, зоригтой ажилласныг онцлон магтаж, буудсан этгээдийг баривчилсаныг баталжээ.
Тэрбээр мөн нөхцөл байдлыг харгалзан үзэж, арга хэмжээг үргэлжлүүлэх боломжтой гэж үзэж буйгаа илэрхийлсэн байна.
Харин арга хэмжээг зохион байгуулагчид богино хугацаанд хөтөлбөрийг дахин үргэлжлүүлэхээр төлөвлөж байгаа ч тухайн оройн үйл явдал анх төлөвлөснөөс өөрөөр өрнөх нь тодорхой болжээ.
Сонирхолтой нь, энэхүү хэрэг гарсан зочид буудал нь түүхэн хувьд ч онцгой газар аж. Учир нь, 1981 онд Ерөнхийлөгч Роналд Рейганд халдсан хэрэг мөн энд болжээ. Тухайн үед Жон Хинкли Жуниор ерөнхийлөгчийг буудаж, хүнд шархдуулсан түүхтэй юм байна.
Эх сурвалж: CNN
