“Artemis II” багийнхан хөөрснөөс хэдхэн цагийн дараа жорлонгийн асуудалтай тулгарчээ. Үүнтэй холбогдуулан нэгэн сансрын нисэгч сансарт хэрхэн бие засдаг талаар тайлбарласан аж.
Төлөвлөгөөний дагуу дөрвөн нисэгчийг Сарыг тойруулан нисгэх энэхүү сансрын нислэг лхагва гарагт Флоридагаас ямар нэгэн саадгүй хөөрчээ. Гэхдээ нэг хэсэгтээ жорлонтой холбоотой асуудал гарч, багийнхан удирдлагын төвд жорлон дээр шар өнгийн анхааруулах гэрэл ассан талаар мэдэгдсэн байна.
Удирдлагын төв энэ асуудлыг засахад бага зэрэг хугацаа хэрэгтэй гэж мэдэгдсэн ч удалгүй асуудлыг шийдэж чаджээ.
Мэдээллүүдэд дурдсанаар, багийнхан “анивчсан, гэмтлийн дохио” илэрсэн гэж мэдэгдсэн бөгөөд удирдлагын баг мэдээллийг амжилттай шалгаж, нисэгчидтэй хамтран асуудлыг оношлон шийдвэрлэж чадсан байна.
Энэхүү жорлонгийн асуудал хүмүүсийг “Нисэгчид сансарт хэрхэн бие засдаг вэ?” гэж ихэд сонирхоход хүргэжээ.
European Space Agency-ийн YouTube сувагт 2015 онд нийтэлсэн бичлэгт сансрын нисэгч Саманта Кристофоретти сансарт хэрхэн бие засдаг талаар тайлбарласан байдаг аж.
Тэрбээр хоолой мэт харагддаг төхөөрөмж маш чухал үүрэгтэйг хэлжээ. Түүнийг 90 градус эргүүлэхэд “сорох сэнс” (suction fan) үүсдэг бөгөөд шээх үед ашигладаг байна. Харин өтгөн гаргах үед процесс арай өөр боловч мөн л сорох “зарчим” ашигладаг байна.
Энэ тохиолдолд жирийн жорлонгийн суудалтай төстэй зүйл дээр суух бөгөөд ялгадас уутанд ордог тул дараагийн хүн хэрэглэхэд эвгүй биш байдаг аж.
Хатуу хаягдлын сав дүүрэхэд солих журамтай. Өөрөөр хэлбэл, гурван хүний багийн хувьд ойролцоогоор 10 хоног тутамд сольдог гэж нисэгч тайлбарласан байна. Харин шээсийг жорлонгийн ард байрлах нэлээд төвөгтэй гидравлик төхөөрөмжөөр “дахин боловсруулдаг”.
Мөн сансарт өтгөн гаргах үед нэг чухал зүйл бол сэнсийг заавал асаах хэрэгтэй. Эс тэгвээс сансрын хөлөг даяар эвгүй үнэр тархах аюултай аж.
Яагаад Artemis II баг Сар дээр буухгүй вэ?
NASA-ийн Artemis II хөтөлбөрийн хүрээнд 2026 оны дөрөвдүгээр сарын 1-нд дөрвөн хүнтэй баг Сар руу хөөрсөн түүхэн үйл явдал болсон.
Сүүлийн 50 гаруй жилийн хугацаанд анх удаа хүнтэй баг Сар луу илгээгдсэн нь энэ юм. Өмнө нь 1972 онд Apollo 17-гийн үеэр командлагч Жийн Сэрнан болон нисэгч Харрисон Шмитт нар Сар дээр алхсан байдаг.
Artemis II багт NASA-гийн нисэгчид болох Рийд Уайзман, Виктор Гловер, Виктор Гловер болон Канадын сансрын агентлагийн нисэгч Жереми Хансен нар багтжээ. Тэд “Orion” хөлгөөр 10 хоногийн турш шинжлэх ухааны туршилт, системийн шалгалт, эмнэлгийн үзлэг, амьд үлдэх сургалт зэрэг олон үйл ажиллагаа явуулах “даалгавартай”.
Гэхдээ энэ удаа нисэгчид Сар дээр буухгүй. Учир нь, Artemis хөтөлбөрийн хүрээнд Artemis II нь Сар дээр буух зорилготой бүтээгдээгүй бөгөөд Orion сансрын хөлөг өөрөө буух чадваргүй аж.
Artemis II нь үндсэндээ “туршилтын нислэг” бөгөөд энэ удаа хүнтэйгээр Сарыг тойрч шалгах зорилготой. Үүнээс өмнө 2022 онд Artemis I хүнгүйгээр Orion хөлгийг Сар руу илгээж, амжилттай буцаасан.
NASA-гийн хэлснээр, энэ нислэг нь “сансрын гүн орчинд хүнтэй үед бүх систем төлөвлөсний дагуу ажиллаж байгаа эсэхийг баталгаажуулах” зорилготой аж. Мөн энэ нь Сар дээр ирээдүйд буух нислэгүүдэд зам тавьж, урт хугацааны судалгаа, хайгуулын боломжийг бүрдүүлэх юм байна.
Анх NASA 2027 онд Artemis III-ээр Сар дээр бууна гэж төлөвлөж байсан ч хөтөлбөрийг өөрчилснөөр энэ нислэг нь дэлхийн тойрог замд холболт, уулзалтын туршилт хийх зорилготой болжээ. Хэрэв бүх зүйл амжилттай болвол NASA 2028 онд Artemis IV-өөр дахин Сар дээр хүн буулгахаар төлөвлөсөн байна.
Эх сурвалж: UNILAD
