Иргэн П.Хишигбаяр “Херо энтертайнмент” компанитай холбоотойгоор “Гэрэгэ тауэр”-ын 14 давхрыг нэг сая ам.доллароор худалдахаар тохирсон ч төлбөрөө хийгээгүй гэх мэдээлэл сошиал орчинд тархсан нь улс төрийн хүрээнд анхаарал татаж эхэлсэн.
Энэ талаар Монгол Улсын Ерөнхий сайд асан Л.Оюун-Эрдэнээс тодруулахад тэрбээр уг хэрэгт улс төр, хууль хяналтын байгууллагын нөлөө орсон байж болзошгүй гэх ноцтой мэдэгдэл хийв.
Түүний хэлснээр, УИХ-ын гишүүн Б.Энхбаяр П.Хишигбаяртай уулзаж, “Хэргийг чинь цэгцэлж өгье” хэмээн ярьсан гэх мэдээлэл байгаа бөгөөд энэ нь хэрэг наймаалцсан байж болзошгүй үндэслэл болж буй аж.
Иймээс тэрбээр энэ асуудлаар Авлигатай тэмцэх газар (АТГ)-т гомдол гаргана гэдгээ илэрхийлсэн. Энэ нь уг асуудал энгийн иргэн, компанийн маргаанаас давсан, улс төр-хууль зүйн томоохон хэрэг болж хувирах магадлалтайг харуулж байна.
Нөгөө талд, хэрэв П.Хишигбаяр үнэхээр тухайн үл хөдлөх хөрөнгийн хууль ёсны эзэмшигч мөн бол төлбөрөө хийж, өмчөө буцаан авах боломжтой ч шүүхээр явж буй хэргийг улс төрийн тохироо, нөлөөллөөр шийдэх оролдлого байж болохгүйг Л.Оюун-Эрдэнэ онцлон тэмдэглэв.
Түүнчлэн энэ асуудал нь Эрдэнэттэй холбоотой тендерийн маргаан, Т.Дүүрэн нарын нэр холбогдсон хэрэгтэй цаг хугацааны хувьд давхцаж байгаа нь улс төрийн зориудын “гаргалгаа” байж болзошгүй гэсэн хардлага ч дагуулж байна.
Нөгөө талаар, улс төрийн энэ бүх дуулиан, маргааны хажуугаар Монгол Улсын Их Хурал дээр Ерөнхийлөгчийн өргөн барьсан чухал хуулийн төслийг хэлэлцэж байгаа нь парламентын ардчиллын хувьд онцгой ач холбогдолтойг Л.Оюун-Эрдэнэ онцолж, улс төрчид анхаарлаа бодлогын асуудалд хандуулах ёстойг сануулав.
