Монгол Улсын Ерөнхий сайд Занданшатарын Гомбожав аялал жуулчлалын бодлого болон эдийн засгийн эрх чөлөө нь Монгол Улсын стратегийн алсын харааны төв тулгуур баганууд болж байгааг онцолж, хурдтай өөрчлөгдөж буй дэлхийд Монгол Улсыг бүс нутгуудыг холбосон итгэлт гүүр болгон байршуулж байгааг тэмдэглэв хэмээн World Tourism Forum мэдээлснийг бид энэ удаа “БИДНИЙ ТУХАЙ” буландаа онцолж байна.
Тус нийтлэлд “Тэрбээр Монгол Улс зах зээлийг нээж, бизнес эрхлэгчдийг дэмжин чадавхжуулж, дэлхийн жуулчдыг нээлттэйгээр хүлээн авах замаар нээлттэй бодлогоо тогтвортой өсөлт, тэсвэртэй хөгжил, олон улсын хамтын ажиллагаанд бодитоор хөрвүүлэхийг зорьж байна хэмээн онцолсон юм.
Өнөөдөр аялал жуулчлалын бодлого нь эдийн засгийн өсөлт, олон улсын хамтын ажиллагаа, урт хугацааны тогтвортой хөгжил гэсэн гурван чухал зорилгын огтлолцолд онцгой байр суурь эзэлж байна.
Тогтворгүй байдал, задрал, эвсэл холбооны өөрчлөлтөөр тодорхойлогдож буй дэлхийн шинэ дэг журамд аялал жуулчлал нь зөвхөн эдийн засгаа төрөлжүүлэх хэрэгсэл байхаа больж, харин итгэлцэл бий болгох, энх тайвныг дэмжих, улс орнуудын стратегийн харилцааг гүнзгийрүүлэх хүчирхэг зэвсэг болон хувирчээ.
Нэг жилийн өмнө Монгол Улс дэлхийн тавцанд бэлгэдэл төдийгүй бодит ач холбогдолтой алхам хийсэн. Давост болсон Дэлхийн эдийн засгийн чуулганы үеэр Монгол Улс Promenade-д “Mongolia House”-ийг нээсэн нь энгийн нэг павильон бус, харин зорилгоо илэрхийлсэн мэдэгдэл байв.
Энэ нь “Монгол Улс нээлттэй, бэлэн, идэвхтэй оролцогч” гэдгийг дэлхий нийтэд харуулж, олон улсын яриа хэлэлцээ, хөрөнгийн урсгалыг тодорхойлоход хувь нэмрээ оруулахад бэлэн гэдгээ илтгэсэн явдал байлаа.
“Mongolia House” нь бизнесийн манлайлагчид, хөрөнгө оруулагчид, бодлого боловсруулагчид, инновац бүтээгчид, эрдэмтдийг нэг дор цуглуулж, итгэлцэл, тэсвэртэй хөгжил, хамтын ахицыг дэмжих талбар болж байна.
Монгол Улс энэхүү орон зайг онцгойлон үнэлдэг. Учир нь, бидний хувьд яриа хэлэлцээ нь бодит үйлдэлд, түншлэл нь бодит үр дүнд хүрэх ёстой гэж үздэг.
Аажим боловч тууштай шинэчлэлүүд – бидний нэрлэж буйгаар “цэгцрэх хөдөлгөөн”-ийн үр дүнд Монголын эдийн засаг эргэн сэргэж, хүчтэй өсөлт үзүүллээ.
Эдийн засгийн өсөлт 2.4-6.4 хувь болон нэмэгдэж, олон улсын итгэл сэргэв. Сүүлийн арав гаруй жилд анх удаа Монгол Улсын зээлжих зэрэглэлийг Moody’s, Fitch, Standard & Poor’s зэрэг гурван том агентлаг бүгд ахиулсан.
Энэ нь макро эдийн засгийн үзүүлэлтүүд сайжирч, инфляц тогтворжиж, гадаад валютын нөөц бэхжсэнийг илтгэж байна.
Дэлхийн банк болон Олон улсын валютын сангийн тооцооллоор Монголын эдийн засгийн өсөлт дунд хугацаанд 5-6 хувийн түвшинд хадгалагдана гэж үзжээ.
Гэвч өсөлт дангаараа хангалттай биш.
Монгол Улс бол зэс, алт, ховор элемент зэрэг асар баялаг ашигт малтмалтай, дэлхийн хамгийн нөөц баялагтай орнуудын нэг. Гэсэн ч уул уурхайн салбараас хэт хамааралтай байдал нь эдийн засгаа төрөлжүүлэх зайлшгүй шаардлага бийг тод харуулсан.
Иймээс аялал жуулчлал нь Монголын хувьд зүгээр нэг нэмэлт салбар бус, харин эдийн засгийн бодлогын стратегийн тулгуур багана, урт хугацаанд тэгш хүртээмжтэй, тогтвортой хөгжлийг хөтлөх гол хөдөлгөгч хүч юм.
Монгол Улс өнөөгийн дэлхийд улам ховордож буй нэг үнэт зүйлийг санал болгодог. Энэ бол жинхэнэ, бодит байдал. Хүний гар хүрээгүй уудам нутаг. Амьдралдаа шингэсэн нүүдэлчин соёл иргэншил.
Их Эзэн Чингис хаанаар тодорхойлогдох түүхэн өв. Газар нутгийн хэмжээгээрээ дэлхийд 17-д ордог ч Монгол Улс хүн амын нягтаршил хамгийн багатай орны нэг бөгөөд Францаас дөрөв дахин том газар нутагт ердөө 3.5 сая хүн амьдарч байна. Хүн амын 65 хувь нь 35-аас доош насныхан.
Энэхүү уудам тал нутаг, цөл, уулс, оддоор дүүрэн тэнгэр бүхий орон зай нь “амьд” нүүдэлчин өв соёлтой хослон, дэлхий дахинд давтагдашгүй үнэ цэнийг бий болгодог.
Монгол Улс олноор хүлээн авах жуулчлалыг сурталчилдаггүй. Харин туршлагад суурилсан, онцгой, насан туршийн дурсамж үлдээх аяллуудыг жилийн турш санал болгодог.
Нүүдэлчин амьдрал, соёлын өв, адал явдалт спорт, бизнес арга хэмжээ, Монголын эзэнт гүрний түүхэнд тулгуурласан аялал жуулчлал гээд Монголын санал болгож буй туршлагыг өөр хаана ч дахин давтах боломжгүй” гэжээ.
Эх сурвалж: WORLD TOURISM FORUM
