Дэлхийн хөлбөмбөгийн ертөнцөд анхаарал татсан нэгэн асуудал бол Иран улсын шигшээ баг 2026 оны ДАШТ-д оролцох эсэх юм. FIFA-гийн ерөнхийлөгч Жианни Инфантино энэ асуудлаар албан ёсны байр сууриа илэрхийлж, тодорхой мессэж өгчээ.
2026 оны хөлбөмбөгийн дэлхийн аварга шалгаруулах тэмцээн АНУ, Мексик, Канад улсад зохион байгуулагдаж, түүхэндээ хамгийн өргөн бүрэлдэхүүнтэй буюу 48 орныг хамрах юм. Тэдгээрийн дунд Иран улс багтаж буй.
Тус баг Азийн бүсийн урьдчилсан шатанд амжилттай оролцож, хэсгээ тэргүүлэн эрхээ хамгийн түрүүнд баталгаажуулсан билээ. Энэ нь Ираны хувьд дараалсан дөрөв дэх удаагаа ДАШТ-д хүч сорих боломж болж буй юм.
Гэвч бүс нутгийн геополитикийн нөхцөл байдал хурцадсанаар спорт улс төрийн нөлөөнд орж болзошгүй гэх асуудал хөндөгдөж эхэлжээ. Иранд үргэлжилж буй зөрчил, аюулгүй байдлын нөхцөл нь тус улс дээрх тэмцээнд оролцох эсэх эргэлзээ үүсгээд байгаа аж.
АНУ-ын Ерөнхийлөгч Дональд Трамп энэ талаар хэд хэдэн өөр өнгө аястай байр суурь илэрхийлсэн. Тэрбээр нэг талаар Иран оролцох эсэх нь өөрт нь хамааралгүй гэж мэдэгдсэн ч нөгөө талаар оролцож болно гэж зөвшөөрөхийн зэрэгцээ ийм нөхцөлд оролцох зохимжтой эсэх нь эргэлзээтэй хэмээн тодотгожээ.
FIFA энэ талаар илүү тодорхой бөгөөд тууштай байр суурь илэрхийлэв. Жианни Инфантино “Иран ДАШТ-д оролцоно. Тоглолтууд товлосон ёсоороо явагдана. Бид тэднийг оролцоход баяртай байна. Учир нь, өнөөдрийн хувьд маш хүчтэй баг” хэмээн онцолжээ. Тэрбээр мөн багийн тоглогчид, дасгалжуулагчидтай биечлэн уулзаж, нөхцөл байдал хэвийн байгааг дурдсан байна.
Сонирхолтой нь, Ираны тал өмнө нь огт өөр байр суурь илэрхийлжээ. Тус улсын Спортын сайд өнгөрсөн сард АНУ-тай үүссэн зөрчил, аюулгүй байдлыг иш татан “Ийм нөхцөлд ДАШТ-д оролцох боломжгүй” гэж мэдэгдэж байсан. Энэ нь спорт, улс төрийн огтлолцол хэр гүнзгий байгааг харуулсан байр суурь болжээ.
Гэсэн хэдий ч бодит байдал дээр Иран тэмцээнээс татгалзах шийдвэр гаргах амар биш. FIFA-гийн дүрмийн дагуу оролцох эрхээ авсан баг тэмцээнээс гарах тохиолдолд өндөр хэмжээний торгууль хүлээдэг аж. Тухайлбал, эхний тоглолтоос 30-аас дээш хоногийн өмнө татгалзвал дор хаяж 250 мянган швейцарь франк, харин 30 хоногоос дотогш хугацаанд бол 500 мянган швейцарь франк хүртэл торгууль ногдуулах журамтай.
Ийнхүү дэлхийн хамгийн том спортын наадамд оролцох эсэх асуудал зөвхөн талбай дээрх тоглолтоос хальж, олон улсын харилцаа, улс төр, аюулгүй байдлын нөхцөлтэй салшгүй холбогдож буй нь энэ удаагийн ДАШТ-ийг илүү онцлог, анхаарал татсан үйл явдал болгох төлөвтэй байна.
Эх сурвалж: DW
