УИХ-ын гишүүн Г.Ганбаатарын биед халдсан хэрэг 2026 оны дөрөвдүгээр сарын 1-ний орой гарч, уг асуудлыг хууль хяналтын байгууллага шалгаж эхэлжээ. Тодруулбал, тухайн өдөр 23:00 цагийн орчимд түүнийг байрныхаа орц руу орж явах үед үл таних этгээд биед нь халдаж, заналхийлсэн байна.
Албан мэдээллээр, 23:05 цагт “Нэг залуу миний цээжин тус газар цохиод зугтлаа” гэх дуудлага цагдаагийн байгууллагад бүртгэгдсэн бөгөөд Хан-Уул дүүргийн Цагдаагийн I хэлтэс уг хэргийг шалгаж эхэлжээ.
Урьдчилсан шалгалтаар 32 настай Б гэх иргэн согтууруулах ундаа хэрэглэсэн үедээ орцны үүдэнд тааралдсан УИХ-ын гишүүнийг цээжин тус газарт нэг удаа цохисон нь тогтоогдсон байна. Хохирогч шүүх эмнэлгийн үзлэгт орохоос татгалзсан ч хэрэгт холбогдох материалыг хуульд заасан журмын дагуу бүрдүүлэн, шалгалтын ажиллагаа үргэлжилж байгаа аж.
Г.Ганбаатар гишүүн дөрөвдүгээр сарын 2-нд хэвлэлд өгсөн мэдээлэлдээ тухайн үйл явдлын талаар илүү дэлгэрэнгүй тайлбарласан байна. Тэрбээр гэртээ харьж ирээд, жолоочоо буцаан явуулж, байрныхаа орц руу орох үедээ танихгүй залуутай зөрсөн бөгөөд уг этгээд гэнэт “Хөөе” хэмээн дуудан, цээжин тус газарт нь цохижээ. Үүний дараа өөрийгөө хамгаалах үүднээс тухайн хүнтэй барьцалдах үед ойролцоо байсан хүмүүс оролцон салгаж, цагдаад дуудлага өгсөн байна.
Мөн тухайн этгээдийг удалгүй олж тогтоосон талаар цагдаагийн байгууллагаас түүнд мэдээлжээ. Г.Ганбаатар гишүүн “Тэр залуутай уулзах үедээ “Чи хүн андуурсан уу” гэж асуухад “Чи зүгээр байгаарай, чамайг ална” хэмээн заналхийлсэн” гэж мэдүүлсэн байна. Түүнчлэн өөрийн зүгээс тухайн хүний биед халдаагүйгээ онцолжээ. Хэрэг гарсан орчны хяналтын камерын бичлэгийг цагдаагийн байгууллага хураан авч, нотлох баримтад авсан байна.
УИХ-ын гишүүний биед санаатай халдсан эсэх, эсвэл согтуугаар үйлдэгдсэн санамсаргүй шинжтэй үйлдэл байсан эсэхийг тогтоохоор шалгалтын ажиллагаа үргэлжилж байгаа ажээ.
