Ираны шинэ дээд удирдагч Можтаба Хаменеи үйл ажиллагаа явуулах чадваргүй байдалд орж, шиит шашинтнуудын хувьд ариун хот болох Кумд эмчилгээ хийлгэж байгаа аж. Энэ тухай дөрөвдүгээр сарын 6-ны даваа гарагт Британийн The Times сонин өөрийн мэдэлд ирсэн дипломат тэмдэглэлд тулгуурлан мэдээлжээ. Уг баримт бичиг нь АНУ болон Израилийн тагнуулын мэдээлэлд үндэслэсэн байх магадлалтай аж.
Тус сонин “Можтаба Хаменеи Кум хотод хүнд байдалтай эмчилгээ хийлгэж буй бөгөөд дэглэмийн аливаа шийдвэр гаргалтад оролцох боломжгүй байна” хэмээн уг баримтаас эш татан мэдээлсэн байна. Харин энэ тэмдэглэлийг аль улсын Гадаад хэргийн яам боловсруулсан нь тодорхойгүй байгаа аж.
Мөн The Times онцлохдоо, “Сөрөг хүчний бүлгүүд түүнийг комд орсон, эмнэлэгт эмчлүүлж байна гэж үзэж байгаа бол зарим эх сурвалж түүнийг хөлөө хугалж, нүүрэндээ гэмтэл авсан гэж таамаглаж байна” гэжээ.
“Үйл ажиллагаа явуулах чадваргүй байна” гэх мэдээллүүд нь улс төрийн дээд эрх мэдэл төвлөрсөн Иранд Можтаба Хаменейн байр сууринд эргэлзээ үүсгэж байгаа аж. Британийн хэвлэл “Энэ нь Исламын хувьсгалын хамгаалагчдын корпус бодит байдал дээр улс орныг хяналтдаа байлгаж, харин Хаменеи дуугүй хүүхэлдэй, эсвэл нэр төдий удирдагч байж болзошгүй гэсэн хардлага төрүүлж мэднэ” хэмээн тэмдэглэжээ.
📰 Али Хаменеигийн үхэл ба шинэ удирдагч
Можтаба Хаменейн эцэг аятолла Али Хаменей АНУ болон Израиль Ираны эсрэг дайн эхлүүлсэн эхний өдөр буюу хоёрдугаар сарын 28-нд амь үрэгдсэн байна. Түүнтэй хамт охин, ач хүү, бэр, хүргэн нь мөн амиа алджээ.
Ираны удирдах байгууллага болох Шинжээчдийн зөвлөл гуравдугаар сарын 9-нд Можтаба Хаменеиг тус улсын шинэ дээд удирдагчаар зарласан. Харин тэрбээр дайн эхэлснээс хойш олон нийтийн өмнө огт харагдаагүй, түүний талаар ямар ч албан ёсны мэдээлэл гараагүй байгааг The Times онцолжээ.
Дөрөвдүгээр сарын 8-нд аятолла Али Хаменей нас барснаас хойш 40 хонож буй. Энэ нь шиит исламын гашуудлын уламжлалт хугацаа дуусаж буйг илтгэж байгаа аж. Түүний шарилыг мөн Кум хотод оршуулахаар бэлтгэж буй юм байна.
Кум хот нь шиит шашинтнуудын хувьд ариун хот бөгөөд Ираны шашны төвд тооцогддог. Тус хот нь Тегеран хотоос урагш 140 км зайд оршдог.
Мөн The Times-ийн нийтэлсэн баримтад Кум хотод томоохон мавзолейн барилгын суурийг тавьсан талаар дурдаад, тэнд Али Хаменей болон түүний гэр бүлийн гишүүд, магадгүй Можтаба Хаменеиг ч оршуулах боломжтой гэжээ.
Эх сурвалж: DW
