Европын Холбооны Гадаад хэргийн сайд нар болон Европын дипломат бодлогын тэргүүн Кая Каллас нар Буча хотыг чөлөөлсний дөрөв дэх жилийн ойгоор, гуравдугаар сарын 31-ний мягмар гарагт Киев хотод хүрэлцэн иржээ.
Дурсгалын арга хэмжээнд оролцсоны дараа Европын албан тушаалтнууд Украины нийслэлд уулзалт хийх аж. Уг хэлэлцүүлгээр Унгар улсаас Украиныг дэмжих ЕХ-ны санхүүгийн тусламжийг түр зогсоосон асуудал, мөн гал зогсоосны дараа ОХУ-ын дайны гэмт хэргүүдэд хариуцлага тооцох асуудлыг хэлэлцэхээр төлөвлөжээ.
Германы Гадаад хэргийн сайд Йоханн Вадефуль болон Кая Каллас нар Киевт ирэхдээ Иранд өрнөж буй дайны улмаас Украиныг дэмжих түвшинг бууруулахын эсрэг байр суурьтай байгаагаа илэрхийлсэн аж.
Тэрбээр dpa агентлагт “Бид тэвчээртэй байж чадна, бид нэгдмэл гэдгээ, мөн дэмжлэгийг сулруулах нь боломжгүй гэдгийг тодорхой харуулах ёстой” гэж ярьжээ. Вадефулийн хэлснээр, энэ нь Киев дэх уулзалтын гол мессэж байх ёстой юм байна.
Вадефуль: Дэмжлэгийг сулруулах боломжгүй
Германы Гадаад хэргийн сайд Йоханн Вадефуль болон Кая Каллас нар Украиныг дэмжихийг сулруулах ёсгүйг дахин онцолсон байна.
Каллас: Энэ бол Европын аюулгүй байдлын асуудал
Кая Калласын хэлснээр, ОХУ-ын Украин руу эхлүүлсэн дайн (дөрвөн жил гаруйн өмнөөс үргэлжилж буй) ямар үр дүнд хүрэх нь Европын Холбоонд нэн чухал бөгөөд энэ нь Европын аюулгүй байдалтай шууд холбоотой юм.
“Бид энэ асуудалд анхаарал хандуулах ёстой, зүгээр л хойш тавьж болохгүй” гэж тэр тэмдэглэжээ.
Бучагийн таван долоо хоногийн эзлэлт
Киев мужид орших жижиг хот болох Буча нь ОХУ-ын өргөн цар хүрээтэй довтолгоо эхэлснээс хойш таван долоо хоногийн дараа, 2022 оны 3-р сарын 31-нд чөлөөлөгдсөн байна.
Хотын захиргааны мэдээлснээр эзлэгдлийн хугацаанд 458 энгийн иргэн амиа алдаж, тэдний 419 нь буудуулсан эсвэл эрүүдэн шүүлтийн улмаас нас баржээ. Буча хотын нэр нь Оросын армийн харгис хэрцгий байдлын бэлгэдэл болсон байна.
Эх сурвалж: DW
