Украины Ерөнхийлөгч Владимир Зеленский гуравдугаар сарын 30-нд сэтгүүлчидтэй цахимаар уулзахдаа “Украин улс эрчим хүчний салбарт харилцан довтлохгүй байх (гал зогсоох) асуудлыг хэлэлцэхэд бэлэн байгаа бөгөөд одоо шийдвэр нь Оросын талд байна” гэж мэдэгджээ.
Тэр “Хэрвээ Орос Украин улсын эрчим хүчний байгууламжуудыг онилохгүй бол бид ч мөн тэдний эрчим хүчний салбарт цохилт өгөхгүй” гэж онцлон хэлсэн байна. Зеленский мөн Украин улс ямар ч хэлбэрийн гал зогсоох хэлэлцээг эхлүүлэхэд бэлэн болохыг дахин дурдаад, энэ нь тэнгис болон агаарын орон зайд ч хамаатай байж болохыг тайлбарлав.
Тэр “Бүрэн гал зогсоох гэдэг нь пуужин, дрон нисэхгүй байх, дэд бүтцэд халдахгүй байх гэсэн үг. Бид энэ бүхнийг өмнө нь санал болгосон. Хэрвээ Орос бэлэн бол бид ч мөн бэлэн” гэж тэр нэмж хэлжээ.
Украин Москвагийн цохилтод хариу өгч байна
Зеленский Украин улс Оросын довтолгоонд хариу болгон цохилт өгдөгийг сануулсан. Сүүлийн үед дэлхийн эрчим хүчний хямралын улмаас Украинд зарим түншүүдээс Оросын нефть, эрчим хүчний салбарт өгөх хариу цохилтыг багасгах талаар санал ирснийг баталжээ.
Тэр “Хэрвээ Орос хэлэлцээ хийхэд бэлэн бол цаг товлож, энэ асуудлыг шийдвэрлэхэд Украин бэлэн” гэж мэдэгдсэн байна.
Иран дахь дайн нефтийн үнийг өсгөв
АНУ болон Израилийн Иранд явуулж буй, дөрвөн долоо хоногоос дээш үргэлжилж байгаа дайн нефтийн үнийг огцом өсгөсөн. Үүнтэй холбоотойгоор АНУ-ын Ерөнхийлөгч Дональд Трамп ОХУ-д тавьсан зарим хоригийг хэсэгчлэн сулруулжээ.
АНУ 30 хоногийн хугацаанд гуравдагч орнуудад далайд байгаа Оросын хоригт орсон нефть, нефтийн бүтээгдэхүүнийг худалдан авахыг зөвшөөрсөн байна.
“Гурван талт хэлэлцээ мухардалд ороогүй”
Зеленскийн үзэж буйгаар, АНУ-ын зуучлалтай Украин, Оросын энхийн хэлэлцээ мухардалд ороогүй ч гурван талт уулзалт байнга хойшилж буй юм.
Тэр “Бид мухардалд орсон гэж би бодохгүй байна. Мухардал гэдэг нь бууж өгөх гэсэн үг биш. Орос бууж өгвөл болно, бид бууж өгөхгүй. Бид гурван талт уулзалт зохион байгуулж, дипломат замаар урагшлах ёстой. Хэлэлцээний ширээний ард хүчтэй байхын тулд тулааны талбарт ч хүчтэй байх хэрэгтэй” гэж тэр хэлжээ.
Хэлэлцээ хойшилж буй гол шалтгаан – Иран дахь дайн
Зеленскийн хэлснээр, хэлэлцээ хойшилж буй гол шалтгаан АНУ-ын анхаарал Иран дахь дайнд төвлөрсөнтэй холбоотой аж. Тэр “Гурван талт уулзалт болох ёстой. Энэ нь АНУ-ын анхаарал одоогоор Иранд төвлөрсөнтэй холбоотойгоор хойшилж байна. Гэхдээ Орос-Украины дайныг мартаж болохгүй. Европ болон АНУ-ын зарим төлөөлөгчид энэ асуудлыг байнга хөндөж байгаад талархаж буйгаа илэрхийлжээ.
Украин улс ямар ч хэлбэр, ямар ч газар уулзахад бэлэн боловч Орос болон Беларусь улсад уулзахгүйгээ мөн онцолсон байна.
Өмнө нь гурван талт хэлэлцээг гуравдугаар сарын 10, 11-нд Турк улсад хийхээр төлөвлөсөн ч Ойрхи Дорнод дахь нөхцөл байдлын улмаас АНУ-ын санаачилгаар хойшлуулсан. Харин өмнөх уулзалт хоёрдугаар сарын дундуур Швейцарын Женев хотод болсон билээ.
Эх сурвалж: DW
