Ираны удирдагчийн зөвлөх багийн нэг гишүүн “Иран ба АНУ-ын хооронд үргэлжилж буй зөрчлүүдийг дуусгахын тулд АНУ-ын цэргийн хүчийг Персийн булангаас гаргах ёстой” гэж мэдэгджээ.
Ираны бригадын генерал, Исламын Хувьсгалын Хамгаалах Корпус (IRGC)-ын командлагч асан Мохсен Резаии “Тегеран АНУ-аас учирсан хохирлын төлбөр болон ‘аюулгүй байдлын маш сайн баталгаа’ авахыг шаардана” гэж хэлсэн байна.
Экспедицийн Тэргүүлэх Зөвлөлийн гишүүн Ираны SNN телевизэд өгсөн ярилцлагадаа “АНУ Персийн буланд байсан нь сүүлийн 50 жилд аюулгүй байдлыг алдагдуулсан гол хүчин зүйл” гэж онцолжээ.
Резаии “Дайны төгсгөл мөн бидний гарт байна” гэж хэлээд, “АНУ-ыг Персийн булангаас гаргах бидний гол шаардлага” хэмээсэн байна. Мөн “Иран АНУ-аас нөхөн төлбөр авахыг хүснэ” гэж нэмж хэлжээ. Тэрбээр Ираны тал АНУ-ын нэр хүндийг “унагасан” бөгөөд эцэст нь бүс нутаг дахь “илүү хүчирхэг байр суурьтай” улс болно гэж хэлсэн аж.
Ираны Ерөнхийлөгч Масуд Пезешкиан X (хуучнаар Twitter) сүлжээнд даваа гарагт “Энэхүү дайныг дуусгах ганц арга нь Ираны хууль ёсны эрхийг хүлээн зөвшөөрөх, нөхөн төлбөр төлөх, ирээдүйд дахин халдахгүй гэсэн баталгаа өгөх” гэж жиргэжээ.
Дараа нь Ираны хэвлэл мэдээлэл шинэ томилогдсон удирдагч Можтаба Хаменейн анхны олон нийтийн мэдэгдлийг нийтэлж, тэрбээр ч мөн “дайснаас нөхөн төлбөр нэхнэ” гэж мэдэгдсэн байна.
Түүнээс гадна АНУ-ын Ерөнхийлөгч Дональд Трамп өнгөрсөн баасан гарагт Truth Social платформ дээрээ “Иран цэргийн болон улс төрийн хувьд бүрэн буулт хийхгүй бол АНУ тэдэнтэй ямар ч хэлэлцээр хийхгүй” гэж бичжээ.
Эх сурвалж: RT
