Сүүлийн өдрүүдэд нийслэлийн улс төрийн орчинд өрнөсөн үйл явдлууд хотын удирдлагын асуудлыг дахин олон нийтийн анхаарлын төвд авчирлаа. Үүний нэг илэрхийлэл нь Улаанбаатар хотын захирагч Хишгээгийн Нямбаатарыг огцруулахыг шаардсан иргэдийн өргөдөл бөгөөд одоогийн байдлаар 21 мянга гаруй хүн дэмжин, гарын үсэг зуржээ.
Өргөдөлд хотын даргыг албан үүргээ хэрэгжүүлэх явцдаа ёс зүй болон хууль эрх зүйн зөрчил байж болзошгүй нөхцөлүүдийг үүсгэсэн гэж дурдсан байна. Тухайлбал, иргэдийн үзэл бодлоо илэрхийлэх эрхэд нөлөөлсөн байж болзошгүй үйлдлүүд, олон нийттэй зүй бус харилцсан хандлага, нийслэлийн төсвийн огцом өсөлттэй холбоотой ил тод бус байдал, мөн байгаль орчинд сөрөг нөлөө үзүүлж буй томоохон төслүүдийг онцолжээ.
Ялангуяа Туул гол дагуух хурдны замын төсөл, Сэлбэ болон Дунд голын ай савд хийгдсэн бүтээн байгуулалтын ажлууд нь экологийн тэнцвэрт байдалд сөргөөр нөлөөлж болзошгүй хэмээн иргэд, судлаачдын шүүмжлэл дагуулсаар байна. Үүний зэрэгцээ нийслэлийн төсөв богино хугацаанд эрс нэмэгдсэн ч зарцуулалтын үр ашиг, хэрэгжилтийн ил тод байдал хангалтгүй хэвээр байгаа нь хариуцлагын асуудлыг улам тодруулж буй юм.
Энэ нөхцөл байдлыг улам хурцатгасан өөр нэг үйл явдал Төрийн ордонд болов. УИХ-ын Төсвийн байнгын хорооны хуралдааны үеэр гишүүн Д.Энхтүвшин хотын орлогч дарга Т.Даваадалайг танхимаас хүчээр гарган, түлхэж унагаасан нь олны анхаарлыг татав. Уг явдлын дараа Д.Энхтүвшин гишүүн өөрийн үйлдэлд тайлбар өгч, уучлалт хүссэн ч төрийн байгууллагын ёс зүй, харилцааны хэм хэмжээг зөрчсөн асуудал хэмээн шүүмжлэл дагуулсаар байна.
Маргаан Туулын хурдны замын төслийн талаарх хэлэлцүүлгийн үеэр үүссэн бөгөөд хотын даргыг түр эзгүй байхад өгсөн тайлбар гишүүний дургүйцлийг төрүүлснээс үүдэн ийнхүү хурцадсан аж. Тодруулбал, УИХ-ын гишүүн Д.Энхтүвшин байнгын хорооны хуралдаан дээр хотын орлогч Ч.Даваадалай “Дарга ариун цэврийн өрөө орохоор явсан” гэж тайлбарламагц түүнийг боож унаган, “Чи ингэж ярихгүй шүү” гэсэн нь ёсзүйн алдаатай үйлдэл болжээ.
Удалгүй тэрбээр “Д.Энхтүвшин: Нийслэлийнхний хандлагаас болж ёс зүйгүй үйлдэл гаргалаа, Т.Даваадалайгаас уучлалт хүсье!” гэв. Харин Т.Даваадалай энэ явдлыг “Эр хүмүүсийн хооронд тохиолддог зүйл” хэмээн үзэж, хууль хяналтын байгууллагад хандахгүйгээ илэрхийлсэн байна.
Ажиглагчдын хувьд энэхүү зөрчлийг зөвхөн хувь хүмүүсийн маргаан гэж үзэхээс илүүтэй, улс төр болон бизнесийн ашиг сонирхлын огтлолцол, нөлөөллийн хүрээтэй холбон тайлбарлах хандлага давамгайлж байна. Төрийн шийдвэр гаргах түвшинд хувийн болон бүлэглэлийн ашиг сонирхол хэрхэн нөлөөлж буй тухай асуудал ч дахин сөхөгдөж эхэллээ.
Энэ бүхний дунд шинээр томилогдсон Ерөнхий сайд Н.Учрал парламентын индэр дээрээс хотын удирдлагад хандан хариуцлага нэхсэн байр суурь илэрхийлсэн нь улс төрийн дотоод тэнцвэр өөрчлөгдөж байгааг илтгэх дохио гэж харагдаж байна. Өмнө нь нэгэн чигт явж байсан улс төрийн харилцаанд ийнхүү зөрчил үүсч буй нь эрх мэдэл, нөлөөллийн шинэ хуваарилалт явагдаж болзошгүйг илтгэж байна.
Эцэст нь, нийслэлийн удирдлагатай холбоотой өнөөгийн нөхцөл байдал нь ганц хүний асуудлаас хальж, засаглалын ил тод байдал, хариуцлага, иргэдийн оролцоо, улс төр-бизнесийн харилцааны бодит дүр төрхийг хөндсөн өргөн хүрээний асуудал болж хувирсан нь энэ.
