Улсын Их Хурал дахь Ардчилсан намын бүлэг ээлжит бусаар хуралдаж, УИХ-ын даргад С.Бямбацогтыг УИХ-ын даргын албан тушаалд нэр дэвшүүлсэн асуудлыг хэлэлцэж байна. Тус хуралд нэр дэвшигч С.Бямбацогт болон УИХ дахь МАН-ын бүлгийн дарга Ж.Батжаргал нар оролцож буй аж.
Өнөөдрийн УИХ-ын чуулганы нэгдсэн хуралдаанаар дээрх асуудлыг хэлэлцэх үеэр Ардчилсан намын бүлгээс гурав хоногийн завсарлага хүссэн ч УИХ-ын дэд дарга Ж.Бат-Эрдэнэ “асуудлыг яаралтай шийдвэрлэх шаардлагатай” хэмээн үзэж, нэг хоногийн завсарлага олгохоор шийдвэрлэсэн байна.
УИХ дахь Ардчилсан намын бүлгийн дарга О.Цогтгэрэл завсарлага хүссэн үндэслэлээ тайлбарлахдаа, сүүлийн хоёр жилийн хугацаанд парламентын тогтвортой ажиллагааг хангах ёстой УИХ-ын даргын албан тушаалд гурав дахь хүний нэрийг хэлэлцэж буй нь анхаарал татаж буйг онцолсон.
Мөн тэд боловсруулан өргөн барьсан хуулийн төсөлдөө хэд хэдэн чухал зохицуулалт тусгасан тул бүлгийн түвшинд нухацтай хэлэлцэх шаардлагатай гэж үзжээ.
Түүнчлэн УИХ-ын даргыг сонгох асуудлыг гишүүдийн асуулт, хариултгүйгээр шууд санал хураалтад оруулж буйг шүүмжилж, ийм чухал албан тушаалд нэр дэвшигчийг нээлттэй хэлэлцэж, харилцан ойлголцсоны үндсэн дээр шийдвэрлэх нь зүйтэйг онцолсон байна.
УИХ дахь Ардчилсан намын бүлгээс санаачилсан хуулийн төсөлд УИХ-ын даргыг сонгохдоо 64-өөс дээш гишүүний санал авсан нэр дэвшигчийг дэмжих эсэхийг нэгдсэн чуулганаар шийдвэрлэх, мөн парламентын дарга намын харьяаллаасаа түдгэлздэг байх зохицуулалтыг хуульд тусгах санал багтжээ. Уг төслийг УИХ-аар хэлэлцэн батлах шаардлагатай гэж тус бүлэг үзэж байгаа аж.
Харин УИХ-ын даргад нэр дэвшсэн С.Бямбацогт “парламентын дарга намын гишүүнчлэлээс түдгэлзэх тухай хуулийг баталбал хуулийн дагуу ажиллана” гэсэн байр суурь илэрхийлсэн юм.
