Хиймэл оюун ухаан (AI)-ыг хэнээс асуухаас шалтгаалаад тэс өөрөөр үнэлдэг. Зарим хүний хувьд AI бол хамгийн хэрэгтэй хамтран ажиллагч, заримд нь зүгээр л “гоё болгосон хайлтын систем”.
Харин нөгөө хэсэг нь хэт үнэлэгдсэн технологи гэж үздэг. Харин яг аль нь үнэн бэ гэдэг дээр өнөөдөр хэн ч санал нэгдэж чадаагүй хэвээр байна.
Технологийн салбарын удирдлагууд AI ажлын байрыг үндсээр нь өөрчилж, шинэ аж үйлдвэрийн хувьсгал авчирна гэж сурталчилсаар ирсэн.
Харин эргэлзэгчид үүнийг маркетингийн хэт дөвийлгөсөн шуугиан гэж үздэг бол зарим судлаач, гүйцэтгэх захирлууд аюулгүй байдлын эрсдэлийн талаар анхааруулсаар, ажлаа ч орхиж буй.
Энэ зөрүүтэй ойлголт өнгөрсөн долоо хоногт улам “тодорсон “хурцадсан”. AI компанийн гүйцэтгэх захирал, хөрөнгө оруулагчийн бичсэн нэгэн эсээ цахим орчинд тарж, “компьютерийн өмнө сууж хийдэг бүх ажилд AI заналхийлж байна” хэмээн мэдэгдсэн нь ихээхэн маргаан дагуулав.
Яагаад хүмүүс AI-д өөр өөрөөр ханддаг вэ?
Үүний нэг энгийн тайлбар бий: Хүмүүс AI-ийг өөр өөр байдлаар, өөр өөр түвшинд ашиглаж байгаа ч бүгдийг нь нэг нэрээр нэрлэж байна.
Menlo Ventures-ийн хөрөнгө оруулагч Matt Murphy хэлэхдээ “Хүмүүс технологитой хэр их танилцсан, хэр их ашигласнаараа маш их ялгаатай. Тэр ялгаа маш хурдан өөрчлөгдөж байна” гэжээ.
Үнэгүй AI ба төлбөртэй AI — асар том ялгаа
Ихэнх хүмүүс үнэгүй AI-ийг хүнсний жагсаалт гаргах, аялал төлөвлөх, энгийн асуултад хариу авах зэрэгт ашигладаг.
Menlo Ventures-ийн тайланд дурдсанаар, AI хэрэглэгчдийн ердөө 3 хувь нь л төлбөртэй хэрэглэгч байгаа аж.
Гэхдээ төлбөртэй хэрэглэгчид AI-ийн огт өөр түвшний боломжийг ашигладаг. Үүнд:
-чатлах бус ажлыг өөрийн өмнөөс гүйцэтгэх “агентууд”
-хэрэглээний хязгаар багатай
-илүү нарийн судалгаа, код бичих чадвар багтана. Жишээ нь:
Anthropic-ийн Claude Cowork агент
OpenAI-ийн Codex код бичих агент
эдгээр нь зөвхөн төлбөртэй багцад багтдаг.
Ийм төрлийн AI л ажлын байранд бодитой нөлөөлж болзошгүй гэсэн айдас бий болгож байна.
AI бүх ажлыг орлох уу?
Зарим шинжээч AI-ийн чадварыг хэтрүүлж байна гэж үздэг. Ялангуяа AI-г ашиглан мянга мянган мөр код бичсэн, аппликейшн бүтээж, тест хийсэн гэх мэт жишээнүүд бодит эсэхэд эргэлздэг.
Carnegie Mellon University-ийн профессор Emily DeJeu “Зөвхөн үнэгүй AI-д тулгуурлан технологийн бодит чадварыг дүгнэх нь ташаа ойлголт” гэж хэлжээ.
Харин Oren Etzioni AI-ийн тухайд “Туршлага багатай дадлагажигчтай туршлагатай дадлагажигчийг харьцуулж байгаа мэт” гэж зүйрлэсэн байна.
AI үнэхээр ажлын байрыг устгаж байгаа юу?
Зарим судалгаанууд AI-ийн үр нөлөөг хэтрүүлсэнийг харуулж байна. Зарим судалгаагаар AI ашигласан программистууд код бичихэд илүү их цаг зарцуулсан. Зарим AI загвар бодит ажлын даалгаварт алдаатай үр дүн гаргажээ.
Stanford Institute for Human-Centered AI-ийн үүсгэн байгуулагч James Landay “AI код бичихэд тохиромжтой байж болох ч бүх ажил логик бүтэцтэй биш. Тиймээс нэг салбар дахь амжилтыг бусдаар шууд дүгнэх нь буруу” гэжээ.
Нэмж өгүүлэхэд, AI-ийн талаархи маргаан нэг шалтгаантай аж. Үүнд: Хүмүүс өөр өөр AI ашиглаж буй. Өөрөөр хэлбэл үнэгүй, төлбөртэй хувилбарууд бий бөгөөд чадвар нь асар их ялгаатай.
Зарим амлалтууд бодит байдалтай нийцэхгүй байна
AI олон салбарыг өөрчлөх нь тодорхой ч, бүх ажлыг устгана гэж дүгнэхэд эрт. Харин бодит үнэлгээ хийхийн тулд AI-ийг яаж, ямар түвшинд ашиглаж буйг ялгаж харах шаардлагатайг мэргэжилтнүүд онцолж байна.
Эх сурвалж: CNN
