Дулааны дөрөвдүгээр цахилгаан станцад гарсан техникийн гэмтлийн улмаас нийслэлд цахилгааны хэсэгчилсэн хязгаарлалт хийж эхэлсэн. Үүний зэрэгцээ Шадар сайд Т.Доржхандын эсрэг шүүмжлэл, сэтгэгдлүүд цахим орчинд идэвхтэй нийтлэгдэж буй юм.
Шадар сайд Т.Доржханд үүсээд буй нөхцөл байдалтай холбоотойгоор тайлбар хийж, эрчим хүчний салбарын олон жилийн хуримтлагдсан асуудал, улс төрийн популизмын хор уршгийг онцлов.
Тэрбээр “Би улс төрөөс өнөөдөр ч гарч болно. Харин хэн популизмыг сөрж, иргэдэд таалагдахгүй ч урт хугацаандаа улс оронд хэрэгтэй шийдвэр гаргах вэ гэдэг л чухал” хэмээн мэдэгджээ.
Шадар сайд “Сүүлийн 100 жилийн дэлхийн томоохон мөргөлдөөн, геополитикийн хурцадмал байдал эрчим хүчтэй шууд холбоотой байсан бөгөөд өнөөдөр энэ өрсөлдөөн улам эрчимжиж байгааг Венесуэлийн жишээнээс харж болно.
Түүнчлэн хиймэл оюун ухаан (artificial intelligence)-ы эрчимтэй хөгжил эрчим хүчний хэрэглээг огцом өсгөж, дэлхийн улс орнууд цэвэр эрчим хүч болон стратегийн ач холбогдол бүхий ашигт малтмалын нөөцийг хэн хянах вэ гэдэг дээр улам хүчтэй өрсөлдөж эхэлсэн” гэж дурдав.
Тэрбээр “Монгол Улс газрын дээрх болон доорх арвин их эрчим хүчний нөөцтэй атлаа сүүлийн 40 жилийн хугацаанд нэг ч шинэ цахилгаан станц бариагүй. Энэ нь төрөөс эрчим хүчний үнийг бодит өртгөөс доогуур түвшинд удаан хугацаанд барьж ирсэнтэй холбоотой.
Энэ байдлыг өөрчлөх зорилгоор 2025 оны есдүгээр сард Эрчим хүчний реформын үндэсний хороо байгуулагдаж, эрчим хүчний үнийг өртөгт нь ойртуулсан шийдвэрүүдийг гаргаснаар төслүүд эдийн засгийн хувьд ашигтай, “bankable” болж, төрийн бус хувийн хэвшлээс 8 их наяд төгрөгийн санхүүжилт татах боломж бүрдсэн.
Гэвч популист улстөрчдийн шахалтаар уг хороо нэг жил ч хүрэлгүй татан буугдсан, өнөөдөр тэдгээр улстөрчид нөхцөл байдлын талаар шүүмжилж байна.
Монголд төмөр зам барина гэхээр өргөн цариг ярьж шахдаг, цахилгаан станц барина гэхээр ‘Хятадууд Монголыг эзэллээ’ хэмээн хашгирдаг Ояа, Мояа, Женкоч нарын айдас, шантаажид автдаг хүн би биш” хэмээн хэлж, хатуу байр суурь илэрхийллээ.
