Европын холбоо Украинд санхүүжилт олгох, Иранд өрнөж буй цэргийн үйл ажиллагаанд хариу үзүүлэх зэрэг олон асуудлаар нэгдсэн шийдвэр гаргаж чадахгүй байгаа нь тус холбоо системийн доголдолд орсныг харуулж байна” гэж Politico хэвлэл мэдээлжээ.
Тус хэвлэл Европын холбооны дипломатчид, албан тушаалтнууд, хууль тогтоогчид болон шинжээчидтэй ярилцсаны үндсэн дээр энэхүү дүгнэлтийг хийсэн байна.
Испанийн Европарламентын гишүүн Начо Санчес Амор “Бид шийдвэр гаргах тал дээр ноцтой асуудалтай байна. Сар бүр шинэ асуудал гарч ирж, энэ хандлагыг улам тодотгож байна” хэмээн онцолжээ.
Мөн эх сурвалжуудын нэг нь Европын холбоо Израилийн иргэдийг Иорданы баруун эрэгт суурьшуулах асуудлаар нэгдсэн байр суурь илэрхийлж чадаагүйг дурдсан байна.
Европын ихэнх орон эдгээр суурьшигчдыг палестинчуудын эрхийг зөрчиж байна гэж үздэг ч хориг арга хэмжээ авах шийдвэр гацжээ. Нийт 27 гишүүн орноос 26 нь дэмжсэн ч ганц улсын эсэргүүцлээс болж шийдвэр гарч чадаагүй байна. Politico-ийн мэдээлснээр, уг хоригийг Унгар улс блокложээ.
Үүнээс гадна ОХУ-д тавих хориг, Украинд олгох 90 тэрбум еврогийн зээлийн асуудал дээр ч Европын холбоонд нэгдсэн байр суурь байхгүй байгаа аж.
Европын Комиссын тэргүүн Урсула фон дер Ляйений хэлснээр, 2026-2027 онд Украинд олгох ёстой цэргийн санхүүжилт Унгарын Ерөнхий сайд Виктор Орбаны байр сууриас шалтгаалан өнөөдрийг хүртэл гацсан хэвээр буй юм байна.
Эх сурвалж: TASS
