АНУ-ын NASA агентлаг дөрвөн сансрын нисэгч бүхий “Orion” хөлгийг амжилттай хөөргөснөөр Сар луу чиглэсэн жолоодлогот нислэгийн шинэ үеийг эхлүүллээ.
“Artemis II” хөтөлбөрийн хүрээнд тус хөлгийг Флорида мужийн Канавералын хошуун дахь Кеннедигийн сансрын төвөөс АНУ-ын Зүүн эргийн цагаар дөрөвдүгээр сарын 1-ний 18:35 цагт дэлхийн хамгийн хүчирхэг зөөгч пуужингийн нэг болох Space Launch System (SLS)-ийн тусламжтайгаар сансарт хөөргөсөн байна.
Хөөрөхийн өмнө SLS пуужинг таван цагийн турш нийт 2.65 сая литр криоген түлшээр цэнэглэж, нийт жинг нь 2600 орчим тоннд хүргэсэн нь уг нислэгийн цар хүрээ, инженерийн бэлтгэлийг илтгэжээ. Хөөрснөөс хойш ердөө найман минутын дараа “Orion” сансарт гарч, улмаар ойролцоогоор нэг цагийн дараа дэлхийн тойрог замд амжилттай орсон байна.
Дараагийн 24 цагийн хугацаанд багийн гишүүд амьдралыг тэтгэх системүүдийг нарийвчлан шалгах бол гурав дахь өдөр Сар луу чиглэсэн замд орох маневрыг гүйцэтгэх аж. Харин тав дахь өдрөөс эхлэн хөлөг дэлхийн татах хүчний нөлөөллөөс гарч, Сарны татах хүчний бүсэд нэвтрэхээр төлөвлөжээ.
Энэхүү нислэгт Рид Уайзман, Жереми Хансен, Кристина Кох, Виктор Гловер нар оролцож буй бөгөөд тэд 10 хоногийн хугацаанд Сарыг тойрон нисээд, эх дэлхийдээ буцаж ирэх юм байна. Виктор Гловер Сарны хөтөлбөрт оролцож буй анхны африк гаралтай америк хүн болж байгаа бол Кристина Кох нь уг хөтөлбөрийн анхны эмэгтэй сансрын нисэгч гэдгээрээ онцлог аж. Түүнчлэн энэхүү нислэг нь сүүлийн 50 гаруй жилийн хугацаанд хүнтэй хөлөг Сар луу хамгийн ойртон хүрч буй анхны тохиолдол болж байна.
Анх “Orion” хөлгийг 2026 оны гуравдугаар сард хөөргөхөөр төлөвлөж байсан ч SLS пуужингийн хөдөлгүүрийн гелийн дамжуулах системд гарсан техникийн гэмтлийн улмаас тодорхойгүй хугацаагаар хойшилжээ. Инженерүүд уг доголдлыг амжилттай засварласнаар хөөргөх ажлын бэлтгэлийг бүрэн хангаж чаджээ.
“Artemis II” нь АНУ-ын Сар судлалын шинэ хөтөлбөрийн хоёр дахь шат бөгөөд NASA 2019 онд энэхүү “Artemis” хөтөлбөрийг албан ёсоор зарласан юм. Хөтөлбөрийн гол зорилго нь Сар руу тогтмол нислэг үйлдэх боломжийг бүрдүүлэх, улмаар цаашид Ангараг гараг руу хүн илгээхэд шаардлагатай дамжин өнгөрөх суурь баазыг Саран дээр байгуулахад оршиж буй аж.
Үүнээс өмнө 2022 оны арванхоёрдугаар сард хэрэгжсэн “Artemis I” хөтөлбөрийн үеэр “Orion” хөлөг автомат горимд Сарыг тойрон хэдэн долоо хоног нисээд, амжилттай дэлхийд буцаж ирсэн бол дараагийн шат болох “Artemis III”-ийн хүрээнд 50 гаруй жилийн дараа хүн төрөлхтөнд Сарны гадаргуу дээр дахин буух түүхэн үйл явдлыг үзүүлэхээр төлөвлөжээ.
Эх сурвалж: DW
