Хүн амын өсөлт, уур амьсгалын өөрчлөлт, мөн хэрэглээний огцом нэмэгдэл зэрэг хүчин зүйлсийн нөлөөгөөр дэлхийн усны нөөц хурдацтай шавхагдаж буй.
Үүний улмаас усны аюулгүй байдал нь хүн төрөлхтний өмнө тулгарах хамгийн ноцтой сорилтуудын нэг болоод байгааг Дэлхийн нөөцийн хүрээлэн (WRI) онцолжээ.
Тус байгууллагын таамаглалаар 2040 он гэхэд Турк тэргүүтэй дэлхийн 33 улс “усны маш өндөр стресс”-ийн бүсэд хамаарах төлөвтэй байгаа аж.
Нийт 167 улсыг хамруулсан судалгаагаар хүн амын өсөлт, хотжилт, уур амьсгалын өөрчлөлт зэрэг хүчин зүйлсийн нөлөөгөөр усны нөөц улам бүр хомсдож байгааг анхааруулжээ.
Ялангуяа Ойрхи Дорнодын бүс нутагт усны хомсдол ноцтой түвшинд хүрээд байгаа аж. Энэ бүс нь усны аюулгүй байдлын үзүүлэлтээр дэлхийн хамгийн эмзэг бүсүүдийн нэгт тооцогддог.
Олон улс гүний ус болон далайн усыг давсгүйжүүлэх өндөр өртөгтэй технологид ихээхэн хамааралтай байдаг. Гэвч ийм байгууламжууд цэргийн мөргөлдөөний үед эвдэрч сүйдвэл сая сая хүн ундны усгүй болох ноцтой эрсдэл үүсэх боломжтой аж.
Саяхан Режеп Тайип Эрдоган мэдэгдэхдээ, ирээдүйд улс орнуудын хоорондох зөрчил, мөргөлдөөн газрын тос бус, харин усны нөөцөөс үүдэлтэйгээр улам нэмэгдэх магадлалтайг анхааруулж, усны стратегийн ач холбогдлыг онцолжээ.
Өнөөдөр усны хямрал зөвхөн байгаль орчны асуудлаар хязгаарлагдахгүй, эдийн засаг, хүнсний аюулгүй байдал, эрчим хүч, хүн амын шилжилт хөдөлгөөн зэрэг олон салбарт шууд нөлөөлж буй.
Одоогийн байдлаар дэлхийн хүн амын бараг тал хувь нь жилд дор хаяж нэг сарын хугацаанд усны хомсдолд орж байгаа аж.
ЮНЕСКО-гийн мэдээлснээр, дэлхий даяар 2 тэрбум гаруй хүн аюулгүй, цэвэр ундны усны эх үүсвэргүй амьдарч байгаа бол 3 тэрбум гаруй хүн ариун цэвэр, эрүүл ахуйн наад захын үйлчилгээ авч чаддаггүй байна.
Хэрэв усны нөөцийг үр ашигтай, тогтвортой ашиглах бодит шийдлүүдийг цаг алдалгүй хэрэгжүүлэхгүй бол нөхцөл байдал улам дордож, дэлхийн олон бүс нутагт нийгэм, эдийн засгийн тогтворгүй байдал гүнзгийрэх эрсдэлтэйг мэргэжилтнүүд анхааруулжээ.
Эх сурвалж: ANADOLU
