Канадын Ерөнхий сайд Марк Карни эрх мэдлээ улам бэхжүүлж, Дональд Трампын бодлогын эсрэг илүү хүчтэй байр суурь баримтлах улс төрийн мандат авчээ.
Сөрөг хүчний гишүүд олноор намаа сольж, нөхөн сонгуулиудад дараалан ялалт байгуулсны үр дүнд Карнийн удирдсан Либерал нам парламентын олонх болсон байна.
CBC News-ийн мэдээлснээр, либералууд даваа гарагт парламентын хоёр суудал нэмж авах төлөвтэй байгаа аж. Ингэснээр Нийтийн танхимд нийт 173 суудалтай болж, олонхын босгоос нэг суудлаар давах боломж бүрджээ.
Харин Квебек мужид ширүүн өрсөлдөөнтэй нэг тойргийн санал хураалтын дүн хараахан эцэслэгдээгүй байгаа аж.
Сүүлийн таван сарын хугацаанд сөрөг хүчнээс таван гишүүн Либерал намд шилжин орсон нь энэ амжилтад нөлөөлсөн байна.
Карнийн бодлого ба Трамптай харилцах харилцаа
Шинээр бүрдсэн олонх Карнийн эрх мэдлийг бататгаж, бодлогоо саадгүй хэрэгжүүлэх боломжийг бүрдүүлж байгаа аж. Түүний бодлогын гол чиглэлд Трампын тарифын бодлогыг эсэргүүцэх, АНУ-аас эдийн засгийн хэт хамааралтай байгааг бууруулах, Канадын тусгаар тогтнолд чиглэсэн аливаа заналхийлэлд хариу өгөх зэрэг асуудал багтжээ.
Карни өнгөрсөн гуравдугаар сардЖастин Трюдо огцорсны дараа албан тушаалд томилогдож, түүнээс хойш Трампын “America First” бодлого болон эдийн засгийн шахалтыг шүүмжилдэг дэлхийн нөлөө бүхий удирдагчдын нэг болоод буй юм.
Тэрбээр Дэлхийн эдийн засгийн чуулганд үг хэлэхдээ, олон улсын дүрэмд суурилсан дэг журамд аюул учирч болзошгүйг анхааруулж, дунд хэмжээний орнууд нэгдэн хамтрах шаардлагатайг онцолсон байна.
Карнийн улс төрийн хурдтай өсөлт, Либерал намын дахин хүчирхэгжилтэд Трампын бодлого тодорхой хэмжээгээр нөлөөлсөн гэж ажиглагчид үздэг. Олон канадчууд түүнийг АНУ-ын Ерөнхийлөгчтэй хатуу байр сууринаас харилцаж чадах удирдагч гэж харжээ.
Өнгөрсөн сард Австралийн Сидней хотод үг хэлэхдээ Карни Трамптай харилцах стратегиа “Хүндэтгэлтэй хандана, гэхдээ долигонож биш” хэмээн тодорхойлсон байна.
Мөн тэрбээр “Тэр хаалттай хүрээнд таны байр суурийг сонсох сонирхолтой байдаг нь асуудлыг шийдвэрлэх боломж олгодог. Гэхдээ энэ амар биш” гэж онцолжээ.
Трампын заналхийлэл Канадын нэгдлийг бэхжүүлэв
Трампын Канадын эсрэг хатуу байр суурь канадчуудын дунд эх оронч үзлийг лавшруулсан байна. Үүний илрэл болгон олон иргэн АНУ руу зорчихоос татгалзах, Америк бараа бүтээгдэхүүн худалдан авахаас зайлсхийх хандлагатай болжээ.
Карни энэ нэгдлийг дэмжихийн зэрэгцээ улс төрийн хувьд ч үр ашигтай ашиглаж чадсан байна.
Либерал намын их хурлын үеэр тэрбээр Трампын Канад улсыг АНУ-ын 51 дэх муж болгох тухай мэдэгдлийг иш татаад, “Бид нэгдэж чадвал Канад улам хүчирхэгжинэ. Хэн ч булааж чадахгүй Канад улсыг бид байгуулна” гэж мэдэгджээ.
Дотоод шүүмжлэл
Гэсэн хэдий ч Карнийн олонхийг бүрдүүлэхийн тулд сөрөг хүчний гишүүдийг намдаа элсүүлж буй бодлого нь Либерал намын дотоодод шүүмжлэл дагуулж байгаа аж.
Тухайлбал, Консерватив намаас Либерал намд элссэн парламентын гишүүн Мэрилин Гладу үр хөндөлтийн эсрэг байр суурьтайгаараа танигдсан нь Либерал намын үндсэн үнэт зүйлтэй зөрчилдөж буйд зарим гишүүд шүүмжлэлтэй хандаж буй юм байна.
Гэсэн хэдий ч Гладу эмэгтэйчүүдийн сонголтын эрхтэй холбоотой асуудлаар Либерал намын байр суурийг дэмжин санал өгөхөө илэрхийлсэн байна.
Эх сурвалж: CNN
